“Last Night” nga puno sa pagtulun-an
CEBU, Philippines — Daghan pa og madalit ang kinabuhi sa tawo busa dili kini angayan nga usikan ug duna pa’y luna sa paghigugma og balik.
Mao kini ang mensahe nga gipahimug-atan ni Piolo Pascual kalabot sa pelikula nila ni Toni Gonzaga sa Star Cinema nga Last Night nga padayong gihugupan sa mga sinehan lukop nasud.
Gitataw ni Piolo nga dili mahimong option ang paghikog sa pagsulbad og problema .
“Hindi siya dapat ginagawa. People tend to isolate themselves kung hinaharap nila ang mga problema. We should encourage them to put it out there, and talk to somebody, anybody,” matud pa niya atol sa pakighinabi kaniya sa mga sakop sa Cebu Entertainment Group sa presscon nga gidumala ni Ms. Josie S. Pereyra sa JSP Ads & Promotions
Sa personal niya nga kinabuhi, wala gyud masulod sa hunahuna ni Piolo ang maong butang busa nakighinabi gyud siya og mga tawo nga nisuway sa paghikog aron makahibalo siya sa paghatag og hustisya sa iyang role sa The Last Night.
Tipik sa istorya sa maong pelikula, nagplano ang karakter ni Piolo sa pagkutlo sa iyang kinabuhi gumikan sa dakong problema nga giatubang.
“It’s a story about hope, love, and being grateful for what we have,” saysay pa sa aktor.
Dugang pa ni Piolo nga siya ug si Toni nibilib gyud sa aktres nga si Bela Padilla kinsa maoy nagsuwat niining giisip nila nga talagsaong ideya.
Isip co-producer sa maong pelikula pinaagi sa iyang Spring Films, ang pagkuha og nindot nga story maoy basehanan ni Piolo ug sekondarya na lang ang mahimong kita niini.
“I love giving the audience stories that inspire or cheer them up,” hirit pa niya.
Komportable ra si Piolo sa dihang gigama ang maong pelikula sanglit nakauban naman niya si Toni kaniadto .
Kahinumdoman nga nagmalampuson ang pelikula nila kaniadto nga ”Starting Over Again” niadtong 2014.
Matud pa niya nga nahatagan gyud ni Toni og hustisya ang gidala niini nga karakter.
Malipayon si Piolo nga nagka-mature na nga mga proyekto nga nadawat busa swak gyud kaayo si Toni aron mahimong kapares sa maong pelikula.
Usa si Piolo sa mga karaang artista sa ABS-CBN ug dako ang iyang pasalamat sa iyang mother network gumikan kay wala gyud mabakante ang iyang career.
Nagpusot-pusot ang mga proyekto sa aktor karong panahona, gawas sa usa ka umaabot niya nga serye, duna pud siya'y pelikula diin makatrabaho niya ang award-winning director nga si Lav Diaz.
Gihigugma pag-ayo ni Piolo ang pag-produce og pelikula, gumikan kay gawas nga makadalit siya og hugyaw nga pelikula sa publiko, makahatag usab siya og trabaho sa mga kaubanan niya sa industriya.
Kahinumdoman nga nagmalampuson ang gi-produce niya nga pelikula nga “Kita Kita” nga gibidahan nila ni Alessandra de Rossi ug Empoy Marquez.
Samtang nagsugod na usab karon ang negosasyon sa i-produce niya nga film nga ubos sa direksyon sa Sugbuanong si Victor Villanueva nga maoy direktor sa pelikulang “Patay Na Si Hesus”.
“Hindi ko pa alam, basta abangan natin, “ matud pa sa aktor.
Matud pa niya nga andam gyud siya nga makatrabaho ang bisan kinsa nga direktor , ang labing importante nga nindot ang istorya sa pelikula.
Dili usab siya partikular kun kinsa nga mga artista ang mahimong kabahin sa iyang proyekto, gumikan kay ang labing importante alang kaniya nga mahatagan og gibug-aton niini ang mga karakter nga gibitbit niini, dugangan pa gyud sa nindot nga dagan sa istorya.
Sa laing proyekto, target ni Piolo puhon nga makatambayayong niya ang mga tinun-an nga filmmakers sa UP .
Mibilib siya sa talento sa Pinoy , ug napamatud-an kini sa pagbaha karon sa filmmakers ang angayan gyud hatagan og lapad nga suporta.
Si Piolo maoy espesyal nga dinapit sa pagbukas sa City Mall Cinema diha sa Consolacion, Cebu.
Pagkahuman sa ribbon cutting, nideretso dayon siya sa mall show diin bagang duot sa katawhan ang niabiba kaniya.
Mapasalamaton ang mga aktor sa mga Sugbuanon gumikan sa kanunay nga pagsuporta sa iyang pelikula.
“Salamat sa pagpunta ninyo dito, huwag ninyong kalimutan panoorin ang Last Night ,” mensahe pa ni Piolo sa mga tawo nga nitikang sa mall show.
Kauban sa Star Cinema ug Spring Films sa pag-produce sa Last Night mao ang movie outfit ni Neil Arci nga N2 Production.
Ang maong pelikula gisalida na sa mga sinehan sukad pa niadtong September 27. (BANAT NEWS)
- Latest