Istrikta si Tiya Bebeng: Ms. Gloria Romero pasok sa Kalyeserye

CEBU, Philippines - Nahugyaw ang kadaghanan sa pagsulod sa  ’50s movie queen nga si Ms. Gloria Romero sa episode sa  Kalyeserye sa  Eat Bulaga! kagahapon.

Si Gloria maoy midala sa papel ni Tiya Bebeng, ang istrikta nga iyaan sa De Explorer sisters nga sila si Nidora (Wally Bayola), Tinidora (Jose Manalo), ug Tidora (Paolo Ballesteros).

Kahinumduman nga sa miaging mga episode  sa Kalyeserye, nakadawat  og suwat  ang magsuon gikan kang  Tiya Bebeng nga moabot siya gikan sa Cebu aron mobisita kanila. 

Mipadayag si Tiya Bebeng nga dili siya ganahan makakita sa tulo nga mosul-ob og mubo nga sapot, baga nga makeup, sipat nga linihokan,  saba nga  music, ug  makig-istorya og mga lalaki.

Nipis lang ang make-up ni Tidora kagahapon; hinay-hinay lang si  Nidora sa iyang pagsayaw; ug taas ang sapot ni Tinidora.

Lakip sa nangandam og maayo sa pag-abot ni Tiya Bebeng mao si Yaya Dub (Maine Mendoza) .

Sa pag-abot ni Tiya Bebeng , gipadayag niini nga nanluod siya sa magsuon gumikan kay dugay na siya nga wala giduaw.

Sama sa  “Tamang Panahon” concert , wala usab siya makadawat og imbitasyon.

Giboking nila ni Tinidora ug Tidora si Nidora nga maoy responsable sa tanan.

Gisukit-sukit usab ni Tiya Bebeng si Yaya Dub kalabot sa balita nga iyang nadunggan nga duna’y lalaki nga midiskarte niini.

Samtang nilenggua si Yaya Dub nga si Lola Nidora maoy nihatag og pagtugot kaniya nga duna’y lalaki nga makapangulitawo kaniya.

Hangtud nga miabot si  Alden Richards nga miharana kang  Yaya Dub pinaagi sa pagkanta og “God Gave Me You” gumikan kay 16th weeksary nila kagahapon.

Gisukit-sukit ni Tiya Bebeng si Alden ug nagsilbing taga depensa sa aktor mao ang tulo ka mga lola.

Gibutyag ni Tiya Bebeng nga mubo ra kaayo ang  16th weeks nga  pagpangulitawo ni  Alden ug nitubag ang aktor og,” Nangangako po akong handa akong maghintay at gagawin ko po ang lahat para maging karapat-dapat kay Yaya dahil maganda po ang hangarin ko para sa kanya.”

Daniel nag-negosyo

Malipayon si Daniel Matsunaga gumikan kay nakita na gyud niya ang hinagoan niya sa showbiz ug kini mao ang gipatukod niya nga restaurant sa Pasig City nga gibuksan na niining bag-o lang. Suma pa ni Daniel nga nangandam na siya daan gumikan kay dili sa tanang panahon magsagunson ang iyang proyekto sa showbiz.

Talento ni Solenn 

Gibutyag ni Solenn Heussaff nga mahitabo na gyud sa unang bahin sunod tuig ang gipangandoy niya nga exhibit alang sa iyang paintings. Usa kini sa talento sa aktres nga iyang gipasigarbo ug nagmalaumon siya nga mohangop ang mga tawo sa iyang mga mugna.

Espesyal gihapon 

Gipadayag ni Jake Vargas nga dakong parti sa kasaysayan sa iyang kinabuhi ang iyang ex-girfriend nga si Bea Binene busa wala gyud niya sipata ang 18th birthday party niini. Suma pa sa aktor nga wala gyud sila magdumot sa usa’g-usa bisan pa man sa kalit nila nga panagbuwag kaniadto.

Sa sakyanan matulog

Tsika pa ni Alden Richards nga sa sakyanan na siya makahigayon og pahuway busa dili siya ka-feel og grabeng traffic. Matud pa niya nga matulog gyud siya og maayo sa bakante niya nga oras. Nagbaha ang proyekto karon sa aktor busa kawat-kawat na lang iyang katulog.

Gisekreto pa 

Tak-om pa ang Star Cinema kung kinsa nga pangalan ang ilang napilian aron maoy mahimong bida sa pelikulang Darna. Pipila sa mga pangalan nga nanggawas nga maoy gipilian sa maong role mao sila si Anne Curtis, Liza Soberano, Kathryn Bernardo, Julia Montes, Jessy Mendiola, ug Coleen Garcia.

Makakita na sa idolo 

Nia karon sa Pilipinas ang anak ni AiAi delas Alas nga si Sophia ug malipayon kini gumikan kay makakita na gyud siya sa iyang idolo nga si Alden Rihards. Dinhi sa nasud magsaulog si Sophia sa Pasko ug Bag-ong tuig.

Valerie magminaldita

Kontrabida sa kinabuhi nila ni Carla Abellana ug Gabby Concepcion ang role ni Valerie Concepcion sa upcoming series sa GMA-7 nga Because of You. Giandam na sa aktres ang iyang kaugalingon sa posibilidad nga kalagotan siya sa viewers.

Nakasulod sa Top 5

Nakatungtong na sa Top 5 sa X-Factor Australia ang 18 anyos nga Pinoy nga si Cyrus Villanueva. Nasayran nga todo suporta ang nadawat niya gikan sa Filipino community sa maong dapit. Kahinumduman nga nahugyaw ang mga hurado kaniya sa pagkanta niya og “Knockin’ On Heaven’s Door” sa miaging gabii.

Sila na gyud 

Dili na gyud mabangbang ang kasikat nila ni Alden Richards ug Maine Mendoza gumikan kay human sila na-feature sa BBC News, Bloomberg ug uban pa nga international news network, gi-feature na usab sila sa ABC News channel didto sa Australia.

Lakbay2Love

Sila si Dennis Trillo ug Solenn Heussaff maoy mga bida sa environmental/romantic film nga Lakbay2Love. Malakip usab sa maong proyekto ang Kapamilya star nga si Kit Thompson ug gikatakda kini nga ipasalida karong February 2016. Suma pa ni Dennis nga gaan kaayo ang iyang pamati sa dihang gigama niya ang maong proyekto gumikan kay adlawan kasagaran ang shooting niini.

Janella ug Julia sa MMK

Sila si Julia Barretto ug Janella Salvador ang modala isip magkaluha ugma nga episode sa drama anthology nga “Maalaala Mo Kaya” sa ABS-CBN.

Nasuwayan na ang abilidad sa duha sa MMK kaniadto. Si Julia maoy bida sa “Bracelet”, samtang si Janella nahimong kabahin sa episode nga “Selfie.”

Nalipay ang duha sa ilang panag-uban sa MMK gumikan kay komportable na sila daan sa usa’g-usa sanglit ka-batch man sila sa Star Magic. 

Malakip si Julia sa umaabot nga serye   sa ABS-CBN nga “And I Love You So” uban nila ni Iñigo Pascual ug Miles Ocampo, samtang si Janella molugwa sa horror film nga “Haunted Mansion” nga entry sa  Metro Manila Film Festival 2015. (Sanden J. Anadia)

Sylvia pasidunggan sa Gawad Amerika Awards

Makadawat og pasidungog si Sylvia Sanchez sa umaabot nga Gawad Amerika Awards nga himuon sa Celebrity Center, Hollywood, California karong November 7 ug nagpanikad na siya sa pagrampa sa red carpet.

Siya maoy modawat sa tropeyo nga nagtangag sa titulo nga  Most Outstanding Filipino Performer In Film and TV gumikan sa pelikulang “The Trial” ug sa seryeng  Be Careful With My Heart .

Nasayran nga taud-taud na gyud nga gipangandoy sa aktres nga makadawat og pasidungog sa nahisgutang award giving body.

AlKris mag-ubanog balik

Subling magpares sa usa ka proyekto ang mga produkto sa StarStruck season 4 nga sila si Kris Bernal ug Aljur Abrenica.

Mag-uban ang duha sa pelikula nga nag-ulohan og EDSA ug gisugdan na ang shooting niini niadtong Miyerkules.

Pipila sa mga eksena niini ang himuon gyud mismo sa EDSA busa nangayo na sila og pasaylo daan gumikan kay makahatag gyud sila og gamay nga problema sa trapiko.

  “All scenes will be shot entirely in every part of EDSA! So expect heavier traffic in the coming days!! Sorry po. Pero promise, maganda po itong pelikulang ito!” mensahe pa ni Kris nga gi-post niya sa  Instagram.