Cebu Pop Friday; Giganoy gyud sa Musika

Name:    Junnie Tampos

Nickname:             Junnie

Favorite Singer:    Michael Buble

Favorite Song:       Everything

Matud pa sa kadaghanan, bisag kinsa ang pwedeng mahigugma sa musika. Labi na kadtong mga tawong nakapangita og tim -os nga kalipay tungod niining butanga.

Mga nagkadaiyang istorya ang atong nadungan ilabi na kun giunsa nila pagsugod ang  paghangop sa  musika.

Sama na lamang ni Junnie Tampos  nga usa ka medical representative nga nakat-on  sa hingpit sa pagpagawas sa tinagoan niyang talento sa musika sa dihang nag -practice siya sa iyang pagka medrep sa usa ka tambalanan.

Matud  pa niya nahanas siya sa musika sa dihang nagsunod sunod ang iyang pagkanta sa mga nagkadaiyang kasal sa mga doktor nga nakauban niya kaniadto sa hospital nga iyang gitrabahoan.

Dugang pagkompisal ni Junnie nga may mga panahon kaniadto nga i-discourage siya sa iyang mga ginikanan kalabot sa musika apan bisa’g unsang paglikay ang gibuhat niya, nakamatngun siya'ng anhi ra gihapon ang iyang padulngan.

Ug sa maong kasinatian iyang napamatud-an nga adunay maayong dakong kaugmaon ang naghuwat kanimo sa unahan kon gihigugma nimo ang imong maayong binuhatan.

Sa natad sa musika, left and right na sab nga mga pasidungog ug pag- ila ang naangkon ni Junnie.

Tuig 2006 ug 2008 sa dihang nakatungtong siya sa grand stage  sa Cebu Pop Music Festival, ang nag-una ug nabantog nga songwriting competition sa Sugbo.

Ang duha ka mga awit nga naghatud kaniya sa maong prestihiyosong kompetisyon mao ang "Buhata Na", diin siya sab maoy nahimong lyricist ug interpreter niini ug ang "Sugilanon sa Hangin", nga siya usab ang lyricist niini ug gi-interpret ni Zandra Tan.

Dako ang pasalamat ni Junnie sa Cebu Pop sanglit matud pa niya nakapalig-on kini sa iyang self-confidence ug musicality wise, daghan sab siya'g nakat-unan dinhi.

Gawas niini, ubay-ubay na sab ang iyang mga gipangtagik nga mga nagkadaiyang awit nga mikulit na sa  panumduman sa mga Sugbuanon.

Sama na lamang sa Palawod Festival, ang jingle sa Lungsod sa Bantayan diin siya sab ang interpreter niini.

Samtang kinsa nga Sugbuanon ang wala mahigugma sa kaanindot sa awit sa "Simply Cebuana"? Ang mga liriko niini ginama usab ni Junnie.

Dugang pa niya, sa matag awit nga iyang pagabuhatun, maghunahuna usa siya og usa ka scenario base sa genre sa kanta nga iyang pagabuhatun arun sa ingun, magmalampuson siya sa iyang tinguha sa pagmugna og managlahing awit.

Pangandoy karon ni Junnie nga mahatagan og kahigayunan nga makatagik og kanta ug ipaawit kini ngadto ni Jed Madela.

Sugilanon sa Hangin nga pagahubarun sa Tagalog maoy gusto niyang ipaawit sa maong nabantog nga singer.

Sa natad sa awit, dugang pagpaambit pa ni Junnie, kinahanglang makuha sa singer o interpreter ang mensahe nga gustong hatagan og igung gibug-atun sa composer.

Sa habig sab sa usa ka singer, matud niya mas maayo gyud nga makuha nimo ang simpatiya sa imong audience pinaagi sa paghatag kanila og connection sa panahong paga-awiton ang usa ka kanta.

Q and A

BNH: Unsa'y imong ika-advice sa aspiring composers karon?

Junnie: Padayon lang sa inyong "passion" o hilig. Naay kaugmaon nga naghulat kaninyo.

BNH: Unsang panahona ang daghan ka'g ma-compose nga mga kanta?

Junnie: Dili matag-an. Usahay nag -drive ko unya naay musulod nga mga kanta sa akong huna-huna. Mao to maka -compose na dayon ko.

BNH: Unsa ang labing dakong leksyon nga imong nakuha sa imong pagka composer?

Junnie: Dili nimo mapugos ang imong kaugalingon sa pag-compose og mga awit labi na kun wala pa ka sa mood. Mao gyud nay akong nakat-onan. (BANAT NEWS)