Si Father award-winning composer!

NameRev. Fr. Ponce Jed Bardon Bellones,

NicknameJed,

Date of BirthMarch 23 1962,

Birth PlaceMati, Davao Oriental,

Favorite SingerLeah Salonga,

Favorite SongSANA'Y WALA NANG WAKAS

Matud pa sa panultihun, kon malipayun ka, mag-enjoy ka nga maminaw sa usa ka kanta, apan kon masulub-on ka, ang matag liriko adunay lawom nga mensahe alang kanimo.

Hinungdan nga bisag kinsa ang mahimong  mahigugma sa musika.  Sa maong paagi , mapabuhagay sa usa ka tawo ang gibati niini.

Ma- ordinaryong tawo man, propesyonal, bata, tigulang o hamtung ang pangidaron, matag usa adunay managlahing istorya sa paghangop niini bisan pa man sa managlahing istado sa usa ka tawo.

Sama na lamang sa Team Moderator sa Team of Pastors sa San Narciso Parish Consolacion Cebu nga si Rev.  Father Ponce Jed Bardon Bellones, o nailhan sa kadaghanan isip Father Jed, nahatagan gihapon niya og dakong balanse ang pagsilbi niya sa Ginoo ug ang gihigugma niyang kahiligan kansang mao ang pagtagik og mga nagkadaiyang awit.

Dinhi nagpamatuod nga bisan og unsa pa ang imong propesyon nga gikalangkoban, may dakong puruhan nga mabitad gyud ka sa musika labi na kon kini adunay dakong impact kanimo.

Nagsugod si Father Jed sa iyang pagka- composer niadtong tuig 1998 sa dihang misalmot siya sa labing unang Metropolitan Gospel Songwriting Festival diin naangkon niya ang ikatulong ganti niini pinaagi sa iyang komposisyon nga Way Sama Ang Gugma Sa Dios.

Matud pa niya, mao kini ang labing unang komposisyon nga nabuhat niya sa iyang kinabuhi.

Mapasigarbuhon sab niyang gipaambit nga nahimo usab siyang awardee sa Halad, usa ka adbokasiya ni The Freeman & Banat News Chairman Jose  “Dodong Gullas” nga mihatag og dakong pag- ila sa mga Sugbuanon nga  nakatampo sa dakong kalampusan sa Binisayang Musika.

Apan ang dakong gipasalamatan ni Father Jed mao ang iyang kasinatian sa Cebu Popular Music Festival sanglit sa maong panahon man siya naila sa kadaghanang mga Sugbuanon bisan pa sa paghulagway niya sa iyang kaugalingon isip "late bloomer" nga kompositor.

Tuig 2003 sa dihang nahimo siyang grand champion sa Cebu Pop sa awit niyang "Gipangandoy nga Tingusbawan."

Sa maong tuig sab naangkon usab niya ang ikaduhang ganti sa gisumite niyang awit nga "Ang Banay Paraiso sa Gugma."

Apan pagbalik lantaw ni Father Jed, una siyang nakatungtong sa entablado sa grandfinals sa Cebu Pop niadtong tuig 1998.

Kining tanan niyang kasinatian sa Cebu Pop maoy usa sa mga rason kun nganung napalambo niya ang iyang dakong paghigugma sa musika.

"Gihigugma naku ang musika kay pinaagi niini akong mapadayag ang mga pagbati sulod sa akong kasingkasing ug hunahuna ug galamhan. Sa tanan nakong nahimong interpreter sa mga kanta nga akong gi- compose, ang dili nako makalimtan mao si Oscar Pagas nga usa ka buta pero nindot kaayo og tingog kon mokanta. Siya ang nag-popularize sa akong kanta nga “Wa’y Sama ang Gugma sa Dios”  nga matawag nato nga classic Cebuano religious song," pagpaambit pa ni Father Jed.

Dako niyang pasalamat nga ang sama niya nga usa ka probinsyanong nagikan sa Sambagon, Busay, Pinamungajan, nalakip sa mga listahan sa mga nabantog nga Cebuano composers kansang mga gipangtagik nga mga musika nakatatak na sa hunahuna sa mga tawo.

Bisan kinsa nga Sugbuanon, nakahibalo gyud sa awit nga "Among Gabayan"  nga gihatagan og kinabuhi ni Sheryn Regis.

Si Father Jed ang nag-compose sa maong awit  ug gani dako ang iyang kalipay sa dihang nalakip kini sa labing una nga successful debut album sa nabantug nga Sugbuanong singer nga si Sheryn Regis ubos sa Star Records.

Sa kinatibuk-ang bahin sa iyang pagka-composer, iyang gipaambit nga basta inspired siya, kon unsay musantop sa iyang hunahuna ug kasingkasing, mahimuan gyud niya kini og awit.

Matud niya, sa matag awit nga iyang gitagik, dunganan kini niya sa paghinuklog sa dakong hagit kon sa unsang paagiha magpabilin ug mokulit ang kanta nga iyang ginama sa katawhan aron dili kini malimtan sa paglabay sa panahon.

Gipadangat usab niya ang iyang dakong paghangop ug planong pagtabang sa mga bag- ong usbong nga mga kompositor karong panahona.

"Kon unsay anaa sa inyung hunahuna ug kasingkasing buhati kini og estorya diha sa melodiya ug lyrics unya dili maulaw pagduol sa ubang composers to solicit their advices,” matud pa ni Fr. Jed.

Q and A

BNH: Alang kanimo, unsay imong dakong naani sa imong pagka -composer?

Father Jed: Kini mao nga mas midaghan pa ang akong mga kaila ug mga higala sa natad sa musika.

BNH: Unsang panahona ang daghan kag na- compose nga mga kanta?

Father Jed: Kasagaran kanang duna ko’y bakante nga oras labi na sa kagabhion taliwala sa ka-busy sa akong schedule sa pagkapari.

BNH: Kinsay imong gihimong inspirasyon niining tanan nimong gibuhat isip pari nga composer?

Father Jed: Of course walay lain nga akong inspirasyon, ang atong  Ginoo uban sa akong mga kasinatian sa kinabuhi.