Sekreto pa ang leading man

CEBU, Philippines — Gikagubtan karon sa Twitter ang hulagway nga gi-post ni Direk Erik Matti. Ang hulagway nagpakita sa usa ka meeting kauban si Liza Soberano, staff sa Darna ug usa ka lalaki nga nagtalikud nga wala mailhi. Nagduda ang netizens nga si Tony Labrusca ang maong lalaki. Wala pa mitingog pagbalik ang direktor kun kinsa kining maong laki sa hulagway.

Talent manager na!

Usa na karon ka talent manager ang Comedy Queen nga si Ai-Ai delas Alas. Ang labing unang talent niya karon mao ang mipasikat sa kanta nga “Hayaan Mo Na Sila”. Kini mao ang hip Hop group nga Ex Battalion. Sanglit dili pa gyud tantong hinog ang kaalam ni Ai-Ai sa pag-manage og talent, nagpatabang siya sa iyang gitawag og “Ama” nga si Boy Abunda kinsa usa usab ka talent manager sa pipila ka artista sa industriya.

Pia, nagkasamad-samad

Nibilib pag-ayo ang direktor sa My Perfect You nga si Direk Cathy Garcia-Molina ngadto kang Pia Wurtzbach gumikan kay nabuhat gyud niini ang iyang mga eksena human iya kining gipahimangnoan nga tangtangon ang iyang awra nga pagka-Miss Universe  sa pelikula. “Sabi ko I will never see Miss Universe on my set and in fairness to Pia siyempre Miss Universe yan, pero ni-entourage ni Pia, wala kang mararamdamang ganun. In fact ako yung nagagalit, ‘Alagaan niyo kaya itong Ms. Universe!’ kasi sugat, sugat na siya, sa mga eksena hindi nagrereklamo,” suma pa ni Direk Cathy.

Nakahilak sa kahadlok

Gumikan kay adunay fear of heights ang Kapamilya teen star nga si Edward Barber, wala gyud niya kapugngi ang pagtulo sa iyang  luha sa dihang  nag-rappel kini kauban sa iyang onscreen partner nga si Maymay Entrata didto sa adventure park sa Pampanga alang sa usa ka episode sa Magandang Buhay.

Proud sister

Gipasigarbo gyud ni Dani Barreto ang  iyang igsuon nga si Claudia Barreto gumikan kay hinay hinay na kini nga nakasulod sa showbiz pinaagi sa kaugalingon nga paningkamot. Usa si Claudia sa bag-ong millennial singer nga gipailaila sa Cornerstone Management. “I’m so proud of her kasi we (family) have all known na magaling talaga siya kumanta, so I'm so happy na finally naririnig na ng maraming tao yung mga compositions niya”, suma pa ni Dani.

Giidolo ni Pauleen

Malipayon kaayo si Kyline Alcantara gumikan kay nakadawat siya og init nga suporta gikan ni  Pauleen Luna. Dili makatuo ang aktres nga mauyonan  ni Pauleen ang iyang karakter  sa  “Kambal, Karibal”. Matud pa niya nga personal nga miduol ug miingon si Pauleen ngadto kaniya ug nilenggua nga giidolo siya niini.

Nakagusto og una

Giangkon ni Loisa Andalio nga siya gyud ang unang nakagusto sa iyang gidungog nga boyfriend nga si Ronnie Alonte. Gitug-an sab niya nga kanunay siya nga magpasiplat og tan-aw sa  aktor kon naa sila sa backstage sa It’s Showtime.

Dili modetalye

Giangkon ni Pia Wurtzbach nga dili siya ang matang sa  babaye nga modetalye sa iyang boyfriend mahitungod sa iyang mga proyekto. Matud pa ni Pia nga gusto siya nga mosaksi gyud mismo gumikan kay dili siya gusto mo-spoil sa dagan sa panghitabo. Malipayon sab si Pia gumikan kay nakita ra sab niya nga supportive ra si Marlon Stockinger ngadto kaniya.

Target ang UP

Target nila ni Donny Pangilinan ug Leila Alcasid nga makatungha sa usa sa mga prestihiyosong tunghaan sa Pilipinas, ang  University of the Philippines. Bisan og busy ang duha sa ilang pagpanikaysikay sa ilang karera, gusto sa duha nga makahuman sa ilang pagtungha.Ang duruha, kauban sa laing 11 ka talents, gilusad niadtong Domingo isip labing bag-ong miyembro sa Star Magic Circle.