Homecoming ni Gazini

CEBU, Philippines — Mahitabo na gyud ang hagbay ra nga gipaabot sa mga Sugbuanon , ang  homecoming ni Gazini Ganados kinsa nahimong Miss Universe-Philippines 2019 atol sa nahitabong Binibining Pilipinas 2019 niadtong Hunyo 9 niining tuiga.

Duha ka buwan na kini nga giatangan sa mga Sugbuanon ug mahitabo na gyud kini sa ipahigayon nga Pasigarbo sa Sugbo 2019 nga usa sa gikahinaman nga kalihukan sa  kapitolyo.

Mahitabo ang homecoming ni Gazini karong Agosto 25 sa Abellana Sports Complex.

Naghinamhinam na sab si Gazini sa maong espesyal nga adlaw aron mahatagan og opisyal nga homecoming event ang iyang mga taga suporta ug aron mapaabot sab niya ang iyang personal nga pasalamat ngadto sa nagpaluyo kaniya sa  iyang kadaogan sa  national nga indigay.

James mibiya sa Viva

Niulbo karon ang istorya nga matud pa  nibiya na sa nataran sa Viva Artist Agency ang Kapamilya star nga si James Reid  human sa pito ka tuig nga pagpasilong sa maong talent agency.

Ang amahan niini nga si Robert Malcolm Reid mao na’y gikatahong  momaneho sa   career sa singer-actor.

Sa pagsuwat niining balitaa, wala pa mopagawas og pamahayag ang Viva kabahin niini apan giingon nga mutual decision ang nahitabo sa maong pagbiya ni James.

Big winner  si   James sa  Pinoy Big Brother Teen Clash niadtong 2010.  Wala dayon molawig ang iyang karera pagkahuman sa maong reality show hangtud nga gikuha sa Viva niadtong 2014 nga maoy sinugdanan sa paghumot sa iyang pangalan sa masa.   Gipares siya kang Nadine Lustre ug ang ‘Ang Diary Ng Panget' maoy una nga pelikula nga ilang giparesan. Didto  nagsugod ang tandem nga JaDine. 

Prima donnas karon!

Mosikad na karong hapon  ang  bag-ong family drama series sa GMA-7 nga 'Prima Donnas' diin magtuki kini kun unsa ka sagrado sa usa ka pamilya.

Ang maong serye magtuki sab kini unsa ka importante sa tawo ang mga igsuon.

Ang tulo ka managsuon mao ang tulo ka 'Donna' nga sila si Donna Marie, Donna Belle ug Donna Lyn nga hatagan og kinabuhi nila ni Jillian Ward, Althea Ablan ug Sofia Pablo.

Mahimo nga kabahin sa maong serye si Katrina Halili ug Wendell Ramos kinsa wala gyud mosipyat og bisita pagbalik dinhi sa Sugbo aron nga ipasiatab ang maayong proyekto nga ilang gibidahan.

Sa pakighinabi sa duha ngadto Cebu Entertainment Group, ilahang gisaysay nga bilinhon ang maong proyekto alang kanila sanglit nagtangag gyud kini og dakong pagtulun-an.

Si Katrina mao ang mohupot sa karakter ni Lilian Dalisay kinsa usa ka surrogate mother sa tulo ka Donna.

Matud pa sa aktres nga sa labing unang higayon, modala siya nga buotan ug panahon na pud  nga siya ang daog-dagon.

Gisaysay ni Katrina nga nakugang gyud siya sa dihang gitanyag kaniya  ang maong  role

"Nagulat ako! Akala ko maldita. Nagpagupit na ako, so paano? Short hair na ako, nagpa-highlights, nagpa-kulay, blonde. Tapos biglang sinabi na mabait!” Padayag pa ni Katrina.

Ilado si Katrina isip kontrabida sa mga serye sa Kapuso network.

Gitataw ni Katrina nga dali ra sab niya mahatagan og hustisya ang iyang karakter gumikan kay buotan sab gyud siya nga tawo sa tinuod nga kinabuhi.

"Well, in person naman, di ako mahihirapan dahil mabait naman talaga ako na tao", suma pa ni Katrina nga dala pahiyom.

Dugang pa ni Katrina nga siguraduhon  niya nga maayo ang iyang pag-deliver sa iyang trabaho busa todo effort gihapon siya aron dili mausik ang kahihayunan nga gihatag ngadto kaniya.

“Sobrang happy ako. Nagbigay sila [GMA] ng tiwala sa akin na bigyan ako ng ibang role. Siyempre, kailangan ko pagbutihan. Kailangan ko i-prove sa kanila na masabi nila na kaya ko", panaad ni Katrina.

Usa ka inahan si Katrina sa maong serye ug matud pa niya nga dali lang sab ang iyang pagpangandam niini sanglit aduna na siya'y kasinatian sa maong buhat.

"Nahuhugot ko from my own experience na totoo naman talaga na mother ako. Nararamdaman ko yung pain, yung saya, so doon ko nahuhugot", si Katrina miingon.

Si Wendell sab mao ang amahan sa tulo ka Donna. Siya mao si Jaime Claveria sa istorya nga mao ang nagdumala sa gipanag-iya nga negosyo nga nasugdan sa iyang pamilya.

Dako ang pagsalig ni Wendell Ramos nga mahatagan og hustisya ni Katrina ang karakter niini sanglit propesyonal na kini motrabaho.

"No questions sa craft ni Miss Katrina, pero I'm so shocked na ang ganda ng ano niya[pagdeliver sa linya]. Ngayon pa lang, hindi pa nabubuo yung mga eksena namin, nakikita ko na   mabibigyan niya talaga ng pagganap ang gagawin niya dito sa Prima Donnas", pagdayeg pa ni Wendell ngadto kang Katrina.

Mapasalamaton si Wendell nga tabang ug pagiya sa production team sa maong teleserye.

“I always ask the directors, the creatives even my co-actors kung ano pang pwede gawin din. Very open naman din po ako. Hindi naman po laging tama ang mga nagiging desisyon ko sa pag-portray. I am very blessed na open po ang mga katrabaho ko", suma pa ni Wendell.

Sa laing bahin, makauban pagbalik ni Wendell si Aiko Melendez sa Prima Donnas. Ulahi sila nga nagkauban sa 'Wildflower' sa laing network.

Mao kini ang magsilbi nga comeback project ni Aiko sa dugay nga panahon nga nawala siya sa GMA.

Una kini ka proyekto diin makauban niya si Katrina.

Naghinam-hinam na sab si Katrina nga makatrabaho si Aiko.

Gawas sa presensya ni Aiko, mahimo sab nga kabahin si Chanda Romero ug Benjie Paras.

Hatagan kini og direksyon sa beteranong aktres nga si Gina Alajar.

Ipatigbabaw usab sa Prima Donnas ang  pagtulun-an kabahin sa paglaum, paghigugma ug pagpasaylo.