Miss Cebu 2016 TV host/DJ gyud ang rayna!

CEBU, Philippines - Naangkon sa maanyag nga Fil-Croatian ug crowd favorite nga si Gabriele Raine Baljak ang titulo nga Miss Cebu 2016 niadtong Miyerkules sa gabii, atol sa mabulukon ug hugyaw nga coronation night diha sa Grand Ballroom sa Cebu City Waterfront Hotel.

Nagkanayon si Baljak nga mao kini ang labing una nga indigay nga iyang gisalmotan  busa  dakong garbo alang kaniya nga naangkon ang titulo. Sakop siya sa Origin Model Management nga gidumala ni Sven Chua.

Suma pa niya nga wala gyud niya damha nga mapili nga Miss Cebu ilabi na nga puros  lig-on ang tanang contestants

Nakadawat usab siya og minor awards nga naglangkob sa Kapamilya Star of the Night ug Best in Evening Gown.

Kasamtangang nagtrabaho si Gabriel isip TV host sa cable channel nga MyTV ug disc jock sa 105.9 Monster Radio

Nahugyaw ang audience sa tubag ni Gabriel atol sa question and answer portion nga nagkanayon: “If you could talk to the reigning Miss Colombia to convince her to visit Cebu, what would you tell her?”.

Nitubag ang 19 anyos nga si Gabriele og, “As a proud Cebuana, I would tell her to visit Cebu, as this is where the heart sings. Cebuanos have genuine passion—we love to share, and we care about our people. Miss Colombia is gorgeous and confident, but for me, she had too much confidence and sometimes that goes the other way. Coming here to Cebu, she will learn to enjoy simple things in life, because Cebuanos are happy no matter what, and that’s what makes Cebu, truly, where the heart sings.”

Usa sa iyang adbokasiya mao ang pag-ugmad sa mga programa alang sa kabataan.

Usa sa rason sa maayong pamorma sa iyang lawas gumikan kay dili siya mokaon og karne. Prutas ug utanon lang ang iyang kinaon sulod na sa duha ka tuig. 

Natawo siya sa Australia apan nakatungha siya sa usa ka international school dinhi sa Sugbo. 

Bukas siya sa posibilidad nga mosalmot puhon og mga dagkong indigay apan hatagan una niya og atensyon karon ang iyang mga responsibilidad isip bag-ong modelo sa kabatan-onan sa dakbayan sa Sugbo.

Kanhi beauty queen ang iyang inahan nga si Merce Abellana kinsa maoy napili kaniadto nga Cebu’s Five Prettiest – Australia  1986, runner-up pud usab sa Miss Mandaue 1984 ug nahimong semi finalist sa Bb. Pilipinas 1990.

“Grabe gyud ang support nga gihatag namo ni Gab, ang friends nako sa laing country kay nanganhi lang gyud para motan-aw,” suma pa sa inahan ni Gab nga si Merce.

Ang mga runner-up ni Gabriele mao sila si  Tracy Maureen Perez (1st runner-up), Shaila Mae Rebortera (second runner-up), Merl Gayo (3rd runner-up), ug  Felina Joyce Lim (4th runner-up) kinsa mao usab ang napili  nga  Miss Friendship ug Miss Photogenic.

Samtang si Jun Escario maoy nakadawat sa award nga Best Evening Gown Designer. Siya maoy nagdesinyo sa gown sa candidate no. 10,  nga si  Bea Clarisse Raboy.

Sa pagsugod sa maong kalihukan, gisugdan kini sa engrandeng dance number uban sa mga kandidata kung diin gisul-ob nila ang mugna nila ni Rey Villegas, Hadji Godinez, Peewee Senining ug Roni Yu.

Gitawag kini og “hablon” nga gikan sa Argao  nga tipik sa Hablon Extension Program sa  Cebu Technological University Argao- Campus.

Samtang ang barong-style outfit sa mga kandidata gimugna sa Cebuano designers nga si Brian Aloquin, Yvonne Quisumbing, Edwin Ao, ug Valerie Alvez.

Samtang ang  mga evening  gown sa kandidata mugna nila ni Ditas Rodriguez, Marichu Tan, Albert Arriba, Ren Manabat, Philip Tampus, Wendell Quisido, Arcy Gayatin, William Manahan ,OJ Hofer,  Jun Escario, Harley Ruedas ug Dino Lloren.

Ang mga hurado naglangkob sa fashion designer nga si Christian Espiritu, ang aktor nga si  Rowell Santiago,  Robinsons Land Corp. president Frederick Go, model-fashion photographer nga si  Joanne Bitangcol, ug stage designer  ug author  nga si Gino Gonzales.

Gipakita usab sa Cebuano  entertainers  ang ilang abilidad  nga naglangkob sa   Freestylers, Disco Jammers, UC Dance Company, Knapsack Dancers, Danielle Mae Ozaraga, Awit Awardees’ Tria Bascon ug The Voice finalist’s Etore “Thor” Dulay. 

Ang hunk model nga si Clint Bondan Wachsmuth ug Miss Earth 2008 Karla Henry maoy main hosts niadtong gabhiona, samtang segment hosts sila si Miss Cebu 2009 ug Miss Intercontinental 2014 2nd Runner up Kris Tiffany Janson, Miss Cebu 2010 Mia Ali Faridoon, ug Miss Cebu 2014 Diane Muego.

36th Cebu POP Pilita  molingaw sa mga Sugbuanon karong gabii

Gipaabot  nga mapuno sa hudyaka ang 36th Cebu Popular Music Festival gumikan kay molugwa karong alas 7:30 sa gabii isip special guest ang beteranang singer nga garbo sa Sugbo nga si Pilita Corrales.

  Nasayran nga dako og natampo si Pilita sa music industry ug siya maoy nagpasikat sa awit nga A Million Thanks To You, Ako Raw ay Makasalanan, Ampingan Mo ba Ang Dalaga ,Noon at Ngayon, Ang Diwa ng Pasko ,Ang Kawayan, Ang Pag-ibig, Ang Pipit, Sayaw sa Ilaw, Sayo sa Kabuntagon,Sinumpa Ko sa Diyos, Sumpang Walang Hanggan ,Tama Na ,The Shadow of Your Smile ug daghan pa.

Gibahin gihapon sa tulo ka kategoriya  ang Cebu Pop karong tuiga nga naglangkob sa love, inspirational  ug environmental songs.

Suma pa sa project director sa Cebu Pop nga si Gloria Villarojo nga upat ka entries ang magtigi sa matag kategorya busa moabot og kinatibuk-ang 12 ka finalists ang maong kompetisyon.

Ang mahimong grand winner matag kategoriya, makadawat og P100,000 samtang ang non- winners, aduna gihapo’y consolation  prize nga madawat lakip na ang best interpreter. Nasayran nga napuno sa mga sorpresa ang i-perform sa mga interpreter matag komposisyon .

Gikahinaman na pag-ayo matag tuig ang Cebu Pop ilabi na sa mga mahiligon sa musikang binisaya.

Natukod ang Cebu Pop aron mapadayag sa katawhan pinaagi sa pagkanta  ang gugma nila ngadto sa  Balaang Bata nga si Senor Sto. Niño ug sa samang higayon ,  molambo usab ang  music industry dinhi sa Sugbo.

Ebidensya sa kalig-on sa maong kompetisyon mao ang nahimong produkto sama sa mga sikat nga mga  mag-aawit nga sila si Anna Fegi, Sheryn Regis, Raki Vega, Vina Morales, Dulce, Chad Borja, Eva Santos ug uban pa.

Gatosan ka entries ang nadawat sa screening committee sa katapusang bahin sa miaging tuig busa dili basta-basta ang pagpili sa 12 ka finalists.

Ang maong engrande  nga kalihukan maoy tinuig nga  halad ni kanhi kongresista sa unang distrito sa probinsya sa Sugbo Eduardo Gullas, isip pagpadayag sa iyang dakong gugma ngadto sa Balaang Bata nga si Senor Santo Niño ug agi’g pag-abag usab sa paglambo pa sa Sugbuanong musika.

Finalists:

Inspirational category

Kinabuhi Ka Musika by Nathan Philipp C. Amores

Diha sa Pulong Mo  by Bienvenido Racho/ Dennis Canares

Gugma Ma, Kadaugan Ko by Michaen Ricaborda

Ngano Kaha  by Irene Abadiez Bacus

Environmental category

Asa Ta Punita  by Russel Chingkoy Alegado

Manguros Na Lang Tang Daan by Jade Castro

Isla  by Dennis Martin

Kinaiyahan Matahum by Venice June Sy Corsino

Love Song Category

Sa Gugmang Magdaog by Rad Zamora

Sama Sa Dahong Laya  by Angelito Zamora Jr.

Awit Ning Gugma  by Ralph Maligro

Ang Atong Gugma by Archimedes Dairocas/ Luis Sebastian

Rusiana Latigo Kapuso stars motikang sa Cebu

Mohatag og libreng kalingawan alang sa mga Sugbuanon ang pipila ka Kapuso stars sugod karong adlawa hangtud na ugma.

Karong alas tres sa  hapon, motikang diha sa Gaisano Grand Mall Mactan ang mga bitoon  sa afternoon drama series  sa GMA-7 nga Buena Familia nga sila si Kylie Padilla ug Kenneth Earl Medrano. Sa alas singko sa hapon anha na sab sila sa Ayala Terraces mupasundayag.

Makauban nila ang cast sa Little Nanay, nga sila si Mark Herras ug Kris Bernal aron mag-promote sa bag-o nila nga serye.

Ugma sa alas singko sa hapon, January 16, molingaw sa mga Sugbuanon ang Because of You leading men Gabby Concepcion ug Rafael Rosell diha sa  Gaisano Grand Fiesta Mall Tabunok. Makauban nila ang Destiny Rose stars nga sila si Ken Chan ug Katrina Halili.

Maanyag nga Coco

Trending sa social media ang girl-look nga  hulagway ni Coco Martin nga tipik sa eksena sa seryeng   Ang Probinsyano sa ABS-CBN.

Unang nilugwa ang maong hulagway sa  official Instagram account Dreamscape Production.

Pipila sa netizens ang nipadayag nga gipamatud-an gyud ni Coco nga usa siya ka banggiitan nga aktor.

Daniel todo pangandam

Magpatukod og dakong balay si Daniel Matsunaga dinhi sa Pilipinas ug giingong mao kini ang puy-an nila ni Erich Gonzales  sa higayon nga sila magminyo. Gipaneguro ni Daniel nga si Erich na gyud ang iyang makauban hangtud sa altar sa kaminyoon.

Naka-P100M

Gi-post ni Jennylyn Mercado sa Instagram nga matud pa  nakaabot P100 million ang kita sa pelikula nila ni Jericho Rosales nga #WalangForever . Wala damha ni Jen ang kadako sa kita niini.

Kuya Germs gilubong na

Gilubong na kagahapon si  German “Kuya Germs” Moreno sa  Loyola Memorial Park sa  Marikina. Kahinumduman nga namatay si Kuya Germs gumikan sa cardiac arrest niadtong Enero 8.  Nagsugod si German sa showbiz niadtong 1960s ug ubay-ubay na ka mga artista ang iyang natabangan.

Front act ni Nate

Si  Iñigo Pascual maoy  front act sa  upcoming  Manila concert sa  American singer-songwriter nga si  Nate Ruess sunod semana. Dakong garbo alang kang Iñigo nga mahimong kabahin sa concert sa sikat nga singer.

Bag-ong kanta

Gi-release na ang bag-ong single ni Gloc-9 nga Ang Pareho Tayo . Mapasalamaton si Gloc-9 sa tanan niya nga supporters gumikan kay mao kini ang rason nga nagpabilin gihapon ang iyang singing career.