Pokwang gusto na uling mabuntis
Mas masaya ang naging pagdiriwang ng Kapaskuhan ngayon ni Pokwang. Matatandaang ipinanganak ng komedyante ang supling nila ni Lee O’Brian na si Malia noong January. Ngayon lamang muli nakapagdiwang ng Pasko si Pokwang na kumpleto ang pamilya. “Twenty two years walang baby sa bahay. I mean ngayon lang uli kami nagkaroon ng baby after twenty two years. So exciting kasi di ba Christmas is for children. And si Malia first Christmas niya ito,” nakangiting pahayag ni Pokwang.
Ayon sa komedyante ay mas pinaghandaan niya ngayon ang Kapaskuhan para sa bunsong anak. “Gusto kong makita ‘yung reaction niya sa mga nangyayari sa paligid niya. At talagang binonggahan namin ang Christmas decoration this year for her. Kasi first Christmas niya,” dagdag ni Pokwang.
Samantala, sa susunod na taon ay maraming mga proyekto ang mga pinaghahandaan ni Pokwang para sa kanyang mga tagahanga. Halos dalawang taon ding namahinga ang aktres sa trabaho mula nang magbuntis hanggang ipanganak si Malia. “2019 magbubuntis ako ulit ha-ha-ha! Marami, may mga pa-concerts, pa-shows and mag-renew ako ng contract. Next year may mga pa-Valentine’s concerts, movies, indie films,” pagtatapos niya.
Dingdong gustong ipagawa sa anak ang mga hindi nagawa noon
Sobrang excited na ni Dingdong Dantes para sa ipinagbubuntis ngayon ng asawang si Marian Rivera. Lalaki ang magiging pangalawang anak ng mag-asawa. “Kasi kay Zia pa lang, parang lahat gusto ko nang ipagawa sa kanya, katulad ng mga musical instruments. Hindi man ako marunong sa iba, pero gusto kong i-explore niya lahat, pati sports. Pero ngayon, may kahati na siya sigurado sa mga hilig. ‘Yung mga hindi ko rin nagawa noong bata ako, gusto kong gawin din niya,” nakangiting bungad ni Dingdong.
Sa ngayon ay wala pang maisip sina Dingdong at Marian kung ano ang ipapangalan sa lalaking anak. “Ngayon for some reasons hirap na hirap kami mag-isip kasi maraming mga very meaningful names for us. So we’re really contemplating kung ano. Siguro by next year malalaman na namin,” pagtatapat ng aktor.
Samantala, ayon kay Dingdong ay mas hirap ngayon si Marian sa pagbubuntis kumpara noong ipinagbubuntis ang panganay na anak. “Kasi siyempre hindi madali ang pagbubuntis. Nakita ko how difficult it was with Letizia. In fact medyo mas mahirap na ngayon. Akala namin pareho lang ‘yung pinagdadaanan. Pati ‘yung hinahanap niya na mga pagkain sa akin. Dati wala namang kamias, ngayon may kasama ng Mangga at Kamias,” natatawang kwento ni Dingdong.
- Latest