Premiere night sa Bourne Legacy gibahaan og dagkong personalidad

CEBU, Philippines - Luyo sa sagunson nga uwan didto sa kaulohan, nagbaha usab ang mga nagkadaiyang personalidad sa gobyerno , artista ug uban pa sa premiere sa Hollywood film nga "Bourne Legacy" niadtong Domingo sa gabii sa Resorts World Manila.

Mitambong sa maong red carpet premiere sila si Metro Manila Development Authority Chairman Francis Tolentino, Department of Tourism Secretary Ramon Jimenez, Jr., Department of Interior and Local Government Secretary Jesse Robredo, Manila Mayor Alfredo Lim ug kanhi Senador Miguel Zubiri. Naa usab si   Rica Peralejo ug ang ubang   local stars nga nalakip sa maong pelikula, kini sama nila ni John Arcilla nga midala isip security guard ug Lou Veloso nga nagdala sa karakter nga mangingisda. Wala man makatambong, apan adunay video message nga giumol ang main casts sa pelikula nga sila si Rachel Weisz ug Jeremy Renner. Nangayo og despensa si Rachel gumikan kay wala siya makatambong sa premiere apan nagpasalamat siya sa init nga suporta nga gihatag sa mga Pinoy sa "Bourne Legacy".

Samtang si Jeremy nagkanayon, “We had an amazing time shooting in your beautiful city." Ipasalida na ugma sa mga sinehan sa nasud ang maong pelikula. Kahinumduman nga pipila sa mga eksena sa Bourne Legacy ang gi-shoot dinhi sa Pilipinas.

Richard inspirasyon ni Sarah

Inspirasyon karon ni Sarah Lahbati ang co-star niya sa Makapiling Kang Muli nga si Richard Gutierrez.

Gipadayag sa aktres nga maabot ra ang saktong panahon nga mosulti siya sa tinud-anay nila nga istado ni Richard.

Nasayran nga kanunay nga dalhan ni Richard og pagkaon si Sarah sa set sa ilang serye ug daghan usab ang nakabantay sa gipakitang sweetness sa duha.

Gipaila-ila na usab ni Sarah si Richard sa iyang mga ginikanan ug igsuon. Matud pa niya nga nagkasuod na usab ang iyang amahan ug si Richard. Dugang pa niya nga kanunay nga molantaw ang amahan ni Sarah sa show ni Richard gumikan kay kanunay kini nga molantaw sa show sa aktor nga Pinoy Adventures.

   Tak-om usab ang baba ni Sarah kalabot sa tsika nga matud pa nga giangkon na ni Richard ngadto sa iyang pamilya nga duna sila’y relasyon sa aktres.