Soulful Mancol

CEBU, Philippines — Espesyal ang mahimong istorya karong adlaw  kabahin sa usa ka produkto sa  Sinulog Idol gumikan kay siya ang nahimong   guest sa usa ka episode sa #MARKado Live sa Facebook page sa Banat News sa miaging semana.

Inanay karon nga mikawhat og atensyon sa mga netizen ang iyang video diin iyang giawit ang Bisaya version sa “Too Good At Goodbyes” ni Sam Smith.

Siya mao ang multi-medalist sa World Championship Of Performing Arts (WCOPA) 2016, Tawag ng Tanghalan contender, ug 2011 Sinulog Idol Top 6 contender nga si Philipp Mancol.

“Ana akong mama nga gikan daw sa Philippines. So the way I interpret it, maybe and gihunahuna sa akong mama kay maka-bring ko og pride sa Philippines and that’s what I’ve been doing”, pasabot niya kabahin sa iyang ngalan.

Nahinayon gyud ang iyang paghatag og garbo sa Pilipinas human siya miapil sa matawag nga olympics sa performing arts nga mao ang WCOPA didto sa Long Beach, California.

Gidaog niya ang mga kategorya sa Gospel (Silver medalist), Contemporary (Gold ug Division Champion) ug Pop (Gold medalitst).

Matud pa niya nga miagi una siya og audition dinhi sa Sugbo apan sa dihang nadawat na siya, giangkon niya nga namroblema siya gumikan kay nagkuwang siya sa pinansyal nga aspeto.

“Nangayo ko og sign sa Ginoo. Og di ko tabangan sa among gobiyerno, dili gyud ko moapil but since all expense kay paid siya, ang allowance na lang nako ang gipaninguhaan”, suma pa ni Philipp

Naggikan sa Calbayog City, Western Samar si Philipp. Didto siya nangayo og tabang pinansiyal sa ilang mayor nga si Rolando P. Aquino.

Giangkon ni Philipp nga ang pagsalmot niya sa WCOPA mao ang usa sa dili niya mahikalimtan nga mga kasinatian sa iyang kinabuhi gumikan kay nakasinati siya kon unsa kalisod ang pagkab-ot niini.

Sa laing bahin, gitug-an ni Philipp nga  halos silang tanan sa iyang pamilya kamao mokanta.

Ang iyang inahan nga si Pilar mao ang nakadiskubre nga kamao siya mokanta niadtong 5-anyos pa lang siya.

“Sa balay, bata pa ko, ingon si mama nga makasubay na daw ko sa karaoke ba, makabasa nako and maka-hum nako sa tune”, matud pa niya.

Una niya nga nakat-unan mao ang awit nga Delilah tungod kay mao kini ang kanunay nga madunggan niya sa ilang panimalay.

“Mao na ang first nako nga kanta unya kay modagan dayun ko kay di man ko ganahan [pakantahon],” matud pa  niya.

Istorya pa niya nga dili gyud siya ganahan nga pakantahon siya atubangan sa daghang tawo gumikan kay wala pa kaayo siya’y pagmahal kaniadto sa musika.

Niadtong bata pa siya, wala gyud siya’y nasalmutan nga mga singing contest kay gawas nga dili siya ganahan nga moapil, wala sab gyu’y mga kalingawan kaniadto didto sa ilang dapit. Apan sa mga kasikas sa ilang tunghaan, siya ang ibangga sa iyang mga magtutudlo tungod kay kinahanglan gyud nga adunay mo-representar gikan sa ilang tunghaan.

Nabali ang dagan sa hangin niadtong nitungtong na siya sa high school tungod kay inanay na niya nakat-unan ang pagmahal sa musika. Gani, miapil siya sa Glee Club sa Christ the King College (Franciscan School). Sulod sa upat ka tuig ang iyang pagserbisyo sa ilang simbahan gumikan kay ang ilang performance mao ang  pagkanta sa misa matag Domingo.

Pag-gradwar niya sa high school, mitikang siya dinhi sa Cebu aron padayunon ang iyang pagtungha sa kolehiyo.

Sa iyang pagtungha  sa University of San Carlos, nalakip siya sa University of San Carlos Choristers sulod sa upat ka tuig.

Dakong pasalamat niya sa maong hugpong gumikan kay nahimo siya nga full scholar ug miscellaneous fee na lamang ang iyang bayrunon sa skwelahan.

 “Makakat-on ka og note-reading.  Tudluan man gud mi ni Sir Obette Del Rosario unsaon pagbasa sa mga nota para dili ma-ignorante ba. I also learned how to play piano kay during vacant times kay adto ko sa choir room. Also, daghan kaayo og ipanghatag nga inputs gikan sa akong co-members and gikan ni Sir Obette. Naa sad mi mga events like concerts nga makapa-boost sa among self-confidence”, siya nagkanayon.

Dugang pa, sa iyang pagpanikaysikay sa USC, didto niya una nalangkat ang iyang labing una nga titulo sa pagkanta sa dihang niapil siya sa Junior Philippines Institute of Accountants Got Talent ug siya ang nahimong grand champion.

Sa sunod nga tuig niana, misalang na sab siya sa First Carolinian Got Talent.

Niadtong 2011, misuway siya og Sinulog Idol human siya nakadungog  niini  gikan sa iyang kauban sa choristers.

Giangkon niya nga wala sa iyang plano ang moapil sa Sinulog Idol gumikan kay pagtikang niya og Cebu, wala siya’y alamag mahitungod sa maong kompetisyon.

 “Wala man gud koy idea unsa ang about sa Sinulog Idol, unsa ni nga competition in Cebu. Ako lang gyud gibuhat kon unsa ang makaya nako, and luckily I was one of the 12 finalists,” dugang pa niya.

Dugang pa ni Philipp nga nalisuran sab gyud siya sa paagi sa audition tungod  kay naa sa iyang hunahuna  nga basin dili  mauyunan sa mga hurado ang giandam niya nga kanta.

Sa tuig ni Philipp sa Sinulog Idol miagi na sab siya og laing kakulian gumikan kay sa pag-abot na sa grand finals, pagaw na gyud siya ug dili na gyud unta siya tugtan nga pakantahon sa iyang  doktor kay nagkaproblema na.

Wala damha ni Philipp nga maabot siya niadtong higayuna tungod kay mao kadto ang unang kompetisyon nga iyang nasalmutan gawas sa eskwelahan. Bisan og daghan ang miingon nga sayang nga dili siya ang nahimong mananaog, makaingon gihapon siya nga ‘blessed’ siya nga pagkatawo.

“Siguro nasayangan sila because at first I would say nga hilaw pa kaayo ko. Nindot sab to siya nga nakaapil ko kay kung wala ang Sinulog Idol, dili ko makasuway og lain pa nga performances. I would say nga perfect timing gihapon kaayo to siya eventhough dili pa kaayo ko prepared but at least along the way after the journey, it helped me be more prepared as a performer”, pag-angkon ni Philipp.

Malipayon siya sa dagan sa iyang karera human siya malakip sa Sinulog Idol tungod kay adunay   nagsingabot nga mga dakong oportunidad nga wala gyud niya napalangtawan nga maabot sa iyang kinbahuhi.

“Aside sa mga guestings gikan sa recommendation from Sinulog Idol kay didto ko first gikuha og composer to interpret a song sa Hunino Festival. Kanta siya gikan ni Russel Alegado (composer sa I love Cebu),” butyag pa niya.

Tuig 2016 sa dihang siya ang  grand prize winner sa pag-awit niya   sa  ’Awit Ning Gugma’ nga sinuwat ni Ralph Maligro nga  nalakip sa Love Song “Ballad” category sa Cebu Popular Music Festival.

Usa sa dakong benepisyo nga naangkon ni Philipp human sa mga nangagi nga kompetisyon nga iyang nasalmutan mao ang pagtan-aw sa mga tawo kaniya.

Pagkahuman niya og kanta sa Tawag ng Tanghalan sa It’s Showtime,  gipadayag ni Philipp nga dili niya tapuson ang iyang main goal sa iyang karera.

“I just want my voice to be heard. I am more focused on composing songs kay I am thinking nga mas naa koy edge sa other singers if I write original songs rather than covering”, suma pa niya.

Si Philip ang nagsuwat karon sa pagahimuon nga Christmas ID sa Sinulog Idol nga ipagawas sa dili madugay.

Fast Facts:

Name: Simeon Philipp Mancol

Nickname: Philipp

Birthdate: November 12, 1991

Motivational Song: Rise Up

Influential Singers: Black Soulful Singers, Bryan McKnight, Sam Smith, South Border