Nagkasinabtanay na?
CEBU, Philippines — Niulbo karon ang tsismis nga matud pa dunay relasyon sila si Miss International 2016 Kylie Verzosa ug Jake Cuenca nga puros mga bitoon sa seryeng “Los Bastardos”. Nasigpatan ang duha nga sweet kaayo. Wala pa motingog ang tagsa-tagsa nila ka kampo kalabot sa maong taho.
Mga bangggiitan
Naghudyaka ang mga Pinoy fans nila ni Josh Groban ug Michael Bubble human nitumaw ang report nga mag-concert sa nasud ang ilang mga idolo. Motikang si Josh sa Pilipinas sunod buwan, samtang si Michael ma-concert karong Abril.
Kasal giuswag
Dili una ipadayon sa bag-ong nakoronohan nga Miss Intercontinental Karen Gallman ang planong pagpakasal nila sa iyang boyfriend nga si Ian Garton gumikan kay ma-busy pa siya sa iyang mga responsibilidad. Suportado hinoun si Karen sa iyang hinigugma.
Glu-Go La Union
Adunay umaabot nga pelikula sila si Enzo Pineda, Kiko Estrada, David Licauco, Derek Monasterio, Teejay Marquez ug Ruru Madrid. Nagtangag kini sa working title nga Glu-Go La Union nga pagadumalaon sa ALV Films.
Concert ni Sarah nagmalampuson
Nagmalampuson ang concert ni Sarah Geronimo sa Qatar sa miaging gabii. Matud pa nga gibahaan gyud kini sa iyang fans nga mosabay gyud kanunay sa iyang pagkanta sa entablado. Giidolo pag-ayo si Sarah sa mga Pinoy nga nagbase sa maong dapit.
Leila naka-uyab
Tsika pa ni Ogie Alcasid nga duna na’y boyfriend ang iyang anak nga si Leila. Suma pa sa singer nga boutan ra ang maong lalaki ug kahibalo gyud kini morespeto sa pamilya ni Leila.
Nakakita na gyud
Puwerting lipaya sa magtiayong Liza Dino ug Ice Seguera gumikan kay nakakita na gyud sila og sperm donor didto sa Amerika. Taod-taod na nila nga gipangandoy nga makabaton og anak.
Mikanta og salamat
Naukyab ang mga Pinoy sa dihang gikanta sa Korean group nga Momoland ang awit ni Yeng Constantino nga Salamat. Ang maong grupo gilangkoban nila ni Taeha, Nancy, JooE, Ahin, Daisy, Yeonwoo, Nayun, ug Jane. Nag-concert ang Momoland sa Araneta Coliseum niadtong Biyernes sa gabii.
Mga bag-o
Ubay-ubay nga mga bitoon ang mangawala sa “FPJ’s Ang Probinsyano” gumikan kay nisalmot kini sa umaabot piniliay. Hinoun duna’y mga bag-ong gipasulod sa maong serye, kini naglangkob nila ni Daria Ramirez, Arlene Muhlach ug Ella Cruz.
- Latest