Sinulog Idol: Life-changing events of KC

CEBU, Philippines — “Life-changing. Nausab gyud totally ang akong pagkaako. Tungod sa Sinulog Idol kay mas na strong sab akong personality”.

Ingon niini ang paghulagway sa nahimong ikaunom nga Sinulog Idol ug miyembro sa trio singing group nga “Maka Girls” nga si Kristina Cassandra Dilao kinsa mas ilado karon sa iyang alyas nga KC.

Ang 22 anyos nga dalaga mipabuhagay dinhi sa Banat News Hugyaw nga dako gyud og nahimong kausaban sa iyang kinabuhi sa dihang natugyanan siya sa dakong titulo isip  Sinulog Idol nga iyang gihuptan sukad pa niadtong 2015.

“Sa wala pa ko nahimong Sinulog Idol kay simple ra gyud kaayo ko. Dili ko kamao mangarte ug manggiuwawon kaayo sa tanan. Naa gyud koy stage fright kay sa una kanang ingnon lang ko nga pasak-on ko og stage kay mohilak na dayon ko”, suma pa ni KC.

Tungod sa Sinulog Idol, inanay nga nawala ang iyang pagka-manggiuwawon nga moatubang sa daghang tawo.

“Sa tinuod, ni-boost gyud ang akong confidence. After ko nakadaog kay didto sab ko mas naka-appreciate sa gihatag nga talent sa Ginoo nako unya na-discover nako nga kaya ra man diay nako ang mga gikahadlukan sauna”, matud pa ni KC.

Wala sab gyud damha ni KC ang maong kadaugan nga iyang naangkon .

“Wala man gyud koy experience sa mga singing contest mao nga pag-announce gyud nga ako ang nakadaog kay nakapangutana pa gyud ko sa akong kaugalingon nga ‘Grabe, tinuod ni?’ kay ang tuo man gud nako nga basin gadamgo pa gihapon ko ba mao nga dili gyud ko makatuo gyud ato mga panahuna”, padayag pa ni KC.

“Ikaduha ang Sinulog Idol sa mga kompetisyon nga iyang nasalmutan. Ang una mao kadto ang Little Big Star Cebu sa dihang nagpangidaron pa siya og 10 anyos.

Matud pa ni KC nga dili gyud siya sama sa iyang mga co-finalist nga daghan na og mga kasinatian kabahin sa pagsalmot og mga kompetisyon mao nga nangangha gyud siya sa mga panghitabo atol sa grand finals.

“Daghan sab gyud ang miingon nga dili gyud sila makatuo nga ing-ato ko mo-perform on stage kay sa trainings, naa ra ko suok. Magsigi ra ko og memorize sa lyrics kay wa man kaayo koy pundo. Dili gyud ko anad og singing contest ba”, pulong pa ni KC.

Sa pagbalik-tan aw pa ni KC sa iyang mga kaagi sa Sinulog Idol, maingon sab ni KC nga dili lalim ang iyang gitaak nga agianan aron makab-ot niya ang maong kalampusan.

“Day 1 pa lang, makaingon na gyud ko nga mataktak nako. Grabe kaayo ang akong struggles kay kato pa lang sa Abellana, wala ko ga-expect nga bongga diay ang audition, unya ako kay nagpang-uran ra ko, mura ko og manulong og volleyball sa akong gisul-ob. Pero laban lang ko, bahala na gyud”, asoy pa ni KC.

Mahimuot sab nga maghinumdom si KC sa dihang nabalaka  siya pag-ayo sa dihang nahitabo ang elimination round nga didto gipahigayon sa Cebu City Hall kun diin naguba lang og kalit ang iyang sandals nga gamiton.

“Naliki ko kay naguba akong sandals. Kana laging dili ko performer niya manguha ra og sandals nga dugay na kaayo nga wala  gigamit. Hapit nako mokanta niya namalit pa mi og mighty bond”, saysay pa niya.

Sa maong higayon, nangayo gyud og paggiya si KC nga unta maayo ra ang dagan sa iyang performance.

“Nag-ampo gyud ko nga mayta di ko pasayawon. Pero si Coach Apple (Abarquez), kay niana man nga mokanta og Crazy In Love. Bahala na gyud nga nagkaguba-guba akong sandal basta laban lang gyud ko,” nagkatawang gisaysay niya.

Dakong pasalamat ni KC nga nakalahutay siya sa maingon niya nga dakong pagsuway nga iyang nasinati sa iyang Sinulog Idol journey.

“After all, it was a rollercoaster ride. Dili man gud siya informal nga singing contest mao nga maka-feel gyud ka og pressure ba. Grabe ang emotional trainings namo before nga maabot nako sa punto nga makapangutana ko sa akong kaugalingon nga “sakto ba gyud kaha ni akong gisudlan no?”, padayag ni KC.

Sa katapusang gabii sa kompetisyon, gibuga na ni KC ang tanan niya nga mahimo apan kanunay nga mosantop sa iyang hunahuna ang mga positibo nga mga pamulong nga agi og pagdasig gikan sa iyang anhing amahan nga si Edwin Dilao.

“I always think positive basta naa koy ma-feel nga negative vibes kay ako lang gyud na ibali to positive kay mao man na ang gipa-remind sa akong papa. Kato sab nga time nga nakaingon ko nga “Let it be.” Kay kung para sa ako, para gyud siya nako. Kung di kay okay ra sab kay ang importante kay naka-experience ko aning butanga. Ang experience sa pag-apil sa Sinulog idol kay dili gyud mabaylo ba”, siya nagkanayun.

Human sa Sinulog Idol, wala damha ni KC nga inanay na niya nga makab-ot ang iyang pangandoy nga makatungtong sa entablado sa Cebu Coliseum.

“Damgo gyud na nako pagkabata nga maka-perform ko sa Cebu Coliseum kay akong parents kay puro mangantahay. Nag-compete sila sauna sa Cebu Pop Music Festival. Ako ra gyu’y tig-picture, tigdala sa ilang sinina, tig-support nila basta moapil sila sa Cebu Pop sauna”, matud pa sa singer.

Tuig 2016 sa dihang nahitabo gyud ang maong gipangandoy ni KC nga makatungtong sa samang entablado nga gibarugan ug gipasundayagan sa iyang mga ginikanan. Gani, nabali na ang maong sitwasyon gumikan kay siya na mao ang nahimong interpreter ug ang iyang inahan mao ang nahimo niya nga back-up singer.

“#Feeling blessed. Pagtungtong na gyud nako og Cebu Coliseum nakaingon gyud ko nga “This is it!”, suma pa ni KC.

Ang maong pagtaak ni KC niadtong 2016 nasundan na sab kini niadtong tuig 2017 sa dihang nahimo siya nga usa sa mga interpreter sa naglanog-lanog na karon nga awit nga nag-uluhan og “Gugmang Maka”.

Ang maong awit nahimong grand champion ug ang iyang hugpong mao ang nahimong Best Interpreter sa maong kompetisyon.

Nagsunod-sunod na ang mga kahigayunan nga miabot kang KC human sa pagsalmot sa Maka Girls sa Cebu Pop. Gani, sila mismo ang mipailaila niini didto sa kauluhan sa dihang miapil sila sa Pilipinas Got Talent.

Dakong kahigayunan na ni KC ang masulod sila sa semi-finals. Dako sab ang iyang pasalamat sa iyang co-Maka girls sa kanunay nga pag-inunungay nila sa tagsa-tagsa nila ka mga kasinatian samtang nagdagan ang kompetisyon.

Alang kang KC, ang tanan nga kalampusan nga iyang naangkon karon nagsugod lang kini sa dihang nakadesisyon siya nga motikang sa lawak kun diin gipahigayon ang audition sa Sinulog Idol.

Didto, nagsugod pagdagan ang maayong mga panghitabo sa iyang kinabuhi nga kanunay gyud niya nga itago sa kinauyukang bahin sa iyang kasingkasing.