Blessing in disguise

CEBU, Philippines — Tindero og butong sa adlawan, estudayante sa hapon, amateurista sa gabii, Sinulog Idol na karon!

Siya si Arnold Pepino Badana. Si Arnold ang milangkat sa ikasiyam nga titulo isip Sinulog Idol sa Cebu.

Gipabuhagay pa ni Arnold nga ang iyang kadaugan mao ang labing hugyaw ug memorable nga nahitabo sa iyang kinabuhi sulod sa 18 ka tuig nga iyang pagpanikaysikay niining kalibutana.

“Dugay naman gud na nakong gipangandoy nga makaapil ko sa Sinulog Idol. Wala sab ko magdahom nga sa dinugay-dugay nako nga hinuwat nga makaapil ko kay nahinayon na gyud”, suma pa ni Arnold.

Giasoy ni Arnold nga ang pagkalakip niya sa Sinulog Idol mao ang iyang matawag nga “blessing in disguise”.

“Bag-o pa nahuman ang Minglanilla Idol ato ug gikuha ko ni Sir Chingkoy as a guest sa usa ka event sa Mariners Court. Wala pa koy alamag ato nga akong gika-istorya diay kay ang Maka Girls ug ilang road manager nga si Mama Bea Daitol ug ang Maka Mom. Nagkauban mi ato nga event. Pagka dungog man gud nila sa akong tingog kay na-shock sila ba kay nindot kuno unya taas mao ila ko gi-encourage nga mo-audition ko sa Sinulog Idol ug mao to akong gi-grab ang opportunity. It’s really a dream nga dapat nakong i-push”, istorya pa niya.

Sa pagsulod pa lang niya sa audition room didto sa Cebu City Sports Complex, giangkon niya wala siya makalikay nga bation og pangulba. Bisan og nakahinumdom kaniya ang road manager apan wala gyud siya nagpadala sa kulba  tungod kay gusto niya nga maninguha nga malakip sa mapilian.

Tuod man, nakaahat siya og sayaw tungod kay adunay mi-request nga mopakita og ginagmay nga moves niya. Matud pa niya nga mao kini ang klase sa katakus nga limitado gyud niya nga pagabuhaton. Tungod kay anaa na siya sa atubangan sa mga hurado, gipaundayunan  na lamang niya kini.

Dakong kalipay ni Arnold nga nadawat gyud siya sa maong audition. Una gyud niya nga gipasalamatan ang Ginoo gumikan kay gigiyahan siya niini.

Sa dagan sa kompetisyon, naandan na ni Arnold ang iyang pamaagi sa pagkanta sa amateur singing contest. Mao kini ang usa sa mga pamaagi nga lisod niya nga ikontrola tungod kay ang gusto sa coaches mao ang mamahimo siya nga maayo nga performer ug dili lang nga mahulma ang iyang pagka-singer.

“Ma- rate nako akong kaugalingon  sa 7 (highest is 10)  kay dili paman jud ko tantong maayo mo-perform. Naanad ko sa amateur singing pero ako na na-overcome kay ginatudluan man gyud ko nila Coach Jay ug Coach Apple kon unsa ang sakto. Ako mismo sa akung kaugalingon kahibalo ko asa ko nagkuwang. Sauna, dili kaayo ko makig-istorya og tawo kay mauwaw sad ko ba ilabi na sa mga babaye nga managad nako mauwaw ko. But sa pagkanta mas ako jud sabton ang meaning sa kanta if it’s all about love, God, ug uban pa para maoy ma-deliver nako sa mga tawo nga naminaw”, padayag pa niya.

Tungod kay anaa na siya sa hugna nga mopalambo na sa iyang istilo sa pagkanta, gihimug-atan niya nga gusto niya imatuod nga aduna pa siya’y mabuga.

“Ganahan nako ipakita sa uban nga dili ra ko kontesero nga pang-barangay ra ko. Ganahan nako pamatud-an nila nga kaya nakong makipagsabayan sa mga gahi ug dili mayano-yanong singers sa Cebu”, suma pa niya.

Ug napamatud-an gyud niya tungod kay siya gyud ang milabaw sa tanan sa labing bag-ong edisyon sa Sinulog Idol.

Gipadayag pa ni Arnold nga mura siya og naglutaw sa kalangitan nga walay panganod tungod sa madag-umon nga panahon sa dihang gideklarar nga siya ang ikasiyam nga Sinulog Idol.

Matud pa ni Arnold nga natugbangan tanan nga kahago nga gipasiugdahan sa iyang ginikanan nga sila si Catalina ug Edwin Badana.

Istorya pa ni Arnold nga ang iyang amahan ang nagtudlo kaniya og kanta. Bata pa lang siya, gibaid na siya aron mamahimong usa ka maayong singer.

Kanilang 10 ka anak sa iyang ginikanan, kasagaran kanila ang mangantahay. Apan siya lang gyud ang adunay gana nga moapil og mga singing contest. Bisan pa niana, ang iyang mga igsuon nga sila si Sarah Jean ug Harold, nakatigi na niya sa usa ka singing contest kaniadto.

“Mga 15 mi kabuok contestants ato nga contest nga nagtigi mi. Ang mga tawo kay wala kahibawo nga igsuon ming tulo kay gilahi-lahi man namo ang among apelyido. Mao to kami ra sad tulo ang naka-place. Gihakot namo tanan”, asoy pa niya.

Gikalipay ni Arnold ang maong panghitabo tungod kay nakatabang sab kini sa ilang pamilya sa pinansyal nga aspeto.

“Mao nga never ever gyud ko nga mo-give up sa mga singing competition  nga akong apilan pirme , mao raman sad na ang kapangwartahan nako gud ug usa sad na sa mga pamaagi nga maka-abag ko og palit namo og sud an. Usa sab, makahatag sab ko bisan ginagmay sa akung mama ug sa mga manghud nako para pambawon”, suma pa ni Arnold.

Dili lang sa pinansyal nga pamaagi nakabenipisyo si Arnold gumikan kay sukad niadtong 6 anyos pa niya nga pag-apil-apil niini, nakat-on siya sa mga istilo sa pagkanta sa iyang mga kauban sa contest.

Bisan og wala siya makasuway og pormal nga pagpabaid sa iyang katakus, apan sa maong paagi nga ang pag-apil og mga amateur singing contest, nakat-on siya kon unsaon niya pagpalambo ug pagpataas sa iyang tingog sa kinaugalingon sab nga pamaagi.

“Sa mga tag- as nga kanta nga dili nako maabot kay kada buntag, i-exercise nako akong vocals sa pag-syagit-syagit atong mga kanta nga dili nako maabot hangtod sa maabot nalang gyud nako to nga mga note. Unya sakto nga pahuway ug paglikay sa mga pagkaon nga makapagaw”, esplikar pa ni Arnold.

Dakong pasalamat niya sa Sinulog Idol kay kon wala pa siya malakip sa maong kompetisyon, magpadayon gihapon siya sa iyang pagpakigtigi sa nagkadaiyang singing contest sa mga barangay.

“Mao na gyud ni ang start nga kinahanglan gyud nga mo-level-up sab ba ug malipayon ko kay nisalig sila nako, ang Sinulog Foundation ug ang mga coaches sa akong talento. Dako na kaayo ni nga kausaban sa akong kinabuhi ang mahimong Sinulog Idol champion. Nalipay ko sa dako nga title nga gihatag nila nako ug dili gyud ko ni usikan kay sa makausa ra gyud ko mahimong Sinulog Idol”, pagtapos pa ni Arnold.

Name: Arnold Pepino Badana

Nickname: Arn/Nold

Birthday: August 17, 1999

School & Course: Grade 12 ICT-Student sa Inayawan Night High School (INHS)

Hobbies: Playing Basketball, Playing Guitar, Nguha Mangga, Surfing Internet.

Height: 5’6’’

Weight: 57 kgs.

Favorite Foods: Manok, Baboy , Isda, Utan

Favorite Songs: The Search is Over, Someone Who Believes In You

Favorte Singers: Survivor, Air supply, Bon Jovi, Bruno Mars, Tom Jones, Michael Bolton

Genres: RNB, Slow Rock, Pop Rock

Favorite Movies: Larva, Oggie and the Cockroaches, Dragonball, IP Man, Ong Bak

Crush: Liza Zoberano

Titles/Achievements in Life:

• Sinulog Idol 2018 (Season 9)

• 1st Runner Up Ko Sa Minglanilla Idol

• Naga Idol -Champion