Travel ambassadors

CEBU, Philippines – Mapasalamaton sila si Kathryn Bernardo ug Daniel Padilla gumikan kay usa na sila sa mga nahimong travel ambassadors sa Japan. Suma pa ni Daniel nga ang Japan mao ang usa sa ilang mga paborito nga lugar nga natikangan. Wala midetalye ang duha sa rason kun nganong napilian sila niini apan andam sila modawat sa gitanyag nga katungdanan nga gitugyan sa ilaha gikan sa Japan.

Christmas gift

Dako gyud ang utang kabubut-on sa child aktres nga si Rhed Bustamante ngadto kang Coco Martin gumikan kay mao kini ang hinungdan nga nakabalik siya sa showbiz. Isip pasalamat ni Rhed ngadto kang Coco, hatagan kini niya og painting karong Pasko.

Mikimoto crown

Base sa report sa Esquire Magazine , mobalor sa kapin sa $250,000 o P13.2 milyon ang gisul-ob nga Miss Universe crown ni Catriona Gray. Ang maong korona nga gitawag nga Mikimoto adunay  500 ka mga diamante nga adunay gibug-aton nga 30 carats. Dugang pa nga aduna kini 120 South Sea ug Akoya pearls.

Wedding vow

Gikasal na sila si Lotlot de Leon ug ang long-time partner niini nga si Fadi El Soury sa Batangas niadtong Lunes. Garden wedding ang ilang seremonya. Daghan ang nakahilak sa wedding vow nga gisaysay ni Lotlot ngadto sa iyang Lebanese partner. “There have been so many things that have happened to my life before I met you, which I have learned from. I was scared to really fall in love again, and to even allow someone to be part of my life. But you were just persistent. You didn’t want to let me be. And I thank you for that”, saysay pa ni Lotlot.

Pagklaro ni marco

Gitataw ni Marco Gumabao nga managhigala lang sila ni Janella Salvador. Pagtin-aw kini sa aktor human  mitakap ang hulagway ug video nga nagpakita nga nag-date silang duha.  Giklaro ni Marco nga aduna pa silay mga kauban nila nga mga higala niadtong higayuna .   Nangayo napud og pasaylo si  Marco ngadto sa ex-boyfriend ni Janella nga si  Elmo Magalona. 

Mibalik sa GMA

Mibalik na sa Kapuso network ang aktor nga si Raymond Bagatsing human sa pito ka tuig nga nagpahiluna sa laing network. Sa iyang pagbalik sa GMA 7, lakip siya sa drama series nga bidahan nila ni  Kylie Padilla ug Ruru Madrid nga “TODA One I Love”.

mugna ni paolo

Wala gyud palabya ni  Paolo Ballesteros  ang pagmugna pa og dugang  makeup transformation. Niining bag-ohay lang, gikopya niya ang dagway sa pambato sa Spain sa Miss Universe nga si Angela Ponce kinsa mikulit og  kasaysayan nga mao ang labing una nga transgender nga nakasulod sa Miss Universe pageant.

Reunion project

Gikalipay ni Kean Cipriano nga makauban pagbalik sa usa ka pelikula si Julia Montes. Ang duha maoy bida karon sa usa ka advocacy film nga nag-ulohan og “Hilom”. Ubos kini sa direksyon ni Brillante Mendoza. Matud pa ni Kian nga usa sa iyang gikamingawan nga maka-eksena mao si Julia mao nga nalipay siya pag-ayo nga mas daghan sila og eksena sa ilang pelikula karon. Unang nagkauban ang duha niadtong 2012 sa pelikula nga “The Reunion”.

Excited sa serye

Excited na karon si Gabby Concepcion sa iyang labing una nga romantic comedy nga teleserye sa Kapuso network. Gani, mas excited sab gyud siya tungod kay makauban niya sa labing unang higayon sila si Jennylyn Mercado ug Sheena Halili. Dugang pa, makauban sab niya dinhi ang kanhi Kapamilya child star nga si Kiray Celis..