Wala mataypi ni mommy

CEBU, Philippines - Giangkon ni James Reid nga dili uyon kaniya ang inahan sa kauban niya niadto sa Pinoy Big Brother nga si Devon Seron hinungdan nga nahunong ang pagdiskarte niya ngadto sa aktres. Gidungog nga aduna na’y non-showbiz girlfriend si James nga ginganlan og Ericka.

Uyab  ni  Anne  gisapot

Gisapot si Erwan Heussaff sa mga tawong nagbugal-bugal sa iyang uyab nga si Anne Curtis kinsa nalandig sa tambalanan human nabiktima sa jelly fish. Suma pa ni Erwan nga seryoso ang nahiaguman sa iyang uyab busa dili kini angayan nga bugal-bugalan.

Tropa molarga  sa  Dubai

Motikang sa  Dubai karong April 9 hangtud sa   April 13 ang cast sa gag show sa TV5 nga Tropa Mo Ko Unli. Gihatagan og init nga suporta sa network ang nahisgutang programa.

Gilinyahan  gihapon

Gikatahong nadugangan ang mga sinehan nga nagpasalida og pelikulang Diary Ng Panget  sa Viva Films gumikan sa kadaghang mga tawo nga nanan-aw niini. Ang maong pelikula gibidahan nila ni Jams Reid ug Nadine Lustre.

Dota

Karong April 9 ang showing sa indie film nga Dota nga gibitoonan nila ni Joyce Ching ug James Matthew. Ang maong pelikula naumol gumikan sa kasikat sa online game nga Dota.

SOud  sa  pamilya

Naa ang presensya ni Quezon City Mayor Herbert Bautista sa family dinner nga gitambongan nila ni Kris Aquino, Presidente Noynoy Aquino ug uban nila nga mga igsuon niadtong Sabado sa gabii.

BFF

Sila si Mona Louise Rey ug  Miggs Cuaderno ang mga bida sa umaabot nga programa sa GMA-7 nga BFF. Makadaghan na nga nag-uban sila si Mona ug Migss sa nagkadaiyang programa sa GMA.

Fans  ni  Richard  mihangyo

Magsaulog sa iyang 47th birthday si Richard Yap karong May 18. Naghina-hinam na og maayo ang fans ni Richard alang sa mga kalihukan nga pagabuhaton niini. Pipila sa fans sa aktor ang mihangyo nga kinahanglan nga mag-concert na ang ilang idolo gumikan kay segurado gyud nga dagsaan kini sa mga tawo.

Antoinette padayon nga giintriga

Gipadayag ni Antoinette Taus nga karaan na kaayo ang isyu nga matud pa duna sila’y anak sa kanhi niya boyfriend nga si Dingdong Dantes apan wala gihapon mahupas ang maong intriga.

Matud pa ni Antoinette nga dili tinoud ang maong taho  ug dili niya itago kung tinuod man gani nga duna sila’y  anak sa aktor.

“Natatawa na lang din ako kasi, ever since, 'di naman matapos yun, 'tapos parami nang parami yung mga 'anak' ko.Hindi naman ako ganun.If ever I did have a child, sasabihin ko naman sa publiko, 'di ko naman itatago,” tsika pa ni Antoinette ngadto sa PEP.

Duha ka Pinay pasok sa Top 3

Nakatungtong na sa  Top 3 ang duha ka mga  Pinay nga sila si Katarina Rodriguez ug Jodilly Pendre sa  modelling-reality competition nga Asia’s Next Top Model Cycle 2. 

Nasayran nga sa 12 ka  episodes sa maong  show , nahimong instant favorites ang maong duha ka mga  Pinay ug dako kaayo ang tsansa niini sa usa nila  ang makaangkon sa titulong Asia’s Next Top Model.

Makatigi sa duha ang pambato sa Malaysia nga si Sheena Liam kinsa nakakuha na og daghang awards samtang nagdagan ang programa.

Mahibaw-an karong Miyerkules , April 9 ang grand winner sa Asia’s Next Top Model.

Prangkahay

Gipadayag ni Marian Rivera nga sa matag isyu nga iyang masugatan, dili siya mangayo og pasaylo kung wala siya’y nabuhat nga sala. “I’m just being true to myself. Ayokong ma­ging plastic,” suma pa ni Marian.

Star- studded

Ubay-ubay ka local stars ang nilantaw sa concert ni Lionel Riche sa Smart Araneta Coliseum sa miaging gabii. Kini sama nila ni Vice Ganda, Maricel Soriano, Korina Sanchez , Nadine Samonte, Jose Mari Chan, ug Dina Bonnevie. Misaksi usab sa maong concert ang international star nga si Apl.d.Ap.

Panday  hanap  pa?

Nabalaka ang fans ni Sen. Bong Revilla gumikan kay basin dili madayon ang plano sa senador nga mohimo og remake sa pelikulang Ang Panday alang sa 2014 Metro Manila Film Festival. Nakapangutana ang fans ni Bong kung asa mokuha og puhonan ang aktor alang sa maong proyekto kung matinoud ang mga hungihong nga matud pa posibleng i-freeze ang bank account sa mga tawo nga gipasanginlan nga nalambigit sa pork barrel scam.

Joross  mipaso  na

Migradwar na sa kursong mass communication si Joross Gamboa sa  Southville International School and College. Kahinumduman nga nagkalain-laing kurso ang gikuha sa aktor niadto hangtud nga naabot kini sa masscomm. Gikuha niya niadto ang mga kursong computer science ug BS Nursing.

Anne balik-trabaho karong adlawa

Nakagawas na kagahapon sa tambalanan si Anne Curtis human kini nabiktima sa jelly fish sa miaging semana.

Mobalik na si Anne sa taping sa Dyesebel karong adlawa ug nagpasalamat siya sa tanan niya nga higala ug fans nga miunong kaniya.

“Thank you for all your prayers and wishes! Most importantly, Thank you Lord for saving me and being with me during one of the scariest moments in my life,” tweet pa ni Anne.

Suma pa ni Anne nga dili lalim ang iyang naagian ug nihatag usab siya og pahimangno  ngadto sa katawhan nga magabinantayon gyud kung maligo og dagat.

“This summer, be careful while swimming sweethearts. Remember the ocean is the natural habitat or these sea creatures so it's our responsibility to try & avoid them, to keep an eye out & be careful. Very thankful that ‘Dyesebel will be back to work soon,” dugang mensahe sa aktres sa Twitter.