Naglain ang lawas

Nangayo og pasaylo si Janella Salvador sa grupo sa iyang fans nga nagtangag sa pangalan nga Titas of ElNella human nga wala siya makatambong sa giandam nga surprise birthday party alang kaniya niadtong Domingo. Nasayran nga pipila sa iyang followers ang nagyawyaw sa gibuhat ni Janella. Matud pa niya nga nasakitan siya sa iyang mga nabasahan sa Twitter. Mi-esplikar sab si Janella nga wala sa kondisyon ang iyang lawas ug gikinahanglan pa niya nga mopahuway.

Naglisod og let go

Giangkon ni Aiko Melendez nga naglisod gyud siya sa paghatag og kinabuhi sa karakter niya isip Matadora sa  ‘Bagani’ gumikan kay lisod gyud mawala sa iyang sistema ang iyang pagka-Emilia Ardiente sa Wildflower kaniadto. Taud-taud sab nga gihuptan ni Aiko ang karakter ni Emilia mao nga hangtud karon anaa gitabangan pa siya sa iyang direktor aron hingpit nga mapapas ang dili gyud niya mabuhian nga karakter sa ‘Wildflower”.

Excited modagan

Excited na si Anne Curtis-Heussaff nga modagan sa London Marathon karong semanahuna. Ang maong marathon motabang aron sa pagtigom og pundo sa UNICEF Philippines diin lakip si Anne sa mga ambassador niini.

Direk Dan ang mogama

Si Dan Villegas ang direktor sa upcoming movie nila ni Angelica Panganiban ug Carlo Aquino sa Star Cinema. Naghinam-hinam na ang duha sa ilang reunion project gumikan kay makauban nila si Direk Dan.

Cover girl sa mode

Wala man makadaog si KZ Tandingan sa ‘Singer 2018’ didto sa China apan giuwan gihapon og kahigayunan ang Kapamilya singer nga makaposing sa sikat nga magazine sa maong nasud nga ‘Mode Magazine’. Mao kini ang unang higayon sa singer nga mahimong cover girl sa usa ka magazine.

Vlogger of the year

Midaog sa ‘Shorty Awards’ sa New York City isip ‘Vlogger of the Year ang Youtube vlogger nga si Wil Dasovich. Si Wil ang nilabaw sa lima ka mga vlogger nga iyang nakatigi sa maong kategorya nga gilangkuban nila ni Alex Wassabu, Jason Nash, Scotty Sire, Todd Smith ug iJustine.

Uyon si bro

Nagmalaumon si Rodjun Cruz nga unta magkadayon na si Janine Gutierrez ug iyang manghud nga si Rayver Cruz. Kasamtangan nga nag-date ang duha ug matud pa ni Rodjun nga  adunay puruhan nga magkauyab gyud kini puhon tungod kay nakita niya nga pareson gyud kini sa usa'g-usa.

Nabunyagan na

Nabunyagan na ang anak ni Lee O’Brien ug Pokwang nga si Baby Malia niadtong Domingo sa simbahan sa Antipolo, Rizal. Nibarog isip ninong ug ninang ang mga higalang komedyante ni Pokwang  nga  sila si John Prats, Eugene Domingo, Pooh, Chokoleit ug K Brosas.

Mi-donate og artificial leg

Mi-donate og artificial leg ang managsuong Jeron ug Jeric Teng sa usa ka 14 anyos nga nabaldado nga si Jiero Samson. Sama nila ni Jeron ug Jeric, gikahiligan sab ni Jiero ang magduwa og basketball apan naligsan kini sa usa ka truck niadtong 9 anyos pa lang kini mao nga naputlan kini og tiil. Dakong pasalamat ni Jiero tungod sa pahalipay nga gihatag sa managsuon ngadto kaniya tungod kay adunay dakong puruhan nga makabalik siya og duwa og basketball.

Nagmini-concert

Dos anyos pa lang ang anak ni Marian Rivera ug Dingdong Dantes nga si Zia Dantes apan nagpakita na kini og sinyales nga mosunod sa tunob sa iyang mga ginikanan. Sa video nga nikatap na karon sa social media, nagpakita nga nagpahigayon og mini-concert si Zia atol sa intimate gathering nga gitambungan sa iyang ginikanan. Gikanta ni Zia ang “Bahay Kubo,” “How Far I’ll Go” ug “Skidamarink” nga maoy nilingaw sa mga bisita.