PSN Showbiz

Extraordinary Beauty Queen

December 17, 2018 | 12:00am

CEBU, Philippines — Aktibo sa kalihukan ilabi na sa paugnat sa kusog, apan kinsa ang magtuo nga sama niya nga lakin-on mao ang mahimo nga maayo nga dalaga nga morampa sa ibabaw sa entablado.

Kini ang istorya sa 18 anyos nga nahimong Miss Alegria 2018 nga si Erika Faith Emnace Veloso.

Nagtuyok ang kalibutan ni Erika sa sports. Matud pa niya nga usa siya ka kanhi varsity player sa volleyball sa University of Cebu-Main niadtong Junior High pa lang siya.

Niadtong 2016 lang, mibalhin siya og lain na sab nga sport ug mao kini ang Karatedo.

Dili lang kana ang angay nga ikapanghambog sa rayna sa Alegria gumikan kay maayo sab siya nga moduyog og gitara, beatbox ug ukulele.

Gawas sa iyang mga talento, aduna pu’y humok nga kasingkasing si Erika kinsa matibangon kaayo sa iyang isigkatawo.

“I am part of San Jose Maria Escriba Youth sa Deca Homes Tungkil, Minglanilla. Then at the same time nag-serve pud ko every Sunday sa Corner Stone sa Banawa Elementary School with CFC and UC-Pri SHS Friends for English Reading and Writing tutorial sa mga bata nga medyo hinayon jud ana nga field”, saysay pa ni Erika

Matud pa ni Erika nga tim-os ang iyang intensyon sa pagtabang ngadto sa uban. Nag boluntaryo lang sila sa iyang mga kauban nga motudlo sa mga bata.

Dakong kalipay niya nga makatabang ug makatudlo sa uban sa pamaagi nga iyang nahibal-an.

“The spirit of volunteerism is different from being paid gyud. To see someone happy because of what you did is one of the best feelings. Nindot kaayo sa feeling makatabang ug makapalipay og tao. My father once reminded me na bahalag gamay ra og maatua basta ang important kay nakapalipay ka og tawo”, padayag pa ni Erika.

Bisan og busy si Erika sa iyang pagtuon ug sa iyang pagtabang ngadto sa uban, wala kini mahimong babag sa iyang pagka- working scholar sa UC-METC.

Human sa iyang klase sa private campus, motikang siya sa METC aron nga buhaton ang iyang katungdanan isip usa ka working scholar.

Duha ka tuig na siya nga nag-alagad niini. Sa unom ka adlaw sa usa ka semana, lima ka oras ang iyang igahin sa iyang trabaho human sa iyang klase.

Giangkon ni Erika nga ang bugtong sekreto maigo niya ang iyang mga gimbuhaton mao ang pagbalanse lang kanunay sa iyang oras.

“Time management lang gyud. Naanad na pud ko kay pag Grade 7 pa lang nag student-athlete pud ko ug ang akong klase kay 7AM-3:40PM ug 4PM-8PM kay training namo. Sauna, grabe lisod kaayo gyud kay di ko kabuhat usahay og assignments nya nigamay akong grades ato. Naay time na ganahan nako mogive-up pero I have to stand still and mopadayon gihapon og skwela though dili lang gyud ni para akong pagskwela pero para sab ni sa akong pamilya ug sa akong dreams na makahuman og skwela kay scholarship lage. You can really balance everything if you want to, willingness with the guidance of the Lord and my family kaya rakay tanan. Set priorities lang jud”, mga pulong pa ni Erika.

Bisan sa nagpapunsisok nga kasikas ni Erika matag adlaw, aduna pa siyay panahon sa uban pa nga kalihukan sama sa pagsalmot og beauty pageant.

Nagsugod siya sa pagsalmot og pageant niadtong Grade 9 pa lang siya pinaagi sa Search for Festival Queen .

“During Basic Education Days, my MAPEH teacher Mr. River did choose me as a representative sa among group. Siya gyud ang una nga nituo nako despite sa akong pagka- boyish,” suma pa niya.

Siya ang napili nga first -runner –up sa maong kompetisyon.

Natapos man ang kompetisyon apan wala matapos ang ilang paghinigalaay sa iyang co-candidate nga nahimong second runner up nga si Jewel Alexie Imagine Buot.

Tsika pa ni Erika nga si Jewel mao ang mitabang kaniya aron mahanas iyang pagrampa.

Gani, ang inahan ni Jewel nga si Mommy Sandy , niapil usab og tabang kaniya.

“Sila gyu’y ga –train nako in how to do proper walk and to have a good posture. Si Mommy Sandy mao ang nagtudlo nako sa Q&A. Naa gyud na permi sila,ug sila sauna ang always magpahulam nako og heels and other needs sa pageants”, suma pa niya.

Dili ra sab kahibulungan nga lig-on ang mentors ni Erika gumikan kay si Jewel nagikan man sa Stacy’s Modeling Management ug si Mommy Sandy nahimong kandidata kaniadto sa Miss Cebu.

Dako ang pasalamat ni Erika sa mga tawo nga nagpaluyo kaniya ilabi na ang iyang pamilya, higala ug sila si Jewel ug Mommy Sandy gumikan kay mao kini ang nagtuklod pa og maayo kaniya nga padayunon ang iyang karera sa kalibutan sa pageantry.

“I can easily talk, approach and deal with other people, and I’m also happy making my family proud with what I have achieved and what I am still doing in the present”, siya miingon.

Karon nga naangkon niya ang dakong titulo nga mahimong Miss Alegria, gipabuhagay niya nga dugay nga mituhop sa iyang hunahuna ang iyang kadaugan.

“Unexplainable, dugay kay ni sink in sa akoa na akoy nakadaog, it took me almost two days before ko nakahilak sa kalipay. Grasya kaayo ni because this is not for me, but this is for the people behind my achievement”, suma pa niya.

Karon nga aduna siya’y katungdanan sa Alegria, andam siya nga motabang ug mangunay sa pagpapatuman sa iyang adbokasiya kabahin sa pagpreserba sa kinaiyahan.

Dili usab niya pasagdan ang iyang pagtungha aron matapos niya ang iyang gitinguha nga kurso nga mao ang Civil Engineering.

Pagtapos pa ni Erika nga bisan sa kalisdanan ug sa nagtipun-og niya nga buhatunon, andam siya nga moalagad sa kutob sa iyang mabuhat.

FASTFACTS

Name: Erika Faith Emnace Veloso

Nickname: Ekang/Eka

Birthdate: November 16, 2000

Nationality: Filipino

Address: Balhaan, Alegria, Cebu

City Address: Tungkil, Minglanilla

Height: 5’6

Weight: 52kgs

School & Degree: Grade 12 STEM (Science Technology Engineering and Mathematics) – University of Cebu Private Campus – Senior High School