Kagahapon og karon: “She’s Dating The Gangster”

CEBU, Philippines - Ang nasugdan kagahapon, tapuson sa kasamtangan. Ingon niini ang dagan sa istorya sa umaabot nga pelikula sa Star Cinema, "She's Dating The Gangster" starring Kathryn Bernardo ug Daniel Padilla, sa direksyon ni Cathy Garcia- Molina.

Kinutlo gikan sa usa ka sikat nga fan fiction online novel, magsugod ang istorya niining maong pelikula tali nila ni Athena (Kathryn) ug Kenji (Daniel). Magpaka aron ingnon ang duruha nga nagkahigugmaay, aron pasuyaon ang ex-girlfriend ni Kenji nga si Abigail, sa ingon makigbalik kini kaniya.

Apan dihang gihampak og krisis si Abigail, kinahanglang mamili ni Kenji tali sa duruha ka mga babaye. Si Abigail ang gipili ni Kenji. Maingon og natapos na ang unsa man gani ang nagbugkos kang Kenji ug Athena. Apan wala diay.

Sa kasamtangan, maaninaw nga usa sa mga pasahero si Kenji  sa usa ka eroplano nga nawagtang samtang paingon sa Legaspi. Si Athena himalatyon na ug adunay hangyo-makita pag-usab ang lalaki nga iyang gimahal, si Kenji.

Dinhi mag-abot ang mga dalan nila ni Kenneth (Daniel gihapon) ug Kelay (Kathryn gihapon). Si Kenneth anak ni Kenji kinsa nangita sa nawagtang niyang amahan. Si Kelay nangita sab kang Kenji aron matuman niya ang hangyo sa iyang himalatyon nga iyaan nga si  Athena.

Laki ko uy!

"Ay, napakalaki po, napakalaki!" mao kini ang tubag ni Angeline Quinto sa dihang gipangutana siya kabahin kang Erik Santos kung musugot ba siya nga panguyaban siya og balik ni Erik.

Mingawon ni Mirabella

Mapasalamaton si Pokwang sa mga misuporta sa pantaseryeng "Mirabella" diin siya nidala sa karakter ni Osang ug inahan ni Mira. Matud pa ni Pokwang nga mingawon siya sa mga artistang iyang nakatrabaho ug sa mga nagpaluyo niining serye. Ang "Mirabella" natapos na kagabii lang.

Dili pa ready

Giangkon ni Solenn Heusaff nga dili pa siya andam magminyo sa boyfriend niyang si Nico Bolzico. 'Pag mangyayari, mangyayari 'yan... ayoko ma-jinx pero we know naman we're for the long run," suma pa ni Solenn.

"Artista na yan!'

Anak ni Comedy Queen Ai-Ai Delas Alas nga si Sancho misunod na sa yapak sa iyang inahan isip artista. Matud pa ni Sancho sa iyang Instagram account nga aduna siya'y gamay nga papel sa pelikulang "Ronda" diin anaa pud iyang inahan sa maong pelikula. "First time... Working with my mudra! @aiaidelasalas #ronda #indiefilm #extra," suma pa ni Sancho sa iyang IG account.

Inilog si Angeli

Human sa iyang pagdaug sa Gawad Urian Awards isip Best Actress ning tuiga, aduna puy bag-ong pelikula nga pagabituonan si Angeli Bayani. International movie kini diin ang karakter ni Angeli sa maong pelikula mao ang isip asawa sa usa ka boxer, diin dinhi sa nasud ang shooting ipahigayon.

Proud boyfriend

Matud pa ni Dingdong Dantes nga proud siya sa iyang girlfriend nga si Marian Rivera kinsa midaug isip 2014 FHM Sexiest Woman in the Philippines. Dugang pa niya nga wala siya masorpresa sa pagkadaug ni Marian. Mapasalamaton usab siya nga daghan ang misuporta sa primetime serye niyang "Ang Dalawang Mrs. Real".

Nahadlok ni Kuya

Gibutyag ni Mymy Davao nga hapit siya moatras sa seryeng "Dading" human niya mahibaw-i nga ang iyang igsoon nga si Ricky Davao ang direktor niini. Dugang pa ni Mymy nga mao kini ang labing unang proyekto nga makatrabaho ang igsoon. Apan mapasalamaton gihapon siya tungod kay apil siya sa maong serye.

Direk Alwyn

Sa 12 ka tuig na niya sa showbiz, giangkon ni Alwyn Uytingco nga gusto niya nga mobalik sa uno dili isip artista apan usa ka direktor. Suma pa ni Alwyn nga siya maoy nagdirektor sa music video sa "There is no remaining Place" nga kanta sa "Orange and Lemons". Si Alwyn mao ang bida sa bag-o lamang natapos nga   comedy-seryeng "Beki Boxer" sa TV5.

Sorry…

Nangayo og pasaylo si Kris Aquino ngadto kang Batangas Governor Vilma Santos atol sa episode sa "Aquino and Abunda Tonight" niadtong miaging gabii mahitungod kini sa pag-post niya sa dedication card nga gihatag sa governor. Matud pa ni Kris nga wala siya manumbaling sa sayop nga spelling ni Ate Vi ug mapasalamaton pa siya sa sinseridad ug kaayo nga gipakita ni Ate Vi ngadto kaniya.

Thanksgiving Concert

Malipayon si Jodi Sta. Maria sa mga misuporta gihapon sa serye niyang "Be Careful With My Heart" sa ikaduhang tuig niini. Matud pa niya nga wala sila magdahum nga magdugay ang maong serye. Ang cast sa "Be Careful With My Heart" magpahigayon og Thanksgiving Concert alang sa ilang mga fans karong Hulyo 25 sa Araneta Coliseum.