Angel’s mission

CEBU, Philippines — Tanang mga binuhat sa kalibutan dili gyud makaikyas sa mga pait nga mga kaagi sa kinabuhi. Tanan, moagi og pagsuway, kalipay, kasakit, kahimayaan, kadaugan ug kalampusan. Kon nagtuyok ang kalibutan, nagtuyok ra sab ang kapalaran sa tawo. Mao gyud kini ang kinabuhi sa tawo. Dili na gyud kini mahimong mailisan tungod kay mao na kini ang gitagana sa Ginoo kanatong tanan.

Sama sa uban, mao sab kini ang dagan sa kinabuhi sa nahimong Sinulog Idol First Runner-Up sa  ikasiyam nga edisyon sa maong kompetisyon  nga si Angelica Maranan o mas naila karon sa kadaghanan isip si Angel.

Ang 19 anyos nga dalaga nga nagtubo sa Masbate nisaysay nga sa bata pa lang siya,  nakasuway  siya sa mga sitwasyon nga mura og halos ikamatay na niya gumikan kay nakurentehan siya sa dihang nagpangidaron pa lang siya og 4 anyos. Dili na niya mahinumduman kun nganong nahiaguman niya ang  maong insidente .

Sa pagkalandig niya sa tambalanan, gikinahanglan niya nga mopaubos og operasyon.

“Akong kinabuhi ato kay na’g 50/50 dugay gyud kaayo ko na-operahan kay wala'y modawat namo nga doktor”, asoy pa niya.

Tuod man, nabuhi gyud si Angel ug giisip kini niya nga ikaduhang kinabuhi nga gigasa sa Ginoo kaniya.

“Naa pa gyud siguro ko’y purpose why I was given a chance by the Lord. Maybe na-figure out na nako. I think naa pa gyud siya’y mission ipabuhat nako”, suma pa ni Angel.

Nagtubo si Angel nga walay giila nga amahan ug ang giisip na lamang niya nga amahan mao ang iyang apuhan nga si Lolo Junior.

“Naa pa ko sa tiyan sa akong mama kay nibiya na daw siya. Mao nga wala gyud ko makaila niya in person”, suma pa ni Angel.

Matud pa ni Angel nga dili sab sa tanang panahon nga anaa siya sa kiliran sa iyang inahan gumikan kay ang iyang inahan nga si Mary Ann Maranan, tua nagtudlo sa isla ug sa bukirang bahin sa ilang dapit ug anaa lang siya ubos sa pag-amuma sa iyang mga iyaan nga sila si Kris, Gretchen ug Melona.

Miyembro sa choir ang iyang inahan. Kanunay siya nga mag-uban-uban niini sa higayon nga aduna kini practice sa simbahan.

“Kamao man mo guitar ug mokanta akong mama. Na-member siya sa choir kay siya may moduyog,” matud pa niya.

Giangkon niya nga naangkon niya ang iyang katakus sa pagkanta sa iyang inahan.

“Dili na ikahibong nga ang anak maliwat gyud mao everytime mag-gitara akong mama kay mosabay ko niya og kanta”, matud pa niya.

Tungod sa iyang pag-uban-uban sa iyang inahan ug kay nakitaan siya nga maayo siya og tingog, 7 anyos pa lang siya, gipaapil na siya og choir sa iyang inahan.

“Gipaapil ko og choir para ma-enhance akong voice since dedicated man ko ni God. Ako gyud ni e-offer Niya akong talent nga iyang gihatag diri kanako”, pulong pa niya.

Maingon nga anad na sa group singing si Angel ug wala kaayo niya mapalambo ang solo singing tungod kay wala siya makaagi og pormal nga training sama sa voice lesson. Gani, di sab siya makabansay-bansay sa ilang panimalay gumikan kay wala sila’y kahimanan sama sa microphone ug speaker.

“Makakanta rako panagsa through sa cellphone ug sa pag-apil nako sa choir”, suma pa niya.

Bisan pa niana, nakat-on ra sab si Angel og solo singing tungod kay niadtong anaa na sa siya sa Grade 6, siya ang gipili sa iyang magtutudlo nga maoy murepresenta sa ilang tunghaan ngadto sa district meet.

Sama sa bation sa uban, nangurog gyud ang  tanan niya nga kaunuran sa lawas. Ang iyang kamot ug ang iyang tingog mao gyuy maklaro nga nangurog sa dihang miatubang na siya sa daghang tawo.

Matud pa ni Angel nga sukad ato, nasundan pa gyud kini niadtong high school na siya hangtud nga nagkolehiyo siya. Siya gyud ang mahimong representante sa ilang hugpong kon adunay singing contest.

Dakong kausaban gyud ang nakita ni Angel sa dihang miapil siya sa unang higayon og kompetisyon nga gawas sa eskwelahan nga mao ang Sinulog Idol.

Tug-an pa ni Angel nga wala gyud siya'y igo nga preparasyon sa iyang pagsalmot sa Sinulog Idol.

“Una , naka witness ko sa Fuente and then gisultian ko ni Kiery Segayle ug nakit-an pud nako sa akong messenger nga picture nga gi-PM nako. But what’s motivating me to join Sinulog Idol is that to prove not just for myself but also to other people nga although I’m not that biritera or ing-ana ka powerful og voice but naa gyuy something nga makita ang judges nako ba, something unique nga ma appreciate nila nga bisag di ka ing-ana ka maayo nga sige og apil og contest but once mokanta na, mapakita nako nga from the heart and true lang gyud ko sa akong self sa akong pag-deliver sa kanta. Usa sab kay aron maka-inspire ko sa mga tawo nga ni believe sa akong talent”, padayag pa ni Angel.

Apan dili lang sab kana ra ang tinguha ni Angel kun nganong miapil siya sa Sinulog Idol.

“Naa koy gusto nga i-prove sa usa ka taw nga special para sa ako life although he left us but I want that person to see me singing”, suma pa ni Angel.

Matud pa ni Angel nga bisan og wala man siya makahimamat sa iyang amahan, pabilin gihapon niya nga gihandum ang pagpakita niya niini tungod kay aron makailaila kini niya ug masuta niya kun unsa na ang kondisyon niini.

Tuod man, sa dagan sa kompetisyon, gipakita ni Angel kon unsa ang maabot sa iyang makaya.

“Makaingon ko nga ang Sinulog Idol usa gyud ni sa nag-mold nako to be a better individual. Dili lang gyud ni siya usa ka singing competition but this is a program that will help nga mo-turn out into a best version ang usa ka tawo”, esplikar pa ni Angel.

Sa dagan sa kompetisyon, dili sab gyud lalim ang iyang gitaak tungod kay halos tanan nga iyang mga giawit sa entablado, mga bag-o alang kang Angel. Matud pa niya nga maglisod siya og sag-ulo niini ug maglibog na sab siya kun unsa ang iyang unahon kun ang iyang pagtuon ba o ang pagtuon sab sa mga lyrics nga iyang kantahon.

“Katong tanang kakapoy ug kahago, it was really worth it, mag-agi man jud ta’g kalisod para ma test nato atong self og unsa ta ka strong as a person.  Pinaglaban ko nalang talaga yung kasabihan ko na “Kung kaya nila, kaya ko din”. Through that naiban-ibanan ako kakuyaw. As long as you are true to yourself and for as long as you have good attitude, nothing is impossible. And this I always tell to myself “I SING TO EXPRESS NOT TO IMPRESS”, dugang pa ni Angel.

Sa tanan nga naagian ni Angel, maingon nga sa pagbukas karong tuiga, gisugat na siya og kadaugan tungod sa iyang pagkalakip sa Sinulog Idol, ug karon, mogradwar na sab siya sa University of Cebu Main Campus sa kurso nga Bachelor of Elementary Education.