Matinabangon nga Anne

Nakatigom og  P500,000 nga donasyon si Anne Curtis alang sa mga bata sa Marawi sa dihang nisalmot siya sa  London Marathon alang sa  UNICEF Philippines. Dugangan niya ang maong kuwarta  busa  moabot na ngadto sa P1,014,498 ang iyang ihatag alang sa mga bata nga  naapektuhan sa giyera sa Marawi.

Nakatabang sa career

Gikataw-an lang ni Michael  V ang iyang  mga kritiko nga nanaway sa  iyang mga komedya.  Matud pa niya nga tipik ang iyang mga kritiko sa nagpadato kaniya. Dugay na ang komedyanteng aktor sa industriya busa naanad na sa  mga isyu.

Vice nag-agi og depresyon

Giangkon  ni  Vice Ganda nga nakasuway  na siya og grabeng depresyon ug maayo nalang gani  nga iyaha gyud nga nakontrol ang pagsagubang niini. Dunay oras nga makaingon siya sa iyang kaugalingon nga daghan siya og kuwarta apan dili siya malipayon.

Hilomon apan hugyaw

Nakadayeg pag-ayo si Lovi Poe sa ka-partner niya sa seryeng The One That Got Away nga si  Dennis Trillo gumikan sa lahi nga labok niini nga pag-arte. Matud pa niya nga hilomon si  Dennis apan wala gyud kini labad katrabaho.

Inspirasyon ni Jairus

Dihang natapos ang love team nga Jairus Aquino ug Sharlene San Pedro, gipakita sa nahiuna ang  inspirasyon niya karong panahona.  Gi-post ni Jairus sa Instagram ang hulagway niya diin kauban niya ang non-showbiz girl nga maoy nagpapitik sa iyang kasing-kasing.

Pokwang balik-trabaho na

Nibalik na sa pag-arte  ang komedyanteng aktres nga si Pokwang   ug molugwa siya sa umaabot nga Mother's Day episode sa "Maalaala Mo Kaya.   Kahinumdoman nga nipahuway sa showbiz og  pipila ka buwan si Pokwang  gumikan sa iyang pagpanganak.

35th anniversary

Malipayon ang singer nga si Zsa Zsa Padilla gumikan kay nitungtong na siya sa ika- 35 nga tuig sa industriya.    Saulugon niya kini pinaagi sa iyang concert nga "The Best Day of My Life" karong  May 11 sa Newport Performing Arts Theater - Resort World Manila.

Livelihood project

Aktibo  si  Ricky Reyes sa pagtabang sa mga kabos. Usa sa iyang gikabisihan karon mao ang iyang  livelihood project alang sa mga tawong nanginahanglan niini. Katambayayong ni Ricky sa maong proyekto ang  Technical Education and Skills Development Authority (TESDA) ug  National Housing Authority (NHA).

Gimingaw na sa amahan

Emosyonal si  Ysabel Ortega kung hisgotan ang iyang amahan nga si Lito Lapid. Una na niya nga gibutyag nga wala na sila nagkita sa iyang amahan.  Giangkon niya nga gimingaw na siya niini ilabi na nga wala gyud kini katambong sa iyang birthday.

John, Kapuso na!

Mipirma na og kontrata si John Estrada sa GMA-7 niadtong Miyerkules.  Malipayon siya gumikan kay gihangop sa GMA executives ang paglayat niya sa maong istasyon.  Una na nga naintriga nga nitikang si John sa GMA-7 human gipatay ang iyang karakter sa The Good Son sa ABS-CBN gumikan sa away nila ni Myle Dizon.