Sinulog idol 2016 champion: Nagduhaduha unta pagsalmot karong tuiga

CEBU, Philippines – Emosyonal ang 23-anyos nga kanhi Vice-President sa University of San Carlos Choristers nga  si Jose Thaddeus “Jared” Roble human niya nadunggan ang iyang ngalan nga gi-announce isip grand champion sa Sinulog Idol 2016.

Si Jared nibutyag nga wala siya magdahom nga siya ang ma–grand champion gumikan kay puros maayo’g tingog  ang ubang contestants.

“Unbelievable kaayo, kay all the contestants were amazing, but I really worked hard for this since day 1,” suma pa ni Jared sa dihang nahinabi sa mga sakop sa media pagkahuman sa Sinulog Idol 2016 grand finals niadtong Huwebes sa gabii nga gipahigayon diha sa Fuente Osmeña Circle.

Namakpak og kusog ang audience kang Jared atol pa lang sa iyang first song nga Light of a Million Morning ug natandog pag-usab sa iyang maanindot nga rendition sa iyang final song nga Open Arms.

Mapasalamaton  si Jared sa iyang pamilya ug sa iyang mga higala nga maoy nag-encourage niya pag-apil sa maong kompetisyon kay matud pa sa batan-on nga wala unta siyay plano mosalmot karong tuiga tungod kay para niya dili pa siya andam.

Mibutyag usab si Jared nga daghang blessings ang naabot niya karong tuiga ug ang labing dakong blessing nga iyang nadawat mao ang pagkab-ot sa usa sa iyang mga pangandoy nga mamahimong  grand-champion sa Sinulog Idol 2016.

“Salamat ni Senior Sto. Niño kay kung wala siya, wala ning tanan, daghan kaayo siyang gihatag nga mga blessings nako karon sa trabaho ug sa akong pagkanta,” butyag pa ni Jared.

Si Jared nakaangkon og cash nga prize nga P50,000, Samsung Galaxy S6 edge ug trophy gikan sa Sinulog Idol ug corporate sponsors niini.

Si Jared  miingon nga  iyang gamiton ang iyahang prizes para sa iyang kaugmaon ug para sa iyang pamilya.

Ang usa sa mga resident judges Banat News Hugyaw (BNH) editor Ryan Mark  nipadayag nga nindot gyud ang mga performance sa finalists ug bet niya si Jared ilabi na sa final round.

“I was rooting for Jared, he was not my winner pag first round but then I felt his emotion sa final song na. And I believe nga kung natandog ko sa song most probably mao sad nay gibati sa audience. He is really good actually,” matud pa ni judge Ryan.

Napili usab nga 1st runner-up ang heartthrob nga  tinun-an sa University of San Jose Recoletos nga si Denise Jeremiah “Kenji” Exaltacion kinsa miawit sa iyang emosyonal nga version sa One Last Cry.

“It feels so great because it was really unexpected because katong pagka first day pa lang. I was even told that I was one of the weakest and now I am the 1st-runner up that’s why I’m so happy,” matud pa ni Kenji.

Samtang napili nga 2nd-runner up sa Sinulog Idol  Season 7 ang usa ka registered nurse nga si Niña Riza Naputo.

Giawit niya ang sikat nga kantang “Through  The Rain” kung diin nakadawat siya og kusog nga pakpak gikan sa audience.

“Pasalamat ko sa akong pamilya kay naa gyud sila nagsuporta sa akoa, wala usab nako damha nga maapil ko sa top 3 kay maayo sila tanan, ang pinaka struggle nako mao ang practice nga grabi kaayo kakapoy,” matud ni Riza.

Si Riza kasamtangang mihunong sa iyang trabaho isip usa ka registered nurse aron maka-focus sa iyang singing career.

Nahugyaw usab ang mga audience sa opening number sanglit nigawas ang mga kanhi idols ug mas nahugyaw kini sa production number kung diin mikanta og Dark horse ang Katy Perry of the Philippines nga si Melody Hodgson kinsa produkto usab sa maong kumpetisyon.

Sa katapusang bahin sa show, nidalit sa hugyaw nila nga song number ang duha ka resident judges  nga sila si ex-Pinoy Dream Academy scholar Apple Abarguez, Ultimate Voice and Performance Coach Jay Unchuan ug midugang paghugyaw ang mga kanhi  mananaog sa maong kumpetisyon nga  sila si Jacqueline Chang, Rachel Faelnar, Ronna Lofranco, Chingkie Maylon, Claudio Deiparine ug si Kristina Cassandra Dilao.

Ang Rector sa Basilica Minore del Sto. Nino Rev. Fr. Jonas Mejares, OSA nanghugyaw usab pinaagi sa iyang OPM rock songs, diin gawas nga nalingaw ang audience, labihan sab nga naka abiba.

Nasayran nga karong tuiga giusab na ang format sa grand finals. Sukwahi sa nakalabay nga tuig diin magpili ang judges og top 3 aron maoy magtigi sa final round, karong tuiga ka duha gyud mukanta ang top 6. Sa second round, ang judges maoy magbuot sa ilang kantahon subay usab sa ilang gi-submit nga tulo ka mga awit.

Gidumala sa Cebu City Government, Sinulog Foundation ang hugyaw nga Sinulog Idol nga naa na karon sa ikapito ka tuig.