Troy Montero 'pasa lang' ang inabot sa race car accident; Mangangarera uli
MANILA, Philippines — Hindi gaano napano ang actor-turned-racer na si Troy Montero matapos maaksidente noong Sabado, at nagpahaging na magbabalik din siya agad sa race track.
"Babalik din ako," sabi niya sa kanyang Instagram sa Inggles kanina matapos madisgrasya sa Vios Racing Festival 2019 noong Sabado.
Lunes nang i-post ni Troy ang footage ng kanyang aksidente, kung saan makikitang lumihis sa track ang kotse niya't tumama sa tubig.
"Pabalik-balik ang ulan buong araw. Sinubukan ko pang ayusin ang pag-slide bago magpaikot-ikot para makabalik," sabi niya sa Inggles.
Nang tumama ang gulong niya sa tuyong kalsada, saka naman daw niya sinalpok ang isa pang kotse.
Sa video na ipinaskil ng Toyota Motor Philippines sa Facebook, makikita na nakaabot muna sa finish line si Troy bago madisgrasya.
"... Troy Montero's finish will still count as a finish," sabi ng pahina sa comments section.
Pinahupa naman ni Troy ang pangamba ng ilan, at sinabing okay lang siya.
"Namamaga ako at may ilang pasa... pero ang mahalaga ay okay tayong lahat," sabi niya sa fans.
Aniya, sa ngayon ay masasabi niyang mas malaki pa ang mga biyayang natatanggap niya kaysa sa mga hinaharap na problema.
- Latest
