Mommy ni Juday uupong chairman ng jury ng TP

MANILA, Philippines - Inihahandog ng Talentadong Pinoy ng TV5 ang pinaka-exciting at pinakamalaking tagisan ng talento ng mga artista ngayong Linggo, Abril 10, sa pagdiriwang nito ng kaarawan ng host ng programa na si Ryan Agoncillo.

Kapana-panabik ang celebrity line-up ng Ta­lentado kaya paniguradong tututukan ito ng mga manonood upang masaksihan ang mga nakaaa­liw pero malulupit na performances mula sa malalapit na kaibigan ni Ryan -- sina Daiana Meneses, Jose at Marion ng Fear Factor, Miriam Quiambao, Jeffrey Santos, at LJ Moreno.

Tunghayan kung paano magtatagisan ng ta­lento ang mga celebrity Talentado at kung sino sa kanila ang magpapamangha sa mga espesyal na talent scouts na kinabibilangan ng asawa ni Ryan na si Judy Ann Santos-Agoncillo, Shalala, Direk Joey Reyes, at Congress representative Lucy Torres-Gomez.

‘Wag din palalampasin ang special participation ng biyenan ni Ryan na si Mommy Carol bilang Chairman ng Jury. Kabilang sa mga tutulong upang pumili ng pinakamagaling na Talentado performer ay ang stylist, talent manager, mga kaibigan at fans ni Ryan.

Ang Talentadong Pinoy ay mapapanood tuwing Sabado ng 8:30 ng gabi at Linggo ng 7:30 ng gabi sa TV5.