Morissette nangharos sa wish awards

CEBU, Philippines - Emosyonal nga gidawat ni Morissette Amon ang pipila niya ka  major awards sa gipahigayong Wish 107.5 Awards sa Araneta Coliseum niadtong Lunes sa gabii.

Naangkon niya ang awards sama sa:

-Best Wishclusive Performance by Female Artist for “Secret Love Song”

-Best Wishclusive Collaboration for “I Finally Found Someone” with Arnel Pineda

-Wish Original Song of the Year by a Female Artist for “Throwback” ft. KZ Tandingan

-Wish Female Artist of the Year

-Wish Reactors Choice Award for “Secret Love Song”

-Wish Viral Video of the Year for “Secret Love Song”

-Wishclusive Elite Circle Bronze Award for “Against All Odds” and “Secret Love Song”

Mapasalamaton usab si Morissette sa tanan niyang fans gumikan kay mipakita gyud kini og tumang suporta alang kaniya.

Bucklet list ni Kathryn

Determinado ang Kapamilya aktres nga si Kathryn Bernardo nga atubangon na ang iyang mga katungdanan sa kinabuhi. Matud pa niya nga parte sa iyang bucket list ang  makabakasyon nga dili makauban ang iyang inahan o personal assistant. Dugang pa nga lakip usab sa iyang listahan mao ang masugdan na unta pagtukod ang iyang dream house karong tuiga

No filter post

Gi-uwan og pagsaway ang Kapuso aktres nga si Bianca Umali gumikan kay ni-post siya sa iyang social media account mahitungod sa paggamit og make-up sa mga kababayenhan karon. Kasagaran sa mga reaksyon sa netizens mao ang pagkumpara sa skin care nga naangkon sa mga artista ug sa mga ordinary  nga kababayenhan  nga sa make-up lang modepende. Sa iyang caption, iyang gipa-ambit ang importansiya sa make-up ug nihagit sa mga babaye nga mo-post usab og hulagway nga dili edited.

Wala’y kumpiyansa

Deretsohay ang  tubag ni 1969 Miss Universe Gloria Diaz sa dihang gipangutana siya kung aduna ba’y posibilidad nga mabuhat ni Maxine Medina ang back-to-back win alang sa Pilipinas karong tuiga. “No, but, I think she has a chance and a chance is one in a million”, suma pa ni Gloria.

Giuswag

Nadismaya ang  fans ni JK Labajo gumikan kay gipahibawo sa MCA Music nga dili una mahinayon ang pagahimoon nga birthday concert niini didto sa  Kia Theater karong Pebrero 5. Wala gidetalye ang rason niini  apan mipasalig  usab ang organizer  sa concert nga mo-refund sila sa mga napalit na nga ticket.

Dili prayoridad

Giangkon ni Angeline Quinto nga dili una niya prayoridad ang lovelife gumikan kay aduna pa siya’y daghan nga hatagan og dakong pagtagad sa iyang kinabuhi sama sa iyang pamilya ug career. Kahinumduman nga adunay taho nga nagbuwag na sila ni Erik Santos gumikan kay wala siya miuyon nga magpakasal niini. Nagmalaumon usab si Angeline nga unta naa pa si Erik nga modawat kaniya puhon kun pananglitan andam na siya mopaso  sa altar sa kaminyuon.

Nag-workshop sa Australia

Gisulti   ni  Jasmine Curtis  ang kahigayonan  atol sa pagtambong niya sa  film making workshop didto sa Victorian College of the Arts sa  Southbank, Australia. Malipayon nga gipahibalo ni Jasmine sa iyang Instagram followers nga daghan siya og nakat-unan sa maong workshop.

Dyosa na

Gibutyag ni  GMA-7 Vice-President of Drama Redgie Magno nga malakip si Regine Velasquez-Alcasid sa pantaserye   nga Mulawin vs. Ravena kung diin aduna siya’y crucial nga karakter nga pagadad-on. Matud pa usab sa program manager nga si Helen Sese nga usa ka  dyosa ang  papel ni Regine. “ Si Mother Nature. She turns into a bird tapos may powers. May power yung voice niya”, suma pa ni Helen.

Bilib kaayo

Nakadawat og daghang pagdayeg gikan sa viewers   ang performance sa child star nga si Xia Bernardo sa Your Face Sounds Familiar. Gani, nibilib usab kaniya  ang American blogger nga si Perez Hilton ug nalingaw kini pag-ayo sa iyang  performance sa  dihang gi-spoof niini si  Taylor Swift. Giawit ni Xia ang sikat nga awit ni Taylor nga “You Belong With Me”.

Wala tuguti

Sa unang higayon, giangkon ni Miss Universe 2010 4th Runner-Up Venus Raj nga wala siya tuguti sa Binibining Pilipinas Charities (BPCI) nga mukuha og interpreter sa dihang nisalmot siya sa 59th Miss Universe didto sa Las Vegas, Nevada, USA. Matud pa niya nga giingnan siya sa BPCI nga dili na niya kinahanglan ang interpreter gumikan kay ilado ang Pilipinas nga kamao molitok sa pinulungang Ingles. Dugang pa niya nga posibleng mas hugyaw ang iyang tubag kun nahatagan siya og interpreter.

Naglisod sa role

Ang singer ug talent manager nga si Carlos Orosa ang mohulip ni Michael Williams sa Dirty Old Musical nga ipahigayon sa Music Museum karong Enero 19-21. Usa ka gay role ang iyang papel sa maong musical. Tsika pa ni Carlos nga naglisod siya sa iyang karakter gumikan kay dili haom sa iyang edad ang dance steps nga iyang nakat-unan gikan sa choreographer. (BANAT NEWS)