Nakasuway na gyud

CEBU, Philippines — Gitug-an ni Regine Velasquez-Alcasid nga dugay na gyud siya nga misuway nga mahimong guest sa show ni Vice Ganda nga “Gandang Gabi Vice” bisan og anaa pa siya nagpaubos sa Kapuso Network. Gikalipay ni Regine nga nakatungtong ug nahinayon na gyud ang dugay ra niya nga giampo nga makauban niya si Vice sa usa ka TV show.

Pangutana ni Lea

Usa ang Broadway Diva nga si Lea Salonga  sa nakapangutana  nganong  hangtud karon, wala pa nalakip sa listahan isip National Artist ang beteranang aktres nga si Nora Aunor. Lima ka dekada na nga naa sa industriya ang aktres ug matud pa ni Lea nga angayan na kini nga pasidunggan nga mahimong National Artist gumikan kay nakaangkon na kini og mga pasidungog sa international scene. “Why hasn’t Nora Aunor been honored with the National Artist Award? I ask sincerely, because, given her talent and body of work, I’m surprised it hasn’t happened yet, her previous troubles aside. Thanks”, post pa ni Lea sa iyang social media account.

Calum nia sa nasud

Miabot na dinhi sa nasud ang mipasikat sa awit “You Are The Reason”  nga si Calum Scott .Buot ug tuyo sa singer mao ang pagpahigayon sa iyang Philippine leg concert nga “Only Human Asia Tour”. Mahitabo ang maong konsyerto karong gabii sa New Frontier didto sa kaulohan.

Gisurpresa ang pamilya

Nakapundar gyud og balay ang Kapamilya star nga si Dimples Romana alang sa iyang mga mahal sa kinabuhi nga mao ang iyang inahan ug mga igsuon. Dakong kalipay ni Dimples nga nasurpresa niya ang iyang pamilya pinaagi sa balay nga iyang gitugyan niini. Matud pa ni Dimples gisultian lang niya ang iyang inahan nga adunay adtoan nga balay sa iyang kinugos apan mao na kadto ang hugna nga madala niya kini aron mapakita ang bag-ong balay nga alang sa iyang pamilya.

Carlo mag-concert

Wala magtuo si Carlo Aquino nga mohumot pagbalik sa masa ang iyang pangalan. Matud pa ni Carlo nga sagunson gyud ang mga proyekto nga iyang nadawat karon human nga nabanhaw ang ilang tandem ni Angelica Panganiban. Aduna pud  siya’y umaabot nga concert nga matud pa niya nga dugay na sab niya nga gipaabot. Sa maong concert, makauban niya si Matteo Guidecelli. Mag-ulohan kini og “Matteo X Carlo” nga mahitabo sa Music Museum karong November 17.

Dili manginlabot

Dili na manginlabot ang beauty queen maker nga si Jonas Gaffud sa lovelife ni Pia Wurtzbach gumikan kay matud pa niya dako ang iyang pagsalig niini kun unsaon pagdala ang  kinabuhi niini. Dugang pa ni Jonas nga aduna lang gyud silay gihimo nga kasabutan ni Pia. “Basta yung hindi lang maaapektuhan ang career, dun lang ako papasok. Pero hangga’t gusto nilang gawin yung gusto nila, fine”, suma pa ni Jonas.

Pribado lang

Giklaro ni Kiray Celis nga buot niya nga himuon nga pribado ang iyang lovelife mao nga dili siya ganahan nga mag-post og mga hulagway sa iyang boyfriend nga usa ka non-showbiz businessman. “Mas okay yung walang nangingialam, mas okay yung walang nakakaalam”, suma pa ni Kiray.

Giklaro ni Oyo

Nihatag og katin-awan si  Oyo Sotto kalabot sa usa ka anak nila ni  Kristine Hermosa nga si Kiel. Adunay netizen nga mikomento sa hulagway nga gi-upload ni Oyo nga matud pa nga anak sa laing lalaki ni Kristine si Kiel. Kalmado nga gitubag ni Oyo ang maong netizen. “Hindi siya anak sa ibang lalaki. Kiel is our adopted son”, suma pa ni Oyo.