Deborah Sun nasikop sa buy-bust

CEBU, Philippines —  Gisikop  ang  60-anyos  nga kanhi aktres nga si  Deborah Sun o Jean Louise Porcuna Salvador sa tinoud nga kinabuhi  atol sa gipahigayon nga buy-bust operation sa  Quezon City Police ug Philippine Drug Enforcement Agency (PDEA) sa usa ka  condominium building sa Cubao, Quezon City niadtong Domingo sa buntag.

Lakip sa nadakpan ang anak ni Deborah nga si Angela Porcuna ug ang laing duha nila ka kauban nga sila si Gerald de Guzman ug Gonzalo Gonzalez.

Nakaplagan sa mga polis ngadto sa mga dinakpan ang plastic sachet nga dunay  sulod nga gidudahang  shabu, weighing scale,  lighter, gunting, foil ug  tube improvised tooter.

Usa sa sikat nga pelikula ni Deborah kaniadto mao ang Temptation Island niadtong 1980.

Lito Legaspi mipanaw

Mipanaw na ang beteranong aktor nga si Lito Legaspi sa edad nga 77 niadtong Domingo sa buntag.

Suma pa sa report nga kalit lang naglisod og ginhawa si Lito busa dali kini nga gidala sa  Cardinal Santos Memorial Medical Center.

Nakabsan sa iyang kinabuhi  ang aktor tungod sa Cardiac arrest .

Anak ni ito ang mga  aktor  nga sila si Zoren ug  Kier Legaspi.

Nagsugod ang career niya niadtong 1959 ug sikat kaayo kini nga talent sa Sampaguita  Pictures.

Nahimo usab siya nga kabahin niadto sa teleserye ni Coco Martin nga “FPJ’s Ang Probinsyano” niadtong 2017.

Nagbangotan ang showbiz industry sa pagkamatay  sa beteranong aktor.

Daytime Teleserye Queen

Gihatagan na og titulo si Dimples Romana isip ‘Daytime Teleserye Queen. Si Dimples ang usa sa gikagubtan nga artista karon tungod sa ka maayo niya modala  isip Daniela sa teleserye nga ‘Kadenang Ginto’.

Kalmado Lang

Wala na-intimidate si Enchong Dee nga nakatrabaho niya ang mga beterano sa pag-arte nga sila si Anita Linda, Ricky Davao ug Jaclyn Jose sa pelikula nga Circa. Matud pa niya nga dili siya makatarong og arte kun ma-intimidate siya sa iyang katrabaho.

Kondisyon ni Maris

Mosugot si Maris Racal nga aduna silay kissing scene ni Iñigo Pascual kun gikinahanglan gyud kini alang sa pelikula. Dili mosugot ang aktres kun trip-trip lang.

Na-wow sa karakter

Nahimout gyud og maayo  si Vina Morales sa iyang karakter isip si Sisa sa musical film nga ‘Damaso’. “Para sa akin, wow! Singing, and acting, may combination. Iyong eksena, mabigat. While I’m singing, hinahanap ko sina Basilio at Crispin!”, suma pa ni Vina.

Mag-abot ra

Adunay pagduda  si Ai Ai delas Alas kun kinsa ang nanglungkab  sa iyang  panimalay sa miaging semana. Matud pa ni Ai Ai nga dili man kini masikop karon apan dako ang iyang pagtuo nga mag-abot sila sa prisohan ilabi na karon nga  nagpadayon ang imbestigasyon sa maong insidente.

Nag-viral tungod sa tubag

Nag-viral sa social media ang ‘That’s My Boy’ contestant nga si JD kinsa nagpangidaron lang og 6 anyos. Gipangutana siya kun unsa ang gusto niya nga propesyon kun anaa na siya sa hustong edad. Tubag pa niya nga “Sundalo po para talunin ang China at para hindi po nila makuha ang dagat natin”.

Mirampa sa NYFW

Mibalik na sa pagrampa  sa entablado si Miss Universe 2015 Pia Wurtzbach. Mirampa siya sa bag-ohay lang nga New York Fashion Week. Gisul-ob ni Pia ang mugna ni Albert Andrada kinsa mao sab ang midisenyo sa gown sa beauty queen sa dihang nisalmot kini sa Miss Universe.

Makasuway na gyud

Gipangulbaan gyud si Amy Perez sa umaabot niya nga birthday celebration. Hapit na saulugon ni   Amy ang iyang 50th birthday. Nagtangag sa 80’s ang tema sa iyang party. Matud pa ni Amy nga wala siya makasinati  kaniadto nga adunay engrande  nga selebrasyon sa iyang adlaw’ng natawhan.