Beautiful Friday #PassionforMakeup

FAST FACTS

Name: Janice Barillo

Address: Avida Tower 1

Birth date: January 3, 1980

Facebook Account: Janice thebeautyfairy

Email Add: [email protected]

Pipila sa mga tawo ang nagtuo nga bayot ang kasagaran nga mga make-up artist.

Sanglit matag beauty pageants, wedding events, debut ug uban pang mga selebrasyon nga nanginahanglan og pag-paanyag, sila man ang kanunay natong makita.

Si Janice Barillo maoy usa sa mga mibuak sa naandan natong kasinatian sa mga make-up artist.

Matud niya, isip usa ka babaye, dili sab lalim ang iyang naagian sa hingpit niyang pagsud sa kalibutan sa pag make-up.

Apan bisan pa man niini, dako gihapon ang iyang bilib sa mga bayot nga mga make-up artist.

"Actually to be honest wala gyud koy na feel nga competition nila. But I always feel intimidated kay they are born artist gyud. Given gyud nga talented gyud na sila. Infact aside from the learnings I got from makeup artistry school, naka -learn ko og makeup techniques gikan nila. Mga shortcuts nga mga make up techniques," pagpaambit ni Janice.

Kapin sa lima ka tuig na siyang make- up artist ug matud pa niya, nagsugod ang tanan sa kauluhan.

Usa ka adlaw niana niadto siya sa Ortigas sa Manila arun magpa-enroll sa pole dancing class ug samtang naghuwat huwat sa oras, nagbasabasa una siya og mga brochure ug usa sa nabasahan niya mao ang Maquillage Professionell Makeup Artistry.

Sa maong higayun, misantop sa iyang hunahuna nga pwede diay'ng ma-eskwelahan ang pagmake up ug sa diha diha iyang gitawagan ang numero nga napatik sa maong brochure ug didto siya mipadayag nga mo- enroll siya sa basic personal make- up class.

Apan gipugos siya sa receptionist sa maong make up class nga kinahanglang pro make-up class ang iyang kuhaong kurso, ug tuod man mao gyud kini ang nahitabo.

Human sa iyang pagtungha sa kaulohan, mibalik siya sa Sugbo bitbit ang iyang kaalam nga nakuha sa pro make-up class.

Apan sa pagsugod, naglisod una siya sa pag-establisar sa iyang pangalan ug sa iyang pagkamake- up artist sanglit wala man kaayo siyay nailhan dinhi sa Sugbo nga mga tawong nalakip sa industriya nga iyang gilangkuban.

"I didn’t know somebody from the wedding industry. I almost sold my makeup arsenals kay mo-work nalang unta ko. After six months of contemplating if I need to give up or not, that was when I remembered that I have a friend nga ang iya mga kids kay models ni sir Dexter Alazas. Fortunately Sir Dex at that time saw my works for Bea Gomez and Louise Gomez, he asked me if I can do his other models' makeup, I said YES without any shadow of a doubt. I’m always grateful that sir Dexter took me in and introduced me to this industry and the rest is history,” saysay pa niya.

Sa mga nakalabay'ng panahon, dili na sab maihap nga mga personalidad ang iyang napaanyag.

Pipila niini mao silang Miss World New Zealand 2014 Miss Arielle Garciano; Miss Amanda Chan nga usa ka finalist sa Asia's Next top Model; Miss Cristalle Bello nga anak sa giisip sa kadaghanan nga Doctor to the stars nga si Vicky Belo; Miss Earth Equador, Miss Kath Espin; Xander Eusebio sa My Korean Jagiya; ug lakip sab ang Cebuana singing sensation nga si Karencitta.

Dugang pa niya, ang iyang dakong inspirasyon sa iyang pagka-make-up artist mao ang iyang mga kliyenteng walay puas nga misalig sa iyang katakos isip make- up artist.

Gipaambit usab ni Janice ang iyang dakong pag- idolo sa mga nabantog nga mga make- up artist sa kalibutan nga silang Nong Chat sa Thailand, Fady Kataya, Pat McGrath ug Mario Dedivanovic.

Matud sab niya, nakaingun siya sa iyang kaugalingun nga hingpit na gyud siyang nahimong make-up artist sa dihang confident na siya mo handle og mga nagkadaiya niyang mga kliyente sanglit niadtong nagsugod pa lamang siya, dili  niya malikayan nga makulbaan siya.  Apan gawas sa iyang pagka make-up artist, usa usab siya ka certified microblading artist ug nagpahigayun sab siya og lash lift services.

Ug kon kaniadto siya maoy mitungha arun makakat-on siya sa pagpangarte, mapasigarbuhon niyang gipaambit nga siya na sab karon ang nagpahigayun og make-up workshops sa mga tawong gustong mahibalo niini.

Gipaambit sab niya ang usa sa mga dili niya malimtang kasinatian sa pag make-up ug kini mao ang gipalupad siya sa bride didto sa France arun maoy mopaanyag sa kaslonon atol sa iyang wedding day.

Sa kasamtangang panahon, gihulagway ni Janice nga left and right ang iyang bookings sa wedding events.

Mapasalamaton siya og dako nga nahimo siyang make- up artist tungod kay kon dili tungod niini, dili siya makatuyok sa mga nagkadaiyang lugar sa nasud ug sa kalibutan.

Tungod usab niining iyang propesyon, nakahimamat siya og mga celebrities ug mga nagkadaiyang personalidad nga mga tinahud sa nasud.

Ug labaw sa tanan, ma "express" niya ang iyang gibati pinaagi sa pag make-up. - Jaypee Pleños Lao