Naka “Amgo” si John

CEBU, Philippines — Usa ang 19 anyos nga Cebuano singer-songwriter nga si John Roa sa naghatag karon og lig-ong imahe nga nagpakita nga dili gyud basta-basta ang mga Sugbuanon kun maghisgot na og natad sa pagkanta.

Kasamtangang gi-promote ni Jon ang iyang labing una nga extended play nga “Amgo”  nga gi-release sa Viva Records.

Gigamit niya ang termino nga “amgo” sanglit matag sitwasyon nga gisudlan sa tawo,  makaamgo gyud kini sa iyang gibuhat.

Kanhi sakop si John sa Ex-Battalion, kinsa sikat na daan isip digital artist sa wala pa siya nahisakop sa maong grupo..

Karon dili na siya tipik sa Ex-Batallion, apan giklaro gyud niya nga maayo ang iyang relasyon ngadto niini.

Matud pa niya nga posibleng duna’y laing plano ang Kahitas-an alang sa iyang career  ingon man usab ang pagpalapad pa sa iyang abilidad.

Karon nga nag-solo na og balik si John, nag-atubang siya og dakong hagit apan nagmalaumon siya nga hangupon sa masa ang iyang mga awit.

Siya ang nagkanta sa  “Lagi”, “Muli”,  “Andiyan”,  “Natatangi”  ug “Itutuloy”.

Mapasigarbohon niya nga gipahibalo nga nagkalain-lain ang dagan sa tema sa maong mga kanta busa angayan kini paminawon sa mga tawo.

Sa pakighinabi ni John sa  pipila ka mga miyembro sa  Cebu Entertainment Group, gibutyag niini nga nagdako gyud siya sa Barangay Mabolo, Cebu City  hangtod nga nakabaton og bag-ong balay ang iyang pamilya sa Lapu-Lapu City.

Suma pa ni John nga lahi ra gyud ang musika  alang kaniya nga maoy nagsilbing therapy sa pagwagtang sa kalaay  ug sa susamang higayon,  makahatag siya og inspirasyon sa mga tawo nga makadungog niini  .

“Nagbuhat ko og kanta para sa mga tawo, kanang maka-relate sila ug makakuha   pud og mga ideya,” hirit pa ni John.

Usa sa gipanaminan ni John ang iyang mga kaagi nga usahay bation niya ang pagkahagba sa iyang kaugalingon apan ipatigbabaw gyud niya sa iyang huna-huna nga dili siya mo-surrender.

Target ni John puhon nga makagama og awit nga maghisgot sa pagmahal sa nasud.   Kasamtangan usab niya nga gigama ang awit nga naghisgot sa kalinaw sa nagkadaiyang dapit sa kalibutan.

Nakasalmot na si John kaniadto sa Tawag ng Tanghalan sa It’s Showtime niadtong 2016 ug “Pilipinas Got Talent” niadtong  2014.