Bag-o na’g direktor ang Darna

CEBU, Philippines — Human sa lima ka tuig nga nangandam alang sa subling paglupad ni Darna, dili na si Erik Matti maoy mudirek sa nahisgutang pelikula nga pagabituonan ni Liza Soberano.

Ang pamahayag sa ABS-CBN nagkanayon nga naggumikan kini sa “creative differences” ug aron usab mahimo ni Matti ang iyang ubang pelikula nga ubos sa iyang kaugalingong film outfit nga mao ang Reality Entertainment.

Gipasalig hinuon sa ABS-CBN ug Star Cinema nga padayunon gayud nila ang paghimo pag-usab sa maong pelikula ug ipahibawo lang unya kinsay bag-ong direktor.

Niining bag-o lang, ni-tweet si Matti nga buot niyang muhimo og pelikula diin ang mga maglangkub niini seryoso ug mububo gayud og panahon ug kahago ngadto sa proyekto.

Gidayeg hinuon niya si Liza nga matud pa haom gyud sa maong iconic role ug nga seryoso gyud alang niini sanglit nipailawom gyud kini og training ingon man fitness exercises.

Kahinumduman nga si Angel Locsin gyud unta ang subling mulupad pinaagi sa maong Darna remake apan nakahambin siya og balatian sa iyang likod hinungdan nga gihulipan siya kang Liza.