Diana Zubiri pasok sa Encantadia!

CEBU, Philippines - Nagmaya ang followers sa  Encantadia 2016  sa dihang hingpit nang  nilugwa isip labing bag-ong cast si  Diana Zubiri sa maong pantaserye. Siya si Lilasari nga usa sa mamahimong  kaaway sa mga sang’res.

Usa sa nalipay og maayo mao si Sunshine Dizon gumikan kay makauban niya og balik ang aktres sa usa ka proyekto.

Kahinumduman nga si Diana maoy orihinal nga nidala sa karakter ni Danaya sa karaang Encantadia niadtong 2005, ug si Sunshine usab ang nidala sa papel ni Pirena.

Matud pa  ni Diana nga nisugot siya nga malakip sa Encantadia 2016 gumikan sa dakong pagsalig niya kang direk Mark Reyes. Nasayran nga taod-taod na nga nipahuway  si Diana sa pag-arte.

Niadtung Agusto lang gihimugso ni Diana ang iyang anak nga babaye nga ginganlan  og  Aliyah Rose.

Jaclyn gipahilak ni Charo

Wa kapugong ang  beteranang aktres nga si Jaclyn Jose sa pagpatubod sa iyang mga luha human niya madungog ang pagdayeg kaniya sa iyang kanhi boss nga si Charo Santos-Concio

Gihatagan og special recognition ang duha  sa  Film Development Council of the Philippines niadtong Martes sa gabii  sa  Cinematheque, Kalaw, Manila.

Si  Jaclyn maoy lead actress sa Ma’Rosa, samtang si Charo maoy  bida sa “Ang Babaeng Humayo.”

Nasayran nga  Ma’Rosa maoy pambato sa Pilipinas alang sa Best Foreign Language Film Category sa 89th Academy Awards.

Samtang nag- abot ang duha ka mga beteranang aktres ,   ilang gi-congratulate ang usa’g-usa kanila alang sa ilang naangkon nga mga pasidungog.

Ug dinhi nahimong emosyonal si Jaclyn tungod kay matud iyaha nga nahinumduman ang taas nila nga panag-uban kaniadto ilabi na sa pipila ka episodes sa Maalaala Mo Kaya.

Dugang pa ni Jaclyn nga bisag naa na siya karon  sa GMA-7 ,  dili gyud mawala sa iyang alimpatakan nga  taod-taod gyud niya nga nahimong  boss si Charo. Gipaambit usab ni Charo nga proud kaayo siya sa Cannes award-winning actress.

”All her performances in MMK were very memorable. Truly memorable. Hindi lang sa MMK, kundi sa maraming programa ng ABS-CBN,” nagkanayon si  Charo.

Ai-Ai mipasaylo na kang Kris

'In my heart, pinatawad ko na siya,”  mao kini ang gipabuhagay ni Ai-Ai delas Alas sa dihang gipangutana sa mga sakop  sa media  didto  kauluhan kun hingpit na ba gyud niyang napasaylo si Kris Aquino.

Kahinumduman nga niadtong naa pa sa  ABS-CBN si Ai-Ai nahimo niyang suod nga higala si Kris apan kalit na lamang nga naukyab ang katawhan  sa dihang  nagbungol ang duha nga hangtud karun wala gihapon nila hatagi’g katin-awan kung unsa ang tinuod nga hinungdan niini.

Gawas ni Kris, matud pa gipasaylo na sab niya ang lain pang mga personalidad nga nakasakit sa iyang dughan ug nakayatak sa iyang tawhanong katungod.

Ug labaw sa tanan nangayo usab siya’g pasaylo sa mga tawong iyang napasakitan.  (BANAT NEWS)