Sa dihang miulan

CEBU, Philippines — Kasagaran nga mabasa nato karon sa social media mao ang status sa pipila ka mga tawo nga matud pa naglabad ang ilang ulo,  gihilantan,  gi-ubo  ug gisip-on.

Usa sa mga tinubdan niini mao ang  pag-usab usab sa dagan sa panahon.

Kasagaran  ma-feel nato ang kainit sa panahon   apan  makugang lang ta og kalit gumikan kay mobundak ang ulan sa wala nato damha.   Kinsa may magdahom nga moulan nga puwerti mang hayaga sa adlaw?

Dili gyud nato ikalimod nga mahasul gyud kita gumikan kay dili gyud nato mahibaw-an kun kanus-an kini muhunong. Usahay, adunay higayon nga dugay gyud kita makauli ilabi na og gikan sa trabaho tungod kay inig human og bunok sa kusog nga uwan magbaha. Suma pa sa artikulo nga namantala sa www.quora.com, dili gyud makapasakit sa tawo ang ulan apan kun dili  kondisyon imong lawas, mao kini ang makapasakit kanimo ilabi na kun hinay ka og immune system.

Nag-agad usab kini sa temperatura sa imong lawas ilabi na kun gikan ka sa init, apan kalit  lang ka mabasa nga moresulta sa dili maayong kondisyon sa imong lawas.

   Tungod sa  mag-usab usab panahon, piligrong maapektohan usab ang atong panglawas. Busa ania ang simple lang nga tips alang kaninyo.

• Dili nato kalimtan ang pag-check sa weather forecast.

• Ayaw pagtinapolan sa pagdala og payong.  Nasayod kita nga dili nato matag-an ang dagan sa panahon. Kun makalimot ka sa pagdala niini, magpasilong na lang gyud kun mag-uwan ug tuo sa panultihon nga “ang mahal magkasakit.”

• Mag-andam  og plastik aron sa pagputos sa sapatos kun maatlan ka  nga nibundak ang uwan .

• Magbawon kanunay og pan o ba kaha biskwit  nga  masima-sima  ingkaso gutumon ka kun  ma-stranded ka.

• Magpalayo sa mga electrical post  kun dunay kilat.

• Pag-monitor sa mga  pahibalo o anunsyo gikan sa media aron aduna ka’y mga kasayuran sa mga panghitabo sa palibot.

• Kaon og  prutas ug utanon aron molig-on ang imong resistensya.