Song of Bernadette giabibahan og maayo

CEBU, Philippines — Napuno sa luha apan inubanan sa pahiyom sa mga tawo ang bag-ohay lang nga natapos nga Song of Bernadette: The Musical, diha sa Centerstage sa SM Seaside.

Ang upat ka adlaw nga pasundayag aduna gyu’y nahatag nga pagtulun-an nga angay nga kutluan og pagtulun-an dili lang sa mga kabatan-unan, apan ilabi na sab ngadto sa mga ginikanan.

Ang kura paruko sa simbahan sa Our Lady of Lourdes Parish diha sa Punta Princesa, Cebu City nga si Father Randy Figuracion, SDB, mipadangat sa iyang pasalamat ngadto sa tanan nga nisaksi sa milagro nga nahimo sa Mahal nga Birhen.

“To everyone who witnessed the miracle, it is such an honour and a privilege for making time and for being part of the miracle. Thank you for sharing your love and support for the show. We may be uncertain if this will be re-stage soon but let us just pray for another miracle to come”, pulong pa ni Father Randy.

Dugang pa, mipasalamat sab pag-ayo ang artistic director nga si Mary Rose Villacastin-Maghuyop gumikan kay dako usab ang nahitabo sa iyang kinabuhi sa dihang nahimo siya nga parte sa maong production. Wala matud pa sa iyang hunahuna ang mamahimong director.

“I am used to act in front of the many but I could never imagine myself directing a play that could melt my heart so easy. I would like to take the chance to thank everyone of being part of the miracle and for helping a hand to make a successful show. To everyone who took time to watch, I am grateful for all your presence and support”, padayag pa ni Maghuyop.

Ang tulo ka oras nga pasundayag nagtuki kini sa 14 anyos nga si Bernadette Soubirous nga bwenas nga gipakitaan sa Mahal nga Birhen aron mamahimong mensahero ngadto sa iyang silingan didto sa Lourdes.

Sa pagpadayon sa dagan sa istorya, daghan ang wala mituo sa iyang pagbutyag sa maong pagpatim-aw sa Birhen ngadto kaniya gumikan kay usa siya ka inosente nga bata nga wala kaayo’y alamag sa kasikas sa simbahan.

Mitapos ang istorya sa dihang adunay gitagamtam nga sakit si Bernadette sa iyang tuo nga tiil. Sa pangidaron nga 35 anyos, mipanaw nga malinawon diin sa katapusang hugna sa iyang kinabuhi, mipakita pa gihapon ang Mahal nga Birhen ngadto kaniya.

Nitambong gyud sa maong kalihokan si Cebu Archbishop Jose Palma kinsa nipadangat usab sa iyang pasalamat sa mga tawong nagmugna sa maong kalihokan.

Sa wala pa sugdi ang pasundayag, nibutyag si Palma nga dako kaayo og papel si Maria sa kinabuhi ni  Hesus ug si Bernadette ang usa sa mga instrumento pagsabwag sa maayong balita kon unsa ka maayo ang mahal nga birhen.

Ang maong play maoy tipik sa pagsaulog sa ika-160 nga anibersaryo sa aparisyon sa Lourdes didto sa France nga nagsaulog usab sa “Year of Grace”.

Nahimo kining usa sa mga highlights sa kapistahan sa Archdiocesan Shrine of Our Lady of Lourdes diha sa Barangay Punta Princesa . Naisip kini nga kinaham nga musical play nga motandog gyud sa atong pagtuo ngadto sa Mahal Birhen .

Ikatulo na kini nga higayon nga gipasundayag kini sa ibabaw sa entablado.

Nasayran nga daghan gyud ang ni-request nga ipasundayag kini og balik tungod sa kahugyaw sa  production niini.

Kapin sa 50 ka tawo ang nalakip sa cast sa Song of Bernadette nga duna gyuy maayong talento sa natad  sa pag-arte, pagsayaw ug pagkanta.

Gipamatud-an na usab kon unsa ka maayo ang mga Cebuano sa natad sa pag-arte sa entablado ug dako gyud ang matampo niini sa pagpalambo sa binisaya nga teatro.