Embracing her best version

CEBU, Philippines — Ipaagi na lamang sa pagkanta ang pagpadayag sa buot nga ipaambit sa 21 anyos nga si Justine Mae Mantua kinsa nahimong 5th Placer sa nahitabong Sinulog Idol Season 9.

Si Justine kinsa mas naila na karon isip Jazzy mipabuhagay nga dako og natabang ang musika sa iyang kaugalingon.

“Music or singing really changed my  life. Ako man gud nga pagkatao kay dili jud ko expressive kaayo sa akong gibati. May pagka-introvert man gud ko. But when it comes to singing, dali ra ko ka-express sa akong gibati”, suma pa ni Jazz.

Matud pa ni Jazzy nga naandan sab niya kaniadto nga magsuwat og kanta kun aduna siya’y gusto nga ipadayag sa higayon nga bation siya og kaguol, kalipay ug kun aduna siya’y makita nga inspirasyon.

Karon, mas pokus na siya sa pagkanta tungod kay matud pa niya, mas kampante na siya nga mopadayag pinaagi niini.

“When I sing, mobaga akong nawong sa stage. I put my own style sa akong song kay ang akong goal nga everytime I sing, I want to deliver the message of the song and sing with all my heart. Mas ganahan ko nga through the song, I can communicate sa mga tawo nga naminaw nako”, pulong pa pa ni Jazzy.

Gitug-an ni Jazzy nga manggiuwawon gyud siya nga pagkatawo. Maingon nga lahi gyud ang iyang personalidad kun anaa ug wala siya sa entablado.

“Bisan nga manggiuwawon ko in person, ganahan ko when I sing kay maka-connect ko nila”, suma pa niya.

Sa pagsugod ni Jazzy sa iyang pagmahal sa pagkanta, matud pa niya nga ang iyang inahan mao ang unang nakadiskubre niini sa dihang nagpangidaron siya og 3 anyos.

“Na-discover nila kay magsige daw ko og dungan og kanta sa akong mama unya kay magsunod-sunod pud ko og kanta sa mga commercial ato”, suma pa niya.

Maingon nga unang magtutudlo niya sa pagkanta mao ang iyang inahan apan sa dihang anaa na siya sa saktong pangidaron, gipaubos siya og voice lesson didto sa Manila sa makadiyot lang sa dihang didto pa sila namuyo.

“Gipa-voice lessons ko nila mama ug papa kay para mabaid  lang gyud ang akong confidence ug mawa na akong kauwaw mo-perform sa stage,” hirit pa niya.

Karon, dili pa kaayo tanto, inanay na nga nabaid ang kompyansa ni Jazzy pinaagi sa pagkanta gikan sa mga imbitasyon nga iyang mga madawat gikan sa iyang mga higala kun adunay mga event nga mahitabo.

Sama na lamang sa iyang pagsalmot sa Tawag Ng Tanghalan sa It’s Showtime niadtong Pebrero 2016.

“First time nako mobyahe nga ako ra usa unya wala pud akong parents didto para kuyugan ko. First time nako malayo sa akong family ug friends”, siya miingon.

Dugang pa nga ang usa sab sa mga dako nga kompetisyon nga dili gyud niya mahikalimtan mao ang pagsalmot niya sa Sinulog Idol tungod kay daghan gyud siya og natigom nga mga pagtulun-an nga makat-on niya tungod lang sa talento sa pagkanta.

“Naka-realize ko og maayo kung unsa ko kasuwerte nga gihatagan ko ni God ani nga talent nya ka-realize pud ko to be kind always kay wa jud ta kahibaw og unsa ang giagian sa usa ka tao. Naka-realize sab ko nga always embrace changes kay whether its good or bad, makat-on man gihapon ka ana. I also learned that character/attitude is the most important thing para sa mga artist or performer kay kung bisan unsa paka kamaayo mukanta or mu-perform pero imong attitude kay bati, birahon ka ana paubos ug maglisod naka’g kuha sa trust sa uban tao”, esplikar pa ni Jazzy.

Giangkon ni Jazzy nga nausab sab gyud ang iyang tumong sa iyang pagsalmot sa Sinulog Idol tungod kay matud pa niya nga una nga misantop sa iyang hunahuna mao ang pagpamatuod kun asa lang kutob ang iyang katakus ug kun asa siya dad-on sa iyang pagkanta.

“Dako kaayo og impact ang Sinulog Idol sa akong life kay daghan ko og nakaila ug they helped me mold myself and I think karon kay naa ko sa akong best  version sa akong self tungod sa akong journey sa Sinulog Idol. Thankful kaayo ko sa tanan tungod kay tanan nga akong nakaila kay mao gyud ang nag-made up sa best version sa usa ka Justine Mae Mantua”, pagtapos pa ni Jazzy.