Himamata ang “Addams Family”

CEBU, Philippines —  “Cebu theater is not dead”, pulong pa ni Jingle Saynes kinsa mao ang bida sa mosikad nga musical play nga nag-ulohang “The Addams Family”,  karong umaabot nga Oktubre 20 ug 21 sa SM Cebu Cinema 1.

Kining maong musical play ang usa sa magpamatuod nga buhi pa gyud ang Sugboanong teatro ug padayon pa nga nagmugna og kasikas dinhi sa atong lokalidad.

Hatod ang maong broadway musical sa Vaudeville Theatre Company kun VTC.

Nagbase ang maong pasundayag sa mga gipakita nga pasundayag sa mga international tour nga gibuhat sa mga nabantog nga international talent ug production nga mao ang Broadway.

Mutuyok ang istorya sa pamilya nga Addams  sa anak niini nga si Wednesday Addams, kinsa makabaton og mga bag-ong kasinatian inig tungtong niini sa pangidaron nga 18 anyos.

Maingon nga dili ordinaryo ang pamilya nga Addams gumikan kay dili sama sa sarang nga pamilya nga makita nato sa matuod nga istilo sa pagpakabuhi sa usa ka banay.

Ang maong pasundayag maghatag og kahadlok apan puno sa kalingawan sulod sa duha ka oras ug tunga.

Si Penelop “Penny” Ong mao ang artistic director sa maong lokal nga proyekto.

Gitug-an ni Ong nga buot niya nga ipakita sa tibuok kalibutan nga adunay ikabuga ang mga lokal nga performers dinhi sa Sugbo sa natad sa teatro.

“Cebu is so talented, but we lack schools, programs and training ground. We don’t have a proper theatre and the audience doesn’t really want to pay to watch a show. We lack support from the government and I fear that the industry won’t be sustainable”, padayag pa ni Ong.

Dugang pa ni Ong nga iyang adbokasiya mao ang paghatag og kaalam sa mga talentado nga mga Sugbuanon nga mapalapdan og samot ang ilang kaalam sa dula sa entablado.

“As for the artists, I hope to someday compensate them like professionals. I want to give Cebuanos an avenue to showcase their world-class talents. I don’t think we’re inferior when it comes to talent. It’s just that we aren’t given the chance and even the avenue to use it.

As soon as we have that opportunity, Filipinos, Cebuanos will shine,” si Ong nagkanayun.

Gibutyag ni Ong nga misantop sa iyang hunahuna ang mogama sa maong klase sa istorya gumikan kay talagsaon ang matang niini.

“Like Charlie Brown, I grew up also with the Addams. I like to do shows I grew up with. Charlie was one, and this [Addams Family] is one. And I like the spooky weirdness of the family because I’m weird myself,” esplikar pa ni Ong.

Gani, siya  sab ang nangunay sa mga international ug local nga mga musical play nga “You’re A Good Man, Charlie Brown”, “The Wizard of Oz”, “Mulan”, “Into the Woods”, “Dr. Seuss Seussical, Pinocchio”, “The Nutcracker”, ug “Peter Pan”.

Ang Addams Family mao ang ika-17 niya nga nagama nga proyekto isip usa ka direktor sa usa ka produksyon.

Gawas ni Ong, si Alfie Mosqueda ang stage director ug si Vince Gaton mao ang dance director niini.

Gipamatud-an sa tulo nga mahimong makatindog ug makasaka ang kalidad sa atong mga local talents kabahin sa teatro.

Sulod lang sa kapin sa lima ka buwan ang nahimong pagpangandam sa maong produksyon alang sa umaabot nga mga show niini sa karong Sabado ug Domingo. Nagsugod ang VTC sa pagpanawat og auditionees niadtong Abril lang ug napundok dayon sa maong production ang mga mipatigbabaw nga mga aktor nga nakapasar sa gipangita sa maong istorya.

Gilangkuban ang mga karakter nila ni Edison “Jingle” Saynes isip Gomez; Jeanette Lavilla isip si Morticia kinsa mao ang ginikanan ni Wednesday ug Pugsley. Sila si Rana Sai Lavador ug Alexandrea Mae Alix kinsa mao ang magpuli-puli sa karakter nga si Wednesday Addams; si Van Duke Gacayan ug Mark Stephen Cuizon mao ang magpulipuli sab sa karakter ni Lucas Beineke.

Si Tyler Axell Tolentino mao ang modala sa karakter ni Pugsley kinsa igsuon ni Wednesday. Si Clark Van Daryl Jolbot mao ang mahimong si Fester, ug si Tiffany Nerimao ang adunay pakwela nga karakter isip apuhan sa pamilya.

Sila si Kevin Reams mao ang mikumpleto sa pamilya isip si Lurch.

Ang karakter ni Mal mao ang hatagan og kinabuhi nila ni Oscar Vincent Silang.

Sila si Sunshine Atup ug Khristine Consuegra mao ang magpuli-puli sa karakter nila ni Alice Beineke ug Black Bride.

Dugang pa nga dili lang ang mga Sugbuanon ang gihangop sa maong production gumikan kay midawat sab kini og mga aktor nga nagikan pa sa Cagayan de Oro,Iligan, ug sa Ohio, United States.

Dakong kalipay ni Ong nga ubay-ubay pa gihapon ang nagpakita og interes ug pagmahal sa teatro gumikan kay maingon nga dili na kaayo kini aktibo sa industriya kon walay mangusog nga padayunon ang pagama niini.

Napamatud-an ni Ong nga buhi pa hangtud karon ang Sugbuanong teatro ug nagkinahanglan lang kini og mga magpaluyo nga mao ang mopalig-on sa pundasyon aron mas mahimo kining humot ug ilado sa atong komunidad.

Mapasundayag ang “The Addams Family Broadway Musical karong Oktubre 20 ug 21 sa SM City Cebu Cinema. Aduna kini upat pasundayag sa sulod sa duha ka adlaw.  Ug mao kini ang schedule sa show.