Zane milawig; Kyla, nanamilit na

CEBU, Philippines — Cebuano o Visayan folk song ang tema sa nahitabong ikatulo nga elimination round sa Sinulog Idol Season 10 niadtong Dominggo, Enero 13, 2019.

Ang usa sa mga garbo sa Talisay City nga si Queen Suzanne “Zane” Dugaduga mao ang nahimong Star of the Night sa maong round.

Gipakpakan pag-ayo sa baga nga audience sa Plaza Independencia ang iyang performance sa dihang gibirit niya ang iyang awit nga “Ngano Kaha”, nga orihinal nga gikanta sa kanhi Sinulog Idol finalist nga si Mariel Minglanilla.

“Lipay kaayo ko. Wala ko mag-expect nga ako ang mapilian sa kadaghan namo nga maayo karong gabhiona”, padayag pa ni Dugaduga.

Nakauban ni Dugaduga sa Top 3 sila si Jessa May Abaquita ug James Alfafara.

Daghan sab ang midayeg sa giawit ni Abaquita nga mao ang orihinal niya nga gikanta sa 2016 Cebu Pop Music Festival nga mao ang “Uyab Ta Pero Dili Ta Magsaba”.

Gikalipay sab ni Alfafara nga nakalingkawas na siya sa kalautan nga mataktak sa kompetisyon. Duha ka gabii nga sagunson nga nahimutang si Alfafara sa Bottom 3.

“Makaguol ang naa sa Bottom 3 ug feeling nako down kaayo ko, pero akong gipaningkamutan nga makabawi ko and being part of top 3 last night kay nalipay kaayo ko kay ako jud nahimo ang akong gipaningkamutan. Nagpasalamat kaayo ko og dako sa Ginoo kay safe ko”, saysay pa ni Alfafara.

Giawit ni Alfafara ang paboritong kanta sa Banat News’ Hugyaw Entertainment Editor ug usa sa mga hurado nga si Ryan Mark Borinaga nga “Pangandoy” nga orihinal nga giawit ni Daryl Leong.

Gani, tungod sa maayo nga performance ni Alfafara, pormal na kini nga gipasulod sa kompetisyon.

“I have to say that welcome to Sinulog Idol kay for two nights I’ve been telling you sa  backstage ngano man ka nga wa man kay ayo on stage. Kahibaw ko kung unsa ka nga singer. I’ve been telling you that nga di pwede nga matagak ka”, tambag ni Borinaga ngadto kang Alfafara

Ang Celebrity Vocal Coach nga si Jay Unchuan miingon nga lahi ang gipakita ni Alfafara sa maong gabii kun itandi sa unang duha sa gabii sa panagsangka.

Sa lahing bahin, natapos na sab ang kapalaran sa pambato sa Punta Princesa’s nga si Kyla Dizon sa Sinulog Idol.

Gitug-an ni Dizon nga wala sa maayong kondisyon ang iyang tingog. Niadtong buntag pa lang, gihilantan na siya og nakahunahuna sab siya nga dili na lamang unta nga mokanta.

“Pero akong gi-push kay this is a competition. I am here and I have to go for it whatever it takes”, suma pa ni Dizon.

Sa maong round, si Dizon lang ang natangtang.

Gipadayag ni Dizon nga pabilin siya nga mapasalamaton sa mga panghitabo sa iyang kinabuhi sukad nga nakasulod siya sa Sinulog Idol.

Gisaysay sab niya ang dako nga pagtulun-an nga iyang nakat-unan sa kompetisyon.

“I learned how to always have a strong heart. Though it’s very unpredictable but I always keep in mind that whatever happens, always trust yourself”, pagtapos ni Dizon.