Sa Kalipay’g Kasakit Mag-inunongay

CEBU, Philippines — Panggaon ug ampingan ang pamilya gumikan kay mao lang kini ang mo-unong kanato sa bisan unsa nga sagubangon nga kalisdanan sa atong kinabuhi. Gani, ang pamilya ang kinahanglan nga unahon sa tanang prayoridad sa kasikas sa atong pagpakabuhi dinhi ibabaw sa yuta.

Sa pakighinabi sa  finalist sa Sinulog Season 1 nga si Jacqueline Eborlas-Torreon sa Banat News Hugyaw, gipabuhagay niya unsa kabililhon ang pamilya alang kaniya.

Si Jacquiee kinsa usa na sab ka asawa ug inahan karon, mibalik tan-aw sa iyang kaagi isip usa ka anak sa iyang mga ginikanan kaniadto.

Istorya pa niya,  hilabihan ka puno sa drama ang iyang kinabuhi gumikan kay nasinati na niya ang kasagaran nga mga bug-at nga pagsuway nga masinati sa usa ka binuhat.

Matud pa nga tungod sa kalisod, kusog siya nga mosulong sa mga nagkadaiyang barangayan nga mga singing contest. Bisan asa pa man mosalmot gyud siya tungod sa pinansyal nga aspeto.

“Naa mi negosyo sa una pero sa dihang nasakit akong Papa Moritz, nihinay amoang negosyo kay wala nay makaatiman. Akong gibuhat kay, niapil ko og mga contest every night bahala og naay klase sa buntag basta lang maka-support ko sa akong family ug sa akong pagskwela”, asoy pa niya.

Matawag ni Jacquiee nga usa siya ka working student gumikan kay usa siya ka tinun-an inig buntag ug usa siya ka raketera sa gabii.

“Lisod sab gyud pero kinahanglan man gyud para makatabang. Tag-two  hours lang akoang tulog usahay but go gihapon para molambo, ug gusto ko makahuman og eskwela”, suma pa niya.

Sa personalidad ni Jacquiee, tataw niini ang kaisog nga anaa sa iyang kaugalingon. Gani, makita sab gyud ang tinuod nga Jacquiee nga isog nga babaye kun anaa na ibabaw sa entablado.

“I'm a fighter and I always give my heart every time I perform. That is me as a performer and maybe as a person kay ganahan ko strong ko og appearance pero I am simple and approachable. Maybe I’d be so strong sa stage but I have a soft heart to be kind to everyone”, siya nagkanayon.

Sa matag higayon nga motungtong na sa entablado si Jacquiee, daghan gyud ang mahugyaw kun awiton na niya ang awit ni Whitney Houston nga “I Will Always Love You”.

Ang maong awit mao gyud ang makatandog sa kasingkasing sa tumatan-aw gumikan kay ang baga niya nga tingog mao ang mopalumoy sa kasingkasing sa mga tawo.

“Ang akong tingog is strong daw. Thankful ko nga mao ni ang akong specialty that I got from the genes of my father. Pero kaming tanan sa pamilya kay mokanta mi”, suma pa niya.

Gisaysay usab ni Jacquiee nga nagsugod siya og kanta sa dihang tres anyos pa lang siya.

“Ana akong parents nga kusog na gyud daw ko magsunod-sunod sa mga kanta then mag humming lang”, suma pa niya.

Sa dihang nadiskubre kini sa iyang papa, personal kini nga miatiman sa pagtudlo kon unsaon ang maayong pamaagi sa pagkanta.

“Akong papa ra ang nag-train nako. I practice every day like every morning jud inig mata nako diretso practice na. Sugod na gyud mi ana. Pag four years old nako, niapil nako og contest”, suma pa niya.

Dako gyud og natampo ang iyang pamilya sa naangkon niya nga kalampusan.

“Akong family ang akong inspiration why I joined singing contest. Mao nga dili ko kalimot nga sa dihang first ko nitungtong on stage kay lipay kaayo sila kay akoy pinakabata unya payter kaayo”, matud pa niya.

Sa 15 ka tuig nga pagpanimpad sa nagkaiyang singing contest sa mga kabarangayan, nakasuway na siya og pormal nga vocal trainings  pag-abot pa sa kolehiyo .

“Most of the time ako papa ra gyud nag hands on og train nako pero nakasuway ko didto sa Center for Pop during Sinulog Idol,” suma pa niya.

Dugang pa  ni Jacquiee  nga sa iyang pagsalmot sa Sinulog Idol 2010, giimbitar lang siya sa iyang higala nga si Samantha Abadilla  nga mo- audition.

Sa pagkahibaw niya, wala sab niya pakyasa ang higayon nga mo-audition tungod kay pursigido siya nga mahalad ang iyang katakus ngadto sa Balaang Bata nga si Snr. Sto.Niño.

“More on that big reason, ganahan gyud ko ma-train formally, ma-exposed ang akoang talent and make my parents proud of me. Gusto sab nako ma-prove nga dili lang kay sa barangayan ko kutob, kaya sab nako ang mga dagko nga contest like Sinulog Idol”, siya nagkanayun.

Sa iyang kasinatian sa Sinulog Idol, matud pa niya nga wala siya’y dakong pagmahay nga gibati gumikan kay nalakip siya sa grand finals ug aduna siya'y dakong pagtulun-an nga dili gyud niya mahimong mahikalimtan.

“Funny experience gyud to siya kay naguba akong heels that night and I have no choice but to wear my mom’s white sandals nga dili gyud maangay sa akong maroon nga gown. And, Coach Jay noticed it. Mao nga as a performer, dapat kamao gyud mo angay-angay to look presentable”, matud pa niya.

Dugang pa niya,  nindot sab gyud sa pamati ang mahilakip sa Sinulog Idol.

“It was a good journey for me bahala’g kulang mi sa tulog tanan contestants. Seven  nights was tough. And thankful pud ko nga nakaapil  ko ani kay after Sinulog Idol mura ko og artista sa among school. Daghag pa-picture labi na ang teachers and students nga sobra ka proud nako”, suma pa niya.

Dakong kalipay usab ni Jacquiee nga dili lang ang iyang mga magtutudlo ang nalipay sa iyang kalampusan, lakip na usab ang iyang pamilya nga miunong kaniya sa kun unsa siya ug kinsa siya.

“I have a family nga grabe ang pagpangga. Mao nga mao sab ang akong buhaton sa akong pamilya karon nga naa na sab koy baby girl nga si Joash Brynn Torreon,” hirit pa niya.

Maingon ni Jacquiee nga kinahanglan nga mahimong ehemplo sa anak aron ang anak aduna usay ikabaws nga maayo ngadto sa ginikanan.

Nabuhat niya ang iyang katungdanan isip maayong anak sa iyang ginikanan, karon, mahimo na sab siya nga maayong inahan sa iyang anak aron sa kalipay ug kasakit, kanunay sila mag-inunungay ug magminahalay.