Tam-is ang limpiyong kadaogan

Hugaw ang eleksiyon sa Pilipinas. Kay kun unsay gidili sa Comelec, gisupak sa mga kandidato. Kana lang vote buying, haskang usoha!

Ngano? Kay bisag nasakpan, kun dili paylag kaso, aw, di gyud mapriso. May na-detained man tuod, pero buhian ra sab dayon! Pagkahaguka nga balaod.

Sama sa kuwerdas nga sinaw tan-awon. Apan ini’g kuskos, haskang sintunawha!

Sa usa ka lungsod, may numero unong konsehal nga milansar pagka mayor batok sa kaatbang nga dili lumad taga ilaha.  Manok sab siyang Pres. Duterte. Busa, kompiyansa kaayo siya.

Gituman niya ang awhag sa presidente nga molikay sa vote-buying. Sa preliminary survey, nakabentaha siya’g dako. Kay may ubay-ubay na siyang nindot nga nabuhat diha sa iyang pagpangalagad isip konsehal sa ilang dapit.

Gani, higala nako nga silingan niya, miingon man nga layo ra sa tapad ang iyang kontra. Busa, dako kaayo’g purohan nga siya maoy modaog sa piniliay.

Wala gyud mobubo og kuwarta ang maong kandidato aron ipamalit og boto. Gusto niya, nga modaog sa pagka mayor sa tinarong paagi subay sa mga lagda nga nalatid sa Comelec.

Alang niya, lami tagamtamon ang katam-is sa limpiyong kadaogan nga wala masambogig anino sa pagpanikas.

Resulta? Ay, puwerte niyang pildeha! Diay, ang iyang kontra, matud pa sa mikatap nga huhungihong, midalikyat pag-adto sa bukirang barangay sa ilang lungsod ug sekretong mi-enjoy taman sa ginhawa og vote buying, diin wala gyuy kompetensiya!

Haskang lipaya sa mga taga bukid. Ning dakong hulaw sa nanghasing El Niño nga mipaliki sa ilang naughang umahan, diin nasinati ang tumang kagutom, kinsa bay dili matintal pagbaligya sa ilang katungod, masudlan man lang og arang-arang nga pagkaon ang nagkutoy nilang tiyan bisan sulod lang sa mubo nga panahon?

Dinhi, makita nga ang kinaepektibong hinagiban aron modaog ang kandidato sa bugnong lugaynon, mao diay ang vote-buying. Kun ikaw, mag-diniyos, aw, di gyud ka kadaog!

Suwerte kaayo ang mga kandidato nga midaog tungod sa ilang walay hunong proyekto nga nakapabulahan sa katawhan ug dili tungod sa vote-buying o ubang matang sa pagpanikas. Kay segurado gayod, nga ilang madimdim ang espirituhanong katam-is sa kadaogan.

Pinangga sa Ginoo kadtong dili mobulag Kaniya.  Ug may politiko pa kaha nga ingon niini?