Nilayasang show ni John Lloyd mataas pa rin ang ratings, Coco nangunguna!

MANILA, Philippines — Kapamilya pa rin ang pinakapinanood na TV network sa buong bansa noong Marso matapos nitong maghari sa top ten list ng mga pinakapinanood na prog­rama at magkamit ng average audience share na 46% (hindi kabilang ang Holy Week), ayon sa datos ng Kantar Media.

Nanguna ito partikular na sa Metro Manila, kung saan nagkamit ito ng ave­rage audience share na 42%, at sa Mega Manila, kung saan nagkamit naman ito ng average audience share na 37%. Tinutukan din ang ABS-CBN sa Total Luzon sa pagrehistro nito ng 42%; sa Total Visayas sa pagtala naman nito ng 56%; at sa Total Mindanao sa pagkamit naman nito ng 54%.

Nanatili pa rin ang FPJ’s Ang Probinsyano (41.3%) sa trono nito noong Marso bilang numero unong serye sa bansa, na sinundan naman ng reality-ta­lent search na Pilipinas Got Talent (38.1%). Lubos ding kinapitan ang pagtatapos ng La Luna Sangre (37.2%), maging ang sumunod na serye sa timeslot nito na Bagani (33.4%), ang pinakabagong fanta­serye ng ABS-CBN.

Inabangan din ang mga kwento ng inspirasyon sa MMK (31%) tampok ang buhay ng letter senders nito, pati na rin ang mga nagbabagang balitang hatid ng TV Patrol (30.7%).

Pumatok din ang mahiwagang kwento ng aral ng Wansapanataym (25.8%), ang panibagong yugto ng Home Sweetie Home (24.4%), ang current affairs program na Rated K (23.2%), at ang hit primetime series na pinagbibidahan ni Erich Gonzales na The Blood Sisters (21.3%).