Naa na’y signal ang Cebu Safari

CEBU, Philippines — Sa pagpadayon sa pagpalambo sa bag-ong kasuruyan sa Sugbo nga anaa nahimutang sa bukiran ug kinauyukang bahin sa lungsod sa Carmen nga mao ang Cebu Safari and Adventure Park, inanay na gipadaghan ang mga kahayupan nga mahimong mabisita sa mga langyaw ug sa atong mga kaigsuonan nga mahiligon sa ingon niini nga matang sa binuhat nga ginama sa Ginoo.

Sukad nga nabuksan kini sa publiko niadtong miaging tuig, ang kapin 2000 ka ektarya nga luna nga gipanag-iya ni Señorito Michel Jones Lhuillier maingon nga gamay pa gayud ang nasayod sa maong lugar apan ubay-ubay na ang mga nakadiskubre sab niining maong dapit tungod sa mga Sugbuanon nga nakatikang na niini.

Niining bag-o lang, pormal na nga gianunsyo sa Smart Communications, Inc. nga aduna nay mga natukod nga cell sites aron ang mga umaabot nga mga bisita sa maong dapit makahimo na nga makapahibawo sa tibuok kalibutan pinaagi sa social media kun unsa kaanindot ug unsa gyud ang madalit sa maong dapit.

Gibutyag ni Alex O. Caeg kinsa mao ang Senior Vice President For Customer Development sa Smart mipasalig ngadto kang Lhuillier nga kun mahiluna na ang mga cell sites sa nagkadaiyang parte sa maong dapit mas mapadali ang pagpakatap og impormasyon mahitungod sa kalambuan sa maong park.

“The intention is to bring Safari in Visayas get closer to all parts of the world. Yes it is a still business but for every person who would come to Cebu and visit this wonderful place, it is one way of being the channel to advertise what Cebu Safari has to offer”, suma pa ni Caeg.

Karon, mas mapadali na ang pagpabuhagay sa mga hulagway ngadto sa internet ug mas makadani pa kini sa tanan nga makakita niini sa internet.

“Nothing beats an adventure where you can take a selfie and upload it right away and get comments from your friends,” suma pa sa Provincial Distributor sa Smart nga si Anthony Ting.