International stars nakuryuso sa #AlDub
CEBU, Philippines – Gumikan sa 12.1 million tweets nga naangkon sa AlDub (Alden Richards ug Maine “Yaya Dub” Mendoza) loveteam atol sa una nilang date niadtong Sabado sa pagpadayon sa Kalyeserye sa Eat Bulaga, lakip ang mga international stars nakuryuso na kabahin niini.
Una nga na-intriga mao mismo ang singer nga si Bryan White ang tingog luyo sa subling nisikat karon nga kanta nga “God Gave Me You” nga maoy kanunay gamiton nila ni Alden ug Yaya Dub sa ilang kilig moment kada adlaw.
Gumikan niini, nakapangutana si White unsa ang Aldub ug dali usab nga gipasabot sa AldubNation, ang fans club sa Aldub, nga usa kini ka sikat nga loveteam karon sa Pilipinas.
Hinungdan nga naghimo og thank you video si White ug nisaad nga sa umaabot niya nga world tour, paningkamotan gyud niya nga malakip ang Pilipinas aron personal siya nga magpasalamat sa paggamit sa Aldub sa iyang kanta.
Ang nahisgutang awit ni White unang nisikat dinhi sa nasud mga upat ka tuig na ang nilabay.
Laing nakuryuso gumikan sa pagtrending sa Aldub niadtong Sabado mao si Barbie Sue nga mas naila isip Shan Cai sa sikat kaayo nga Taiwanese version sa “Meteor Garden” nga gikabuangan sab og maayo sa mga Pinoy pipila ka tuig na ang nilabay.
Wala naglangan ang mga fans sa Aldub sa pagpasabot kang Barbie unsa ang maong trending nga hashtag matag adlaw.
- Latest