Gabii sa kabilin

CEBU, Philippines — Karong buwana, nagsaulog kita sa   National Heritage Month sa Pilipinas.

Dinhi sa atong dapit, naumol  usab ang  mga panghitabo kaniadto nga nahimong tipik sa atong kasaysayan.

Adunay usa ka kalihokan kun diin  ibalik kita sa panahon nga naagian sa atong mga katiguwangan.

Karong Mayo 24, 2019 ug pinaagi sa pagpangulo sa Ramon Aboitiz Foundation, Inc. (RAFI) Culture & Heritage Unit , inubanan sa  pag-abag sa nagkadaiyang  Local Government Units, gimugna ang 'Gabii sa Kabilin' nga usa ka gabii nga pagpanikaysikay aron sab nga pakisayran ang kabilin sa atong mga anhing apuhan kun unsa ang ilang kasinatian ug mga panghitabo sa ilang panahon.

Taud-taud na nga naumol ang maong kalihokan. Karong tuiga, mao kini ang ika-13 nga tuig nga ablihan ang mga pultahan sa nagkadaiyang maanindot nga mga museo, ug mga tinahod nato mga dapit nga padayon nga gipreserbar aron nga magpabilin kini nga lig-on sulod sa pipila ka mga katuigan.

Gawas sa pagbukas sa mga hugyaw nga mga dapit, aduna sab kini ginagmay nga mahimong kalingawan sama sa kulturanhon nga pasundayag, eksibit, libre nga mga kalingawan alang sa mga bata, mga pagkaon, ug uban pa nga mga kasikas.

Magsugod ang mga kasikas untup sa alas 6 sa gabii. Mahuman kini sa alas 12 sa tungang gabii.

Ang mga partisipante  mosakay sa andam nga mga bus ug mga tartanilya. Aduna sab kini mapa aron dili masaag ug kun asa dapit ang sakyan paingon sa sunod nga destinasyon.

Sa  pagsalmot sa maong mabulawanong gabii sa kabilin, gikinahanglan sab nga mopalit og ticket sa P195. Libre na niini ang transportasyon.

Aduna sab kini mapa aron dili masaag ug kun asa dapit ang sakayan paingon sa sunod nga destinasyon.

Karong tuiga, ang tema sa maong kalihukan mao ang "Setting Sail" kun diin mao kini ang lima ka mga barko nga gipanag-iya sa Espanya nga gipanguluhan ni Magellan nga wala damha nga nakalawig dinhi sa nasud.

Sa laing bahin, adunay dugang nga mga kalikuhan nga usa sa highlight nga kompetisyon sa mahitabong 'Gabii sa Kabilin'.

Mao kini ang 'Gabii sa Kabilin Blogging/Vlogging' Contest, 'Gabii sa Kabilin Phoneography' ug ang 'Gabii sa Kabilin Heritage Hunt'.

Alang sa dugang kasayuran sa mga kompetisyon, bisitaha ang opisyal nga Facebook page  sa Gabii sa Kabilin nga mao ang https://www.facebook.com/gabiisakabilincebu/.

Ang maong kalihukan gimugna kini aron paghatag og pagtulun-an alang sa tanan ilabi na sa bag-ong henerasyon ug umaabot nga henerasyon .

Moabot ngadto sa 18 ka mga dapit ang mahimong suroyan sa Gabii sa Kabilin nga nahimutang  sa upat ka siyudad nga naglangkob sa  Cebu City, Talisay City, Mandaue City ug Lapu-Lapu City.