Homecoming parade alang kang Gazini

CEBU, Philippines — Gibaha og mga pagdayeg sa mga Talisaynon ang napili nga Bb. Pilipinas- Universe nga si  Gazini Christiana Ganados kinsa representante sa Talisay City ,Cebu  alang sa maong indigay.

Si  Mayor Eduardo Gullas niingon nga buotan ug gwapa si Ganados. Iyang gimanduan ang iyang mga sakop sa pagbutang og mga tarpaulin ni Gazini isip pagpasidungog sa iyang nasakmit nga korona.

Gawas niini,  hatagan og  hugyaw nga  homecoming si Ganados  ug iparada kini sa  Talisay City. Si Bise Mayor Alan Bucao sa iyang Facebook account nipaabot sa iyang pagtimbaya ni Ganados.

Sa wala pa hingpit nga nibiyahe si Ganados sa kaulohan aron sa pagsalmot sa kompetisyon, nibisita una kini sa Talisay City Hall hinungdan nga daghan sa mga Talisaynon ang nakahigayon sa pagkuha og hulagway niini.

Samtang si kongresista Gerald Anthony “Samsam” Gullas mapasigarbuhon usab kang  Ganados.

“Your advocacy for the rights and the elderly deserve the strong support of all as we move forward after your astounding victory,” tipik sa mensahe ni Gullas. Iyang gipasalig ang padayon nila nga suporta alang sa pagtungtong na ni Gazini  sa  umaabot nga Miss Universe .