Gi-request sa global franchise owner
CEBU, Philippines — Gibutyag sa komedyanteng TV host nga si Vice Ganda nga ang Fremantle mismo kinsa maoy global franchise owner sa Idol Philippines’ maoy nagpili kaniya nga himoon siya nga usa sa mga hurado sa maong show.
Kauban ni Vice sa maong show sila si Regine Velasquez, James Reid, ug Moira dela Torre .
“Natutuwa ako na natatawa kasi lagi akong personal pick ng franchise. Kasi ‘pag nanonood ‘yung franchise kung sino ‘yung mga possible judges, ‘pag nakikita ‘yung ibang shows kung paano ako nag-judge, laging ako ‘yung ginagawa nilang example. Nakakatuwa naman na nagugustuhan nila kung paano ako mag-judge,” saysay pa niya ngadto sa ABS-CBN News.
Nagduha-duha matud pa siya sa pagdawat niini apan gihangyo gyud siya og maayo sa mga producer.
Andam napud siya sa posibleng isulti sa mga kritiko.
“Kahit ano’ng sabihin natin, maaaring magustuhan nila o hindi, so might as well judge from our hearts. Kung ano ‘yung sinasabi ng puso natin, iyon na ang sabihin natin, huwag na tayo mang-echos,” suma pa niya.
Matteo ug Bela suwayan
Naghinam-hinam na si Matteo Guidecelli sa umaabot niya nga pelikula ubos sa Viva Films. Makapares niya ang Viva star nga si Bela Padilla. Kahinumdoman nga nipirma og kontrata si Matteo sa Viva sa miaging buwan.
Wedding anniversary
Sa Boracay gisaulog sa magtiayong John Estrada ug Priscilla Meirelles ang ilang ika-walo nga wedding anniversary. Kauban nila sa pagbakasyon ang ilang anak nga si Anechka. Gi-enjoy nila pag-ayo ang ilang bakasyon gumikan kay nagpaabot ang ilang trabaho inigbalik nila sa kaulohan.
Excited sa dreamhouse
Kanunay gyud bisitahon sa magtiayong Bianca Gonzalez ug JC Intal ang lugar kun diin kasamtangang gigama ang umaabot nila nga balay. Naghinam-hinam na sila sa ilang dream house nga dugay na nila nga gipangandoy.
Pinangga ang mga bata
Pinangga gyud ni Miss Universe 2018 Catriona Gray ang mga bata. Nibisita siya og usa ka lugar sa miaging adlaw kun diin nagbaha ang mga bata ug nanghatag siya og mga regalo niini.
Arnell mi-resign sa OWWA
Ni-resign si Arnell Ignacio isip deputy administrator sa Overseas Workers Welfare Administration (OWWA) aron makahatag og igong suporta sa iyang amahan nga nasakit. Suma pa ni Arnell nga kinahanglan niya moraket og maayo sa showbiz aron makasuporta sa tambal sa iyang amahan. Kahinumdoman nga gibalibaran ni Arnell kaniadto ang seryeng Ang Probinsyano tungod sa iyang ka-busy, apan karon, andam na siya modawat niini.
Molugwa sa Magpakailanman
Ang istorya sa kinabuhi nila ni Rita Daniela ug Ken Chan ang ipakita sa Magpakailanman ugma. Sikat kaayo ang duha karong panahona gumikan sa seryeng My Special Tatay. “Sa dulo, makikita niyo rin kung paano kami magtatagpo,” suma pa ni Rita.
Fans ni Sarah nahibulong
Pipila ka fans ni Sarah Geronimo ang nagsaba-saba sa social media ug nangutana kun nganong wala naapil ang ilang idolo sa listahan sa mga hurado sa umaabot nga show sa ABS-CBN nga Idol Philippines. Kahinumdoman nga gianunsyo na sa miaging adlaw ang mga hurado sa maong show nga naglangkob nila ni Regine Velasquez, Vice Ganda ug James Reid.
Kris nasuko kang Philip
Wala gyud mahimout si Kris Aquino sa kanhi niya partner nga si Phillip Salvador gumikan kay nisakay kini sa komedya ni senatorial candidate Christopher “Bong” Go sa usa ka campaign rally sa miaging adlaw. Nasakitan si Kris gumikan kay seguradong maapektohan niini ang anak nila nga si Josh. Kahinumdoman nga gihimong komedya ang kaagi nila ni Phillip kaniadto nga matud pa gibinuangan siya niini.
Napugos?
Pipila ka netizens ang nagduda nga napugos lang si Angelica Panganiban sa pagtagad og balik kang Carlo Aquino aron dili maapektohan ang bag-o nila nga endorsement kun diin sila ang nagpares. Kahinumdoman nga nagmaoy si Angelica human gidungog nga duna’y laing babaye nga ka-date si Carlo sa usa ka resort.
Nakauyon sa Siquijor
Nag-ala “Spider-Man” ang singer nga si Inigo Pascual sa pagbakasyon niya sa Siquijor sa miaging adlaw. Sa iyang Instagram story, makita ang hugyaw nga pag-ambak niya sa tubig. Nakauyon gyud si Inigo sa maong lugar.
- Latest