Newspaper Bag

CEBU, Philippines - Matag adlaw, libuan ka mga mantalaan ang ma-apod-apod sa nagkadaiyang bahin lukop nasud. Human og basa sa mga balita  ug molungtad na og dugay sa balay, igo na lang kini nga idasok sa mga suok ug ipundo hangtod sa mapadulong na lang kini sa mga basurahan.

Kahibaw ba mo nga ang mga mantalaan, dili lang mga balita ug kalingawan ang gihatod niini? Kun wala, angayan nga sutaon  kini aron usab nga mamahimo pa nga kapahimuslan pagbalik ang mga gipundo nga mga mantalaan.

Suma pa sa www.instructables.com ,  daghang paagi ang pwede mahimo sa mga mantalaan. Usa na niini ang paghimo og trapo sa mga basa nga bahin sa salog o sa lamisa gumikan kay kusog kini motuhop sa mga basa. Gani, mamahimo usab kini nga cover sa mga notebook, libro ug uban pa.

Karon kat-unon nato ang paghimo sa usa ka newspaper bag aron adunay magamit isip sudlanan sa mga gamit nga dili pwede mga masagol sulod sa backpack sama sa sinina, gagmay nga garapon, sapatos ug mga importante nga papeles.

Sayun lang kini mugnaon. Sulod sa 10 minutos aduna ka nay kaugalingon nga paper bag. Gawas nga personal na kini, nakatipid usab ka ug dili na kinahanglan nga mopalit  og mahalon nga paper bag.

Mga gamitonon:

· Gunting

· Glue

· Newspaper/Mantalaan

· Cardboard

· Yarn

· Puncher

Ang proseso:

1. Maglatag og duha ka pahina sa mantalaan.

2. Ipahigda og pilo ug butangan og glue ang isig ka kilid aron mopilit. Kinahanglan nga balanse ang porma niini.

3. Sa ubos nga bahin, ipasulod kini og pilo. Mao usab ang himoon sa usa. Kinahanglan nga magtapot kini ug butangan usab og glue.

4. Human nga mo-uga ang napapilitan, mag-gunting og gamay nga bahin sa cardboard nga haum sa ubos nga bahin sa newspaper bag.

5. Butangan og glue ang cardboard ug ipapalit kini sa ubos nga bahin ug paugahon.

6. Iduot ang cardboard aron masiguro nga dili kini matangtang.

7. Gamit ang puncher, buslotan ang ibabaw nga bahin sa mantalaan aron makahimo og handle.

8. Maggunting og duha ka balig 7cm nga yarn ug ibutang kini sa buslot ug ihigot ang tumoy  aron maoy mo-unong sa paper bag. Kinahanglang adunay tagsa-tagsa ka yarn ang nakatapot.

9. Mamahimo na nga ibutang ang mga gamit nga imong gustong ibutang. Mas maayo og ibutang ang igo lang sa kapasidad sa maong newspaper bag.