Lakay at Milky - dineklarang broadcast journalists ng taon

MANILA, Philippines - Itinanghal ng Rotary Club of Manila sina Deo Macalma at Milky Rigonan bilang radio broadcast journalists of the year sa taunan nilang Journalism Awards na ginanap sa McKinley Room ng Manila Polo Club.  Tampok ang dalawa sa komentaryong pang-radyo tuwing alas-nuwebe ng umaga na naririnig sa DZRH, pangunahing istasyon ng Manila Broadcasting Company.

Higit na kilala bilang si Lakay, si Macalma ay assistant vice president at assistant station manager ng DZRH, na siyang pinakamatandang istasyon ng radyo sa Pilipinas.

Humatak siya ng tagapakinig dahil sa kanyang mga satirical commentary at ang kanyang Espesyal na Balita, na tumutumbok sa mga blind item.

Tapos ng  journalism sa Lyceum of the Philippines, naging newswriter siya ng DZRH noong 1980, at nagsikap hanggang sa maging  field reporter, managing editor, at news director, hanggang sa ma-appoint bilang AVP at assistant station manager noong 1991 – mga posisyong hawak pa niya hanggang sa ngayon.

Si Rigonan naman ay naka-assign mag-cover sa Senado bilang official DZRH correspondent, at katuwang ni Deo tuwing alas-nuwebe ng umaga sa Isyu!.   Co-host din siya ng palatuntunan ng Philhealth tuwing Miyerkules ng hapon,  at sumusulat ng online column na pinamagatang Psst!, na ukol  sa pulitika. 

Ang Manila Rotary ang siyang pinakamatagal at prestihiyosong Rotary Club sa Asya, at laging inaabatan ang kanilang Journalism Awards taun-taon ng mga taga-peryodiko, radio at telebisyon.  Nationwide ang call for nominations nito, na masusing kinikilatis ng Awards committee bago pagbotohan ng mga miyembro sa kanilang general assembly

Ang iba pa’ng pinarangalan ng Rotary Club ay sina Mike Enriquez ng GMA-7 (broadcast journa­list for television), ABS-CBN (television station of the year), dzMM (radio station of the year), Mindanao Daily Tribune Davao (community newspaper of the year), BusinessMirror (business newspaper of the year), at ang The Philippine STAR columnist na si Federico Pascual (journalist of the year).