Emosyonal si Catriona

CEBU, Philippines – Giangkon ni  Miss Universe 2018  Catriona Gray nga emosyonal siya sa nagkaduol na nga koronasyon  sa Binibining Pilipinas 2019.  “I’m going to feel a little bit emotional because this is really where it all began, where I was given a chance to represent the Philippines,” suma pa niya.

Tungod sa kadaogan ni Catriona sa Bb. Pilipinas, siya ang nahimong pambato sa Pilipinas sa Miss Universe ug nagmalampuson siya sa pag-angkon sa korona.

“To be able to pass on that amazing honor to the next Filipina representative... It’s really exciting... It’s an amazing batch and I’m sure they’ll do very well,” matud pa niya.

Ugma na sa gabii mahitabo ang koronasyon sa  Binibining Pilipinas 2019.

Urassaya motikang  sa nasud

Mobisita dinhi sa nasud ang Thai-Norwegian celebrity nga si Urassaya Sperbund. Si Urassaya mao ang bida sa bag-ohay lang nga natapos nga ‘The Crown Princess’ nga giatangan sa mga Kapuso fans. Usa sa mga tikangon sa aktres mao ang Ayala Malls Circuit Activity Center sa Makati City karong Hunyo 15 alang iyang fans day.

Higher concert

Andam na gyud si Jed Madela alang sa iyang concert tour nga “Higher”. Mahitabo   kini karong  Hunyo 21 dinhi sa Cebu sa Waterfront Grand Ballroom. Magsilbi kini nga 15th anniversary concert ni Jed human sa malampuson niya nga pagpanikaysikay sa iyang singing career.

Wala nagpausab

Sa latest episode sa  ‘Taste MNL’, gitubag sa host niini nga si Arra San Agustin ang mga pangutana kabahin sa iyang personal nga kinabuhi. Usa sa mga gitubag ni Arra kun nagpaubos ba siya og plastic surgery. Tubag pa niya nga wala gyud siya nagpausab sa bisan asa nga parte sa iyang lawas.

Dako og natabang

Ang kalisod mao ang nagtukmod kang Kiray Celis nga magkugi gyud sa showbiz. Matud pa ni Kiray nga kinahanglan gyud niya mokita og kwarta gumikan kay dili niya gusto nga mobalik sa ilang kaagi sa una nga asin na lang ang ilang isud-an. Alang kang Kiray nga dako og gikatabang ang showbiz sa iyang pamilya gumikan kay mao kini ang tinubdan nga nakapatukod siya og upat ka andana nga panimalay ug nakapatukod sab siya og negosyo nga maoy  nagbuhi  kanila kun wala siya’y showbiz project.

Dili magpaapekto

Dili gusto ipakita sa Kapamilya aktres nga si Loisa Andalio nga apektado siya sa problema nga gisagubang karon sa iyang pamilya. Matud pa ni Loisa nga nagbuwag ang iyang mga ginikanan niadtong Marso lang. Nagpabilin nga isog si Loisa ug mas gikinahanglan niya ipadayon ang iyang trabaho tungod kay usa siya sa gisaligan nga mibuhi sa iyang pamilya karon.

Propesyonal

Daghan ang midayeg sa gi-post ni Mon Confiado sa iyang Facebook account kun diin gipadayag  niya kun unsa ka importante ang pagka-propesyonal ug ang abilidad sa pag-arte. Matud pa ni Mon nga importante nga morespeto sa mga katrabaho aron nga ipakita ang pagka-propesyonal niini. “An actor’s professionalism is just as important as their acting abilities”, suma pa ni Mon.

Wish ni Baron

Natuman gyud ang birthday wish ni Baron Geisler nga makabalik sa showbiz human sa taud-taud nga pagpahuway niini tungod kay gikinahanglan niya nga bag-uhon ang iyang kinabuhi. Atol sa iyang birthday, wala siya magpahikay gumikan kay busy siya sa taping sa ‘FPJ’s Ang Probinsiyano’. Dugang pa ni Baron nga aduna siya’y bonus wish kun diin natuman na sab nga mao ang pagmugna og usa ka Christian film kun diin siya ang bida niini.

Mibalik sa pagkanta

Nakadawat og positibo nga komento si Yasmien Kurdi sa netizens human nga gipakita sab niya ang iyang version sa awit nga “A Whole New World”. Taud-taud na nga wala mikanta ang aktres. Nanghinaot usab si Yasmien nga mahatagan siya og laing higayon nga makamugma og laing album.

Real score

Simple lang gyud og tubag si Vice Ganda sa dihang gipangutana siya sa real score nila sa iyang gidungog nga karelasyon karon nga si Ion Perez. “Happy naman ang mga buhay namin ni Ion. That’s the real score”, tubag pa ni Vice.

Dunay pagbati

Wala gilimod ni Maris Racal nga aduna siya’y espesyal nga gibati ngadto kang Inigo Pascual kinsa nahimo niya nga onscreen partner kaniadto. Matud pa ni Maris nga kahibalo na siya kaniadto nga ipares sila sa lain nga mga artista mao nga gipangandaman gyud kini niya. Pabilin sila nga higala ni Inigo ug nagmalaumon siya nga magkauban sila pagbalik sa usa ka proyekto.