Luis nagpaklaro na?

CEBU, Philippines - Misamot ang mga pagduda nga mosalmot sa piniliay si Luis Manzano karong 2016 didto sa Batangas. Mopalit na ang TV host og kaugalingong property sa maong dapit.  Nangayo si Luis og usa ka buwan sa dili pa siya mopakanaug sa iyang hukom kung mosulod ba siya o dili sa politika.

Tatak Pinoy

Usa ka local designer nga ginganlan og Veluz Reyes ang modesinyo sa wedding gown ni Heart Evangelista.  Gihatagan og importansya ni Heart ang designer nga nagbase sa atong nasud.

Marian kusinera ni Dingdong

Gilutoan gyud ni Marian Rivera og sinigang ug adobo si Dingdong Dantes kinsa bag-o pa naabot gikan sa Germany. Suma pa ni Marian nga paborito kaayo ni Dingdong ang nahisgutan nga mga pagkaon.

Lig-ong serye ang ihulip

Aminado ang ABS-CBN nga mohimo sila og  lig-ong serye  nga maoy ihulip sa naghinapos na nga Be Careful With My Heart.   Nasayran nga kusog kaayo sa masa ang Be Careful With My Heart busa na-pressure ang maong network kung unsa nga programa ang ibutang sa timeslot niini. 

Nag-ipon na

Giangkon sa nagsabak nga aktres nga si  Melissa Ricks nga nag-ipon na sila sa iyang boyfriend nga si Charles Togesaki. Gusto sa iyang uyab nga mangunay kini og atiman kaniya. 

Nagkagrabe ang gugma

Todo post si Kylie Padilla og love quotes sa iyang Twitter account. Nasayran nga inspired si Kylie sa kapares niya sa pelikulang Dilim nga si Rayver Cruz.

Church wedding ipadayon

Ipadayon gyud ni Alfred Vargas ang church wedding nga gisaad niya sa iyang asawa nga si Yasmine Espiritu. Kahinumduman nga gikasal ang duha didto sa Italy apan ilaha pud nga gipangandoy nga makasal sa simbahan dinhi sa Pilipinas.  Sabotan pa sa magtiayon ang tataw nga petsa alang niini.

Gigastohan og maayo

Wala igsapayan ni John Prats ang dako niya nga nagasto sa pag-propose niya kang Isabel Oli . Ang labing importante kaniya nga nagmalampuson kini. Nasayran nga dunay talent fee ang 350 ka dancers nga niapil sa flash mob  nga tipik sa presentasyon sa wala pa siya nag-propose kang Isabel.

Aprobado sa pamilya

Gipadayag ni  Toni Gonzaga nga andam na ang iyang pamilya kung pananglitan magpakasal na sila ni Direk Paul Soriano. Suma pa ni Toni nga nangita na lang sila og tukmang panahon alang niini.

Gabriela hinabion ni Coco

Gipasalig ni Coco Martin nga magbinantayon na siya sa iyang mga buhaton ug kinahanglan nga susihon una niya  kung dunay ipatrabaho kaniya.

Mao kini ang nakat-onan ni Coco sa dihang giapil siya og saway sa publiko kalabot sa pagrampa niya sa fashion show sa Bench kung diin giguyod niya ang babaye nga modelo.

Nagplano ang aktor nga hinabion ang mga  opisyales sa  Gabriela  Party-List  ug  Philippine Women Commission aron personal siya nga makapangayo og pasaylo.

Matud pa niya nga duna gyud siya'y mga pagkulang ug gipadayag niya nga dili na kini mausab.

Nagpatawag og presscon kagahapon si Coco uban sa iyang mga  abogada nga sila si Atty. Lorna Kapunan, Sonya Castillo, ug  Russell Tacla

Gipadayag ni Atty. Kapunan nga na-insecure lang  si Coco gumikan kay foreigner ang kauban niya sa pagrampa.

"The fact that the woman is not complaining is a strong evidence she does not feel violated," suma pa ni Atty. Kapunan.

Ang manager ni Coco nga si Biboy Arboleda nibutyag nga naapektohan gyud ang aktor sa isyu nga  giatubang niini.

Pagpalambo sa music industry sa Sugbo, ingon  man usab ang pagdiskubre og mga tawo nga dunay talento sa pagkanta. Kini maoy nahimong papel sa magtiayong Gani  ug Gloria Villarojo kinsa maoy nahimong kabahin sa dagan sa produksyon sa nabaniog na nga mga kompetisyon dinhi sa Sugbo sa natad sa musika nga naglangkob sa Cebu Pop Music Festival, Sinulog Idol ug Huniño :Huni Halad Alang Kang Señor Santo Niño.

Nabuhat nila kining tanan isip paghalad ngadto sa Balaang Bata nga si Senor Santo Niño.  Managsama silang duruha nga mga debotos sa hataas na nga panahon. Nagsugod ang istorya sa gugma nila ni  Gloria ug Gani sa dihang nagkaabot silang duha sa University of San Jose Recoletos.

Graduating niadtong higayona si Gloria sa kursong Hotel Restaurant and Management , samtang si Gani nag-part time teacher sa maong unibersidad.

Mahiligon si Gloria sa pagsalmot og mga pageant sa ilang tunghaan, samtang si Gani nahimong ilado sa USJR niadtong higayona sanglit kanunay man kini mohalad og kanta kung dunay mga event sa maong tunghaan.

Sakop si Gani sa drama society, samtang si Gloria nalakip sa cultural group. Usa niana ka higayon nagkauban ang ilang grupo sa usa ka show didto sa China.

"Mao to, samtang nagdagan ang praktis, ako siya nga naila-ila og maayo. Nagkasuod mi og maayo kay duna ma'y part sa play nga moharana ko niya, " saysay ni Gani kabahin sa sinugdanan sa ilang love story.

Matud pa ni Gani nga nakabig ang iyang atensyon ngadto kang Gloria gumikan sa pagkamapahiyumon niini, ug kay dili kini arte.

Samtang si Gloria sa iyang bahin, niangkon nga malingaw gyud siya kang Gani gumikan kay duna kini sense of humor busa dili kini boring ikahinabi.

"Napansin na gyud nako nga ganahan siya nako, kay siyempre, permi gud ko niya ihatud padulong uli kung mahuman na among praktis," nagkatawang giangkon ni Gloria.

Nagkasuod sila og samot hangtud nga matawag na sila nga uyab niadtong August 14, 1988.

Wala mag-agi og pormal nga pagpanguyab si Gani ngadto kang Gloria sanglit gipadayag lamang nila ang ilang mga pagbati pinaagi sa buhat. Ug sa nahisgutan nga petsa, nahimong pormal ang tanan kabahin sa ilang gibati sa usa’g-usa.

"Nikupot siya sa akong kamot, nag-istoryahanay mi og maayo, niprangka ko niya kung unsa man gyud mi, klarohon ni natu,  mao tu niana siya nga this is it, hahaha, " nagkanayon si Gloria.

Aminado si Gloria nga dili gyud grabe ka sweet si Gani, dili kini mahiligon kaniadto sa paghatag og buwak o ba kaha chocolate ngadto kaniya.  Bilib lang si Gloria sa estilo ni Gani  gumikan kay segurista kini sa pagdiskarte.

"Maniguro man gud siya (Gani) nga kung intresado siya sa babaye, dapat intresado sad kini kaniya, ana lang, hahaha," dugang pa ni Gloria.

Samtang si Gani nipaambit nga nindot kaayo nga makauban si Gloria gumikan kay masinabtanon gyud kini nga pagkatawo, gani mura ra og managhigala ang trato nila sa usa’g-usa ug mao kini ang rason nga alegre ang ilang relasyon.

Pag-abot sa tuig 1996,   nasakit ang mama ni Gloria kung diin giatake kini sa sakit nga diabetes. Nakaingon si Gloria nga kung maabot man gani ang panahon nga magpakasal sila ni Gani, dili siya ganahan nga mag-inusara  sa pagpaso paingon  sa altar sa kaminyuon ug gusto niya nga makauban ang iyang inahan.

"Seguro sakto na man pud ang among edad ato, dili ko ganahan mopaso nga wala akong inahan. Ako giingan si Gani kung okay ra ba nga magminyo nami, haha, ako na ni-propose. Na-shock si Gani kay P20 mil ra intawon iyang kuwarta, ako siya giingnan nga mapangitaan ra na og paagi," nagkanayon si Gloria.

Nahitabo gyud ang ilang kasal niadtong December 7, 1996 ug dako ang ilang kalipay gumikan kay duna sila'y mga suod nga higala nga ni-sponsor sa uban nila nga mga kinahanglanon sa maong okasyon. "Pasalamat ko og maayo kay supportive man kaayo ang among friends,” matud pa ni Gani.

Sa ilang kaminyoon, wala gyud sila kasuway nga duna sila'y grabe nga away. Kung duna man gani butang nga wala sila magkasinabot, ilaha gyud kini nga istoryahan aron dali kini nga masulbad.

"Wa gyud na mahitabo ,nga magsyinagitay mi , basta wa ko kahinumdom nga nag-away mi og maayo, " dugang pa ni Gani.

Nahimugso ang Soundtraxx

Mahiligon si Gani sa musika busa nagtukod sila ni Gloria og recording studio, ang Soundtraxx Production Studio, niadtong 2000  ug nagmalamboon kini hangtud karon.

Nahuna-hunaan sa duha nga mobiya sa tagsa-tagsa nila ka trabaho aron maka-focus sa ilang negosyo.

Sanglit managhigala man sila hapsay kaayo ang dagan sa ilang mga produksyon, diin tataw kaayo nga si Gloria gyud ang production manager ug si Gani maoy musical director. Inig pamauli nila, balik sila isip managtiayon.

"Seguradoon lang gyud namo nga dili mi magka-conflict  sa among trabaho. Sa una pa gyud, hilig na kay ko anang mag-organize og kalingawan sa fiesta sa among kapilya. Seguro nagamit gyud na nako. Si Gani pud, maayo man gyud siya anang pag-arrange og kanta sa una pa. Among gitapok among talento, moresulta siya sa hapsay nga trabaho," paambit ni Gloria.

Pag-abot sa tuig 2005, nakahuna-huna sila nga  motabang sa mga kalihukan sa Sinulog, ug nahuna-hunaan nila ang pag-release og CD sa finalists sa Cebu Pop.

Hangtud niining higayona, nahimo na gyud sila nga kabahin sa Cebu Pop, Huniño ug Sinulog Idol ug gipasigarbo nila nga ubay-ubay nga produkto sa maong mga kompetisyon ang nagmalampuson gyud.

Pipila sa mga produkto sa Sinulog Idol ang nagtrabaho na isip singer sa barko ug uban pa nga mga dagkong hotel. Nahimo usab nga kabahin niadto sa Cebu Pop sila si Sheryn Regis, Raki Vega, Vina Morales, Dulce, Chad Borja, Eva Santos ug uban pa.

Matag tuig na nga pagahimuon ang Cebu Pop  isip halad ni kanhi  First District Representative Eduardo R. Gullas  isip pagpadayag sa iyang dakong gugma ngadto sa Balaang Bata nga si Senor Santo Niño ug agi’g pag-abag usab sa paglambo pa sa Sugbuanong musika.

"Malipay na kaayo mi kung makatabang mi sa mga tawo, nindot kaayo paminawon nga nahimo ka nga part sa kalamposan sa ilang kinabuhi. Dapat mangandoy gyud ta, mag-unsa ra man ka kung wala ka'y damgo. Maningkamot gyud ta para mahimo  ang gustong mahitabo nato sa atong kinabuhi,"  mensahe ni Gloria. (BANAT NEWS)