DZMM pinagkakatiwalaan sa listahan ng READER'S DIGEST
MANILA, Philippines - Nakamit ng DZMM Radyo Patrol 630 ang Gold Standard Trusted Brand award sa radio category ng Reader’s Digest Trusted Brands 2012 noong Mayo 31.
Ayon sa ABS-CBN Manila Radio Division head na si Peter Musngi, ibinabahagi ng DZMM ang pagkilala sa himpilan bilang isang “trusted” o pinagkakatiwalaang brand hindi lamang sa anchors at production staff kung hindi sa mga tagapakinig nito.
“Talagang matamis itong unang pagkakataong kinilala kami bilang isang ‘trusted brand’ mula sa tanyag na Reader’s Digest.
“Napakagandang pagkilala sa atin nito,” aniya.
Ang DZMM ang numero unong himpilan ng radyo sa buong bansa at nangungunang cable news and commentary channel na kilala rin sa mga proyektong nagbibigay ng serbisyo sa publiko. Kabilang ang DZMM sa mahigit 40 kumpanyang kinilala ng magazine mula sa walong bansa sa Asya. Sa nakalipas na 14 taon, nagbibigay ng parangal ang Reader’s Digest sa mga produkto o serbisyong pinaka-tinatangkilik at pinaka-pinagkakatiwalaan ng marami batay sa isang taunang consumer survey.
- Latest
