Nahusay ra

Nalambigit matud pa si Gilas Pilipinas player Terrence Romeo og kagubot gawas sa usa ka bar kagahapon. Apan gitataw sa basketball star nga wala siya’y gibuhat nga daotan. Gibutyag  hinuon niya nga nahusay ra sila sa tawo nga iyang nakasungi.

Wala kauyon

Wala mahimuot  si Kristoffer Martin sa ubang netizens nga  bastos kaayo mopadangat og pangutana kaniya.  Matud pa niya nga wala na siya kasabot sa panghunahuna sa ubang tawo nga dili kahibalo morespeto sa ilang isigkatawo.

Bahala’g single

Kontento na ang 28 anyos nga aktres nga si Andrea Torres sa iyang pagka-single.  Matud pa niya nga dili na angayan pangitaon ang perfect guy alang kaniya gumikan kay maabot ra kini sa saktong panahon. “Ano naman ako, e, hindi ko naman ugali maghanap,” suma pa sa aktres.

Major project

Ang seryeng Ang Pamilyang Roces maoy first major series ni Jasmine Curtis Smith sa GMA-7. Kahinumdoman nga nipirma og kontrata si Jasmine sa GMA-7 niadtong Abril human kini nibiya sa TV5.

Gloria balik-kapuso

Human sa walo ka tuig nga pag-istar sa ABS-CBN, mobalik paglugwa sa GMA-7   si Miss Universe 1969 Gloria Diaz.  Malakip si Gloria sa Kapuso series nga Ang Pamilyang Roces nga gibituonan nila ni Carla Abellana, Gabbi Garcia, Rocco Nacino, Christian Bautista, ug Reina Hispanoamericana 2017 Winwyn Marquez.

Patay nga buhok

Matud pa ni Sue Ramirez nga patay na  ang iyang buhok hinungdan nga gipamub-an niya ang style niini. Gibutyag kini  ni Sue gumikan sa nagkalain-laing interpretasyon sa ubang tawo kalabot sa pagpamubo sa iyang buhok.

Mag-shoot sa abroad

Sa Amsterdam ang lokasyon sa pipila ka mga eksena sa pelikula nila ni  Kathryn Bernardo ug Daniel Padilla nga The Hows of Us.  Suma pa sa duha nga angayan atngan ang maong proyekto diin modala sila sa karakter nga mag-uyab nga sila si Primo ug George.

Pakaslan ni Joshua

Target ni Joshua Garcia nga pakasalan niya si Julia Barretto, 10 ka tuig gikan karon.  Dili na gyud mabangbang ang nagpungasi nga relasyon sa duha. Kasamtangang gi-promote nila ang pelikulang  I Love You Hater.

Engaged na

Malipayong gipahibalo sa kanhi PBB housemate nga si  Cora Waddell nga engaged na sila sa iyang non-showbiz boyfriend nga si  Terence Lloyd.  Nailhan si Cora sa kadaghanan isip model  ug vlogger.

Future baby

Tsika pa ni Liza Soberano nga duna na siya’y giandam nga pangalan kon ugaling makabaton  na sila og anak ni Enrique Gil.  Matud pa niya panganlan niya ang future baby og   "Enrique" kon lalaki kini, samtang "Enriqueta" kon babaye.

Mikatawa lang sa intriga

Gikataw-an lang ni  Rhian Ramos ang taho nga nag-link sa iyang pangalan ngadto sa ubang mga aktor partikular na nila ni JM de Guzman ug  Jolo Revilla . Wala na’y panahon si Rhian nga mopatol pa sa maong intriga.  Bag-ohay nagkabuwag sila si Rhian ug sa negosyante nga si Jason Choachuy.