Mo-focus sa webseries

CEBU, Philippines – Ang local actor nga nadisgrasya nga paingon sa shooting  nga si James Ezekiel   nipadayag  nga  gusto na siya nga maka-move on sa nahitabo kaniya busa  dili na siya mohatag og lapad  pa nga komento.

Wala na’y plano  si  James nga mopadayon pa sa pelikulang “Jacqueline Comes Home” nga ubos sa direksyon ni Carlo J. Caparas.

Kahinumdoman nga sa miaging adlaw, nadisgrasya  siya sa Naga  samtang nagmaneho siya sa iyang motor sa dihang  padulong siya Carcar City alang sa shooting sa maong proyekto.

“Ganahan nako nga mag-move on ug dili nako ganahan nga modako pa ang isyu,    ug gusto nako nga mo-focus sa  akong umaabot nga webseries,” matud pa ni James.

Makauban ni James sa iyang webseries  si Badidi Labra,  ug nagpanikad na siya niini sanglit i-release na kini sugod karong buwana.

Gitataw hinuon niya nga  ma--delay gamay  ang pagpadayon sa shooting sa maong webseries  gumikan sa mga pangos nga iyang nahiagoman.

“Basta makalingaw gyud siya,  ang peg niya kay romantic comedy.  Ang story kay usa si  Badz sa makapausab sa akong kinabuhi,” matud pa ni James.

Gawas sa webseries ,   kasamtangan usab nga gigama ni  James ang usa ka international action film.

Dili pa mohatag si  James sa  detalye sa maong proyekto sanglit wala pa kini working title   apan dakong garbo alang kaniya nga malakip sa usa ka international project.

“Gawas sa acting projects, duna pud mi mga endorsement nga kabisihan namo ni Badidi,”  panapos pa niya.